قازاق ەسترادا جۇلدىزدارىنىڭ قاتىسۋىمەن وتكەن «مىڭ العىس» اتتى سالتاناتتى كونتسەرتتى اشقان مەملەكەتتىك حاتشى گۇلشارا ابدىقالىقوۆا پرەزيدەنت نۇرسۇلتان نازارباەۆتىڭ العىس ايتۋ كۇنىنە بايلانىستى حالىققا ارنالعان قۇتتىقتاۋ حاتىن وقىپ بەردى. وندا قيىن-قىستاۋ جىلدارداعى ادامگەرشىلىك پەن يماندىلىق ۇستەمدىگىنىڭ جادىمىزدا بولۋى قازاقستان حالقىن بىرىكتىرەدى دەپ اتاپ وتىلگەن. سونىمەن قاتار پرەزيدەنت مەيىرىمدىلىك, ءوزارا كومەك پەن ءبىر-بىرىنە دەگەن قۇرمەت بارلىق قازاقستاندىقتار قاستەرلەيتىن ءارى ماقتان تۇتاتىن دوستىق پەن ىنتىماقتىڭ بىرەگەي اتموسفەراسىن قازاقتىڭ كيەلى توپىراعىندا قالىپتاستىرۋعا مۇمكىندىك بەرگەنىن ايتىپ, العىس ايتۋ كۇنىنىڭ باستى مانىنە توقتالىپ وتكەن.
پرەزيدەنتتىڭ قۇتتىقتاۋ ءسوزىن وقىعاننان كەيىن گۇلشارا ابدىقالىقوۆا قازاقستان حالقى اسسامبلەياسىنىڭ «قايىرىمدى كورشىلەرگە راحمەت!» اتتى رەسپۋبليكالىق اكتسياسىنىڭ باستالعانىن, ونىڭ ءتۇرلى ەتنوس پەن ءدىل وكىلدەرىن, بارلىق قازاقستاندىقتاردى جاقىنداستىرا تۇسۋگە باعىتتالعانىن ايتتى.
«2016 جىلى ەلباسىنىڭ جارلىعىمەن العىس ايتۋ كۇنى بەلگىلەندى. بۇل مەرەكە وسىمەن ءۇشىنشى رەت اتالىپ وتىر. بۇل كۇنى قحا-نىڭ ۇسىنىسىمەن جىل سايىن بىلگىلى ءبىر اكتسيا باستالادى. بۇگىن «قايىرىمدى كورشىگە راحمەت!» دەگەن اكتسيا باستالماق. قازاق «تۋىسى جاقىن جاقىن ەمەس, كورشىسى جاقىن جاقىن» دەيدى. سوندىقتان وسى اكتسيا بارىسىندا ءاربىر كوشەدە, قالادا, ءاربىر اۋىلدا قولداۋدى قاجەت ەتەتىن ازاماتتارعا اسسامبلەيا بولىپ, حالىق بولىپ, كورشى بولىپ كومەك كورسەتەمىز», دەدى ول.
سونىمەن قاتار مەملەكەتتىك حاتشى كورشى وتىرعان اۋداندار مەن قالالاردىڭ, باسقا دا ەلدى مەكەندەر تۇرعىندارىنىڭ كەزدەسۋىن وتكىزۋگە شاقىردى. ونىڭ ايتۋىنشا, بۇل وتانداستارىمىزدىڭ ءبىر-بىرىمەن جاقىنىراق تانىسۋىنا كومەكتەسەدى, سونىمەن قاتار وكپە-رەنىشتى كەشىرىپ, يگى تىلەك ايتۋ ءۇشىن دە كەرەك.
سونداي-اق سالتاناتتى جيىن بارىسىندا ەلباسى نۇرسۇلتان نازارباەۆتىڭ قازاقستان حالقى اسسامبلەياسىنىڭ ححV سەسسياسىندا بەرگەن تاپسىرماسىن ورىنداۋ جانە «رۋحاني جاڭعىرۋ» باعدارلاماسىن جۇزەگە اسىرۋ اياسىندا قحا-نىڭ جاڭا مۋلتيمەديالىق پورتالىنىڭ تانىستىرىلىمى ءوتتى. تانىستىرۋ راسىمىنە قاتىسقان اقپارات جانە كوممۋنيكاتسيالار ءمينيسترى داۋرەن اباەۆ كوپشىلىكتى العىس ايتۋ كۇنىمەن قۇتتىقتاي وتىرىپ, مەرەكە ەلىمىزدە تاتۋلىق پەن بىرلىكتىڭ ۇلكەن نىشانى دەپ ەسەپتەۋگە بولاتىنىن ايتتى. سونىمەن قاتار ول پرەزيدەنتتىڭ تاپسىرماسى بويىنشا قحا-نىڭ پورتالىن اقپارات جانە كوممۋنيكاتسيالار مينيسترلىگى مەن «قازكونتەنت» اق جاساعانىن اتاپ ءوتتى.
پورتالدى تانىستىرعان «قازكونتەنت» اق باسقارما توراعاسى ەۆگەني كوچەتوۆ مەملەكەت باسشىسى اتالعان پورتالدىڭ مۋلتيمەديالىق مۇمكىندىكتەرىنە باسا ءمان بەرۋدى تاپسىرعانىن, www.assembly.kz ينتەرنەت-رەسۋرسى زاماناۋي پلاتفورماعا قوسىلىپ, مەملەكەتتىڭ رەسمي سايتتارىمەن بايلانىستىرىلعانىن ايتتى. سونىمەن قاتار سايتتىڭ نەگىزگى تاراپتارى جاڭالانىپ, زاماناۋي ستاندارتتارعا سايكەستەندىرىلگەنىن دە اتاپ ءوتتى.
ء«بىز پرەزيدەنتتىڭ تاپسىرماسى بويىنشا جۇمىس ىستەدىك. اتالعان پورتالدا ونلاين-ترانسلياتسيالار مەن كونفەرەنتسيالار وتكىزۋگە بولادى. سونىمەن قاتار قحا مۇشەلەرى ەلىمىزدىڭ كەز كەلگەن بولىگىندە وتىرىپ ونلاين رەجىمدە ءبىر-بىرىمەن بايلانىس ورناتا الادى», دەدى ە.كوچەتوۆ. ونىڭ ايتۋىنشا, سايت ارقىلى ەلىمىزدىڭ كورىكتى جەرلەرىنە, بەيبىتشىلىك جانە كەلىسىم سارايىنا, دوستىق ۇيلەرىنە 3D تۋر ۇيىمداستىرۋعا بولادى. سونداي-اق سايتتا كوپتەگەن مەديا-جوبا, ينتەراكتيۆتى ينفوگرافيكا مەن باسقا دا اقپاراتتار جيناقتالاتىن بولادى.
سالتاناتتى جيىن بارىسىندا شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى زيابەك قابىلدينوۆ «قازاقستان حالقى» اتتى ارنايى مۋلتيمەديالىق كارتانى تانىستىردى.
«بۇل كارتا ەلىمىزدەگى ۇلتارالىق قاتىناستاردى نىعايتىپ, بىرلىكتى كۇشەيتۋگە باعىتتالعان. «قازاقستان حالقى» اتتى تاريحي كارتا ەلباسى نۇرسۇلتان نازارباەۆتىڭ تىكەلەي تاپسىرماسىمەن جاسالدى. كارتا ءۇش تىلدە دايىندالدى جانە ءۇش بولىمنەن تۇرادى. ءبىرىنشىسى – ينتەراكتيۆتى تاريحي كارتا. ەكىنشى ءبولىم – قازاقستان حالقى, ءۇشىنشىسى – تاۋەلسىزدىك ءداۋىرى. الەم ءبىزدىڭ پرەزيدەنتىمىز قۇرعان قازاقستاندىق ۇلتارالىق مودەلىن مويىندادى. بولاشاقتا كارتانى جاڭا مالىمەتتەرمەن تولىقتىرىلىپ وتىرادى», دەدى ول.
سونىمەن قاتار زيابەك قابىلدينوۆ اتالعان ينتەراكتيۆتى عىلىمي كارتانى جاساۋعا ءبىلىم جانە عىلىم مينيسترلىگى, عىلىمي زەرتتەۋ ۇيىمدارى, تاريح, گەوگرافيا, ءىت تەحنولوگيا سالاسىنداعى جەتەكشى ماماندارى ءوز ۇلەستەرىن قوسقانىن اتاپ ءوتتى.
ايتا كەتۋ كەرەك, العىس ايتۋ كۇنى قازاقستان رەسپۋبليكاسى پرەزيدەنتىنىڭ 2016 جىلعى 14 قاڭتارداعى №173 جارلىعىمەن بەكىتىلگەن بولاتىن. العىس ايتۋ كۇنىنە وراي رەسپۋبليكا بويىنشا 3,4 مىڭ ەلدى مەكەندە 2,5 ميلليوننان استام ادامنىڭ قاتىسۋىمەن 10 مىڭعا جۋىق ءىس-شارا وتەدى دەپ جوسپارلانعان بولاتىن. ونىڭ ىشىندە ەتنومادەني بىرلەستىكتەر مەن دوستىق ۇيلەرى بازاسىندا ۇيىمداستىرۋ كوزدەلگەن مەرەكەلىك ءىس-شارالار مەن قايىرىمدىلىق اكتسيالارى دا بار.
گۇلنۇر قۋانىشبەكقىزى,
«ەگەمەن قازاقستان»
سۋرەتتەردى تۇسىرگەن ەرلان ومار,
"ەگەمەن قازاقستان"
