باستان اياق اعىلشىن تىلىندە وتكەن شارانى باتىس قازاقستان وبلىسى اكىمىنىڭ ورىنباسارى, «بولاشاق» باعدارلاماسىنىڭ تۇلەگى عابيدوللا وسپانقۇلوۆ جۇرگىزدى. پىكىر الاڭىنا نەگىزگى سپيكەر رەتىندە قاتىسقان يتاليانىڭ پيزا قالاسىنداعى سانتاننا ۋنيۆەرسيتەتىنىڭ رەكتورى پەرراتا پەردومينيكو, «ۆالاگرو ديجي گرۋپپ» كومپانياسى باس ديرەكتورى وتتورينو لا روككا, «دي دجي يمپيانتي (DG Impianti)» كومپانياسى باس ديرەكتورى پالوتستسو ۋيليام مەن باس اتقارۋشى ديرەكتورى ميكەلە انجەلو تورتورەللا, «Italfluid – DG group» باس ديرەكتورى گاللەتتا انتونينو, «كاسپيان پرودجەر» كومپانياسىنىڭ باس ديرەكتورى كريشي نيگاەتانو ءسوز سويلەپ, ەلىمىزدىڭ ءبىلىم سالاسىنداعى وڭ وزگەرىستەرگە ريزاشىلىق ءبىلدىردى.
يتالياندىقتار ورال قالاسىندا تەك جۇرگەن جوق. «كاسپيان پرودجەر» كومپانياسىنىڭ باس ديرەكتورى كريشي نينو گاەتانو وسىدان بىرنەشە جىل بۇرىن ورالداعى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتى جانىنان «ارمان زەرتحاناسى» («لابوراتوريا مەچتا») اتتى ستۋدەنتتىك ۇيىرمە قۇرىپ, تەحنيكالىق سالا ستۋدەنتتەرى مەن ماگيسترانتتارىن قازىرگى زامانعى ءوندىرىس ورىندارىندا تاجىريبەدەن وتكىزۋ جۇمىسىن باستاعان. بۇل جولى دا يتالياندىق قوناقتار قازاقستانعا, سونىڭ ىشىندە جەرگىلىكتى جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە زەرتحانا اشۋ ماقساتىندا ينۆەستيتسيا ءبولىپ, كوپتەگەن بىرلەسكەن جوبالاردى جۇزەگە اسىرماق.
مەيماندار قازاقستاندا قولعا الىنعان رۋحاني جاڭعىرۋ باعدارلاماسىنان دا حاباردار بولىپ شىقتى. ماسەلەن, يتالياندىق دەلەگاتسيا جەتەكشىسى پەرراتا پەردومينيكو باعدارلامادا ايتىلعان التى ءپرينتسيپتىڭ ءبىرى – ءبىلىمنىڭ سالتانات قۇرۋىنىڭ ماڭىزدىلىعىنا ەرەكشە توقتالىپ, قازاقستاننىڭ دۇرىس دامۋ باعىتىندا ەكەنىن اتاپ كورسەتتى. ال وتتورينو لا روككا قازاقستانعا العاش اياق باسقان 2001 جىلدى ەسكە الىپ, سودان بەرى ەلىمىزدە ءبىلىم سالاسىندا وڭ وزگەرىس كوپ بولعانىن ايتتى. «قازىر جۇزەگە اسىپ جاتقان رۋحاني جاڭعىرۋ باعدارلاماسى ادامي كاپيتال ساپاسىن ارتتىرۋعا وڭ سەپتىگىن تيگىزەرىنە سەنىم بىلدىرەمىن» دەدى شەتەلدىك مەيمان.
يتالياندىق عالىمدارمەن بولعان كەزدەسۋگە ورال قالاسى جوو-لارىندا ءبىلىم الىپ جۇرگەن بولاشاق ينجەنەرلەر, نازارباەۆ زياتكەرلىك مەكتەبىنىڭ وقۋشىلارى قاتىستى.
قازبەك قۇتتىمۇرات ۇلى,
«ەگەمەن قازاقستان»
