قازاقتىڭ كورنەكتى اقىنى, تۇركى الەمىنىڭ تەگەۋرىندى تۇلعاسى ماعجان جۇماباەۆتىڭ تۋعانىنا بيىل 125 جىل تولادى. اكادەميا وسىعان وراي تۇركىستان يدەياسىن تۋ ەتكەن اقىننىڭ شىعارمالارىن شەت تىلدەرگە اۋدارىپ, باسىپ شىعارۋدى قولعا الدى.
اتاپ ايتقاندا, اكادەميانىڭ عىلىمي جوباسى اياسىندا كلاسسيك اقىننىڭ شىعارمالارىن وزبەك تىلىنە بەلگىلى اقىن مۋزافار احماد, موڭعول تىلىنە اقىن-اۋدارماشى جۇكەل حاماي, التاي تىلىنە شىعىستانۋشى عالىم, اقىن برونتاي بەديۋروۆ, ازەربايجان تىلىنە فۋزۋلي مادجيدلي اۋدارا باستادى. بۇدان بولەك, ماعجاننىڭ جىرلارىن قىرعىز, ماجار تىلدەرىنە اۋدارۋ جوسپارلانعان. ايتا كەتەرلىگى, بىلتىر اكادەميا ماحامبەتتىڭ شىعارمالارىن موڭعول تىلىنە اۋدارىپ, باسىپ شىققان بولاتىن.
سونىمەن قاتار, بريفينگتە TWESCO-نىڭ تۇركى ىنتىماقتاستىعى ۇيىمدارىمەن بىرلەسىپ جىل بويىنا اقىننىڭ ءومىرى مەن ادەبي مۇراسىنا ارنالعان ءىس-شارالار وتكىزۋدى جوسپارلاپ وتىرعانى جونىندە ايتىلدى.
