بۇل رەتتە قازاق دالاسىنىڭ باتىس ءوڭىرىن مەكەندەگەن تىلەۋ باتىردىڭ وڭتۇستىك وڭىردەگى سايرام قالاسىنىڭ تۇبىندە جوڭعار-قالماق شاپقىنشىلارىمەن بولعان شايقاسقا ويلانىپ جاتپاستان اتتانۋى – قازاق جەرىنىڭ تۇتاستىعىن كوكسەۋدەن تۋعان ءمارت قادام ەدى.
ول جالعىز ەمەس ەدى. ارتىندا ون بەس مىڭنان اسىپ تۇسەتىن قالىڭ قولى مەن ساربازدارى, بالاسى مەن باۋىرى بار ەكەنىن تاريحي دەرەكتەر ايعاقتايدى. ولار سايرام تۇبىندە جوڭعار شاپقىنششىلارىنا تۇڭعىش رەت كۇيرەتە سوققى بەرىپ, جەڭىسكە جەتەدى. ايتسە دە ەسىل ەر وسى سۇراپىل شايقاستا مەرت بولادى. ايتايىن دەگەنىمىز ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىندە تىلەۋ ايت ۇلى مەن ونىڭ تۋعان باۋىرى قاباق ايت ۇلىنا ارنايى كابينەتتەر اشىلعانى.
مۇندا قوس تاريحي تۇلعانىڭ ءومىرى مەن ورلىگى, ەرلىگى مەن كەڭىگى جونىندە مول ماعلۇماتتار جتناقتالعان. اتا-بابالارىمىز بىلەكتىڭ كۇشىمەن, نايزانىڭ ۇشىمەن ۇستاپ قالعان قازاق جەرىنىڭ ءار سۇيەم سىنىعى بارىمىزگە قىمبات. ەلدىڭ باتىسى مەن شىعىسى, وڭتۇستىگى مەن سولتۇستگى دەمەي, قازاق جەرىنىڭ تۇتاستىعىن كوكسەپ, قاندى شايقاستا مەرت بولعان تىلەۋ مەن قاباق سەكىلدى تاريحي تۇلعالاردىڭ ەمەس بۇىگىنگى ۇرپاقتى ەل مەن جەردى شەكسىز سۇيە بىلۋگە, ونى قورعاۋعا قاشان دا ءازىر بولۋعا ۇندەي الارىن انىق. ولاردىڭ رۋحىنا ارنالعان قوس كابينەتتى اشۋداعى باستى ماقسات تا وسىنداي ومىرشەڭ ويدان باستاۋ الادى. كابينەتتەردىڭ اشىلۋ ءراسىمى كەزىندە اقتوبە وڭىرلىك مەملەكەتتىك ۋنيۆەرسيتەتىنىڭ رەكتورى باۋىرجان ەردەنبەكوۆ وي ورامىن وسى ارنادان تارقاتتى.
تۋعان جەردى سۇيە ءبىلۋ ءارى ايالاۋ مەن قۇرمەتتەۋ, وعان دەگەن پەرزەنتتىك سەزىم مەن ماحاباتتى تۇتاستاي تۋعان ەلگە دەگەن سۇيىسپەنشىلىككە ۇشتاستىرا ءبىلۋ مەملەكەت باسشىسى بەلگىلەپ بەرگەن رۋحاني باعدارلامانىڭ باستى ارقاۋى.وسى تۇرعىدا وڭىردەگى جوعارى وقۋ ورنىندا تاريحي تۇلعالارعا ارنالىپ اشىلعان كابينەتتەر ەلباسى قاعيداتىن ناقتى مىسالدار شەڭبەرىندە ودان ءارى تەرەڭدەتە تۇسەرى حاق.
تەمىر قۇسايىن,
«ەگەمەن قازاقستان»
اقتوبە
