بيىل 28 اسا قاۋىپتى جۇقپالى مال اۋرۋىنا قارسى 74 ملن دياگنوستيكالىق تەكسەرۋ جانە 142,4 ملن مال مەن قۇستى ەگۋ جوسپارلانىپ وتىر. ءسىبىر جاراسىنا قارسى مال باسىن 100 پايىز قامتۋ, اۋسىلعا قارسى 5 وبلىستىڭ مال باسىن تولىعىمەن قامتۋ جانە تۋبەركۋللەزگە اللەرگيالىق بويىنشا تەكسەرۋ جۇرگىزىلەدى. جالپى, ۆەتەرينارلىق قاۋىپسىزدىك پەن تاماق قاۋىپسىزدىگى ءبىر-بىرىمەن تىعىز بايلانىستى. ءتول الىنعاننان كەيىن ءتولدىڭ قۇلاعىنا سالىنعان سىرعا, مالدى ەگۋ شارالارى, تەكسەرۋ جۇمىستارى جانە تاسىمالدانۋى, ءوسىرىلۋى اۋىل شارۋاشىلىعى مينيسترلىگىنىڭ قۇزىرىندا بولسا, ءونىم الىنعاننان كەيىنگى ماسەلە دەنساۋلىق ساقتاۋ مينيسترلىگىنىڭ قۇزىرىندا. بۇگىنگى تاڭدا وسى ماسەلەنى ءبىر مەكەمەنىڭ قۇزىرىنا بەرۋ قاراستىرىلۋدا. ويتكەنى ءونىم تاسىمالدانعان كەزدە كەمشىلىكتەر شىعاتىن بولسا, ونىڭ وندىرىلگەن ورنىن ءبىلۋ قۇزىرەتى دەنساۋلىق ساقتاۋ مينيسترلىگىندە جوق. بۇل ماسەلە اۋىل شارۋاشىلىعىنىڭ قاراۋىندا. بارلىق اتقارىلاتىن جۇمىس ءبىر عانا ۆەدومستۆونىڭ, ياعني اۋىل شارۋاشىلىعى مينيسترلىگىنىڭ قۇزىرىندا بولعانى ءجون دەپ سانايمىز», دەدى تۇرسىن قابدولدانوۆ.
سونىمەن قاتار ول برۋتسەللەز اۋرۋىنا دا توقتالدى.
«برۋتسەللەز اۋرۋى الەمدە 1930 جىلدان باستاپ ورىن الىپ كەلەدى. بۇل سوزىلمالى ىندەت. ەلىمىزدە ساۋىن سيىرلار ەكى رەت, كۇزدە جانە كوكتەمدە, ال بۇقالار ءار توقسان سايىن ءتورت رەت تەكسەرىلەدى. ءبىز جىلىنا 7 ميلليونداي مال تەكسەرەمىز, 24 ميلليون قويدىڭ قانىن تەكسەرەمىز. سونىڭ ىشىنەن جىلىنا 20-21 مىڭداي مال برۋتسەللەزگە ۇشىرايدى», دەدى اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ توراعاسى.
راۋان قايدار,
«ەگەمەن قازاقستان»
