الىپ شاھار الماتىدا بۇل باعىت بويىنشا ەداۋىر ىلگەرىلەۋ بار. ونىڭ ءبىر عانا دالەلى قالاداعى بارلىق مەكتەپتەر كەڭجولاقتى ينتەرنەتكە قوسىلعان.
وتكەن جىلدىڭ قىركۇيەك ايىنان باستاپ مەكتەپتەردە «Kundelik.kz» ەلەكتروندى كۇندەلىك جانە جۋرنالدار جۇيەسى ەنگىزىلگەن. بۇل جۇيە مۇعالىمدەرگە ەلەكتروندى فورماتتا جۋرنال تولتىرۋعا مۇمكىندىك تۋدىرسا, اتا-انالار قاۋىمى ءۇشىن بالاسىنىڭ ۇلگەرىمىن ونلاين رەجيمىندە قاشىقتىقتان اق قاداعالاۋعا جول اشقان. ماماندار جۇيە جۇمىسىن باستاعالى بەرى وقۋشىلاردىڭ ۇلگەرىم ساپاسى مەن تارتىبىندە وڭ وزگەرىستەر بايقالعانىن ايتادى.
مەكتەپتەر مەن مەكتەپتەن تىس ۇيىمداردا ىسكە قوسىلعان روبوتوتەحنيكا جانە 3D مودەلدەۋ ۇيىرمەلەرى 2692 وقۋشىنى قامتىعان. اعىمداعى جىلى وقۋشىلار سارايى بازاسىندا بالالار مەن جاسوسپىرىمدەر كۇشىمەن يننوۆاتسيالىق بيزنەس جوبالاردى ەنگىزۋگە ارنالعان بيزنەس-ينكۋباتور قۇرىلماق. الماتى قالالىق ءبىلىم باسقارماسىنىڭ باسشىسى گۋلنار حودجابەرگەنوۆانىڭ ايتۋىنشا, بۇل بالالاردىڭ ەرتە جاستان زەرتتەۋشىلىك داعدىسىن قالىپتاستىرۋعا جانە مەكتەپ بىتىرۋشىلەردىڭ بولاشاقتا الەمدىك باسەكەلەستىك ورتادا لايىقتى ورىن الۋلارىنا مۇمكىندىك بەرمەك. پەداگوگتاردىڭ بىلىكتىلىگىن ارتتىرۋ مەن مارتەبەسىن كوتەرۋ ءاردايىم باستى نازاردا دەگەن قالانىڭ باس مۇعالىمى وسى باعىتتا قولعا الىنعان بىرقاتار شارۋالاردى جىپكە ءتىزىپ بەردى.
– ورتا ءبىلىم بەرۋ دەڭگەيىندە جاڭارتىلعان مازمۇندى ءبىلىم بەرۋگە كەزەڭدەپ ءوتۋ بەلگىلەندى جانە بۇل 2020 جىلى اياقتالادى. وسى رەتتە جاڭارتىلعان مازمۇندى ءبىلىم بەرۋگە 2016 جىلى 1-ءىنشى سىنىپتار, 2017 جىلى 2, 5, 7-ءىنشى سىنىپتار ءوتتى. اعىمداعى جىلى كەزەڭدەپ ءوتۋ ءىسى 3, 6, 8-ءىنشى سىنىپتاردى قامتىسا, 2019 جىلى, 9, 10-ىنشى سىنىپتار, 2020 جىلى 11-ءىنشى سىنىپتار جاڭا مازمۇندى ءبىلىم بەرۋگە تولىقتاي وتەدى. ەلباسىنىڭ حالىققا جولداۋىندا اتاپ كورسەتكەندەي, جاڭا مازمۇندى ءبىلىم بەرۋ جۇيەسىنە وتكەن مۇعالىمدەردىڭ جالاقىسى 30 پايىزعا وسەدى. ساناتى مەن ەڭبەك ءوتىلى جوق جاس مۇعالىمدەرگە 18 696 تەڭگە, جوعارى ساناتتى مۇعالىمدەرگە 27 مىڭ تەڭگەدەن اسا ۇستەماقى قوسىلادى. جاڭارتىلعان مازمۇندا ءبىلىم بەرۋ بويىنشا 2016 جىلى 1-ءىنشى سىنىپتىڭ 2786 مۇعالىمى, 2017 جىلى 2,5,7, سىنىپتاردىڭ 3846 مۇعالىمى كۋرستان وتكىزىلدى. بيىلعى جىلى ءبىلىم باسقارماسىنىڭ جانە ءبىلىم بەرۋ ۇيىمدارىنىڭ سايتتارىنا قالاداعى ۇزدىك مۇعالىمدەردىڭ بەينە ساباقتارىن ورناتۋ بويىنشا جۇمىستار باستالدى. ءبىلىم بەرۋ جۇيەسىنىڭ تيىمدىلىك كورسەتكىشىنىڭ ماڭىزى ونىڭ ناتيجەلىلىگىندە, – دەيدى گۇلنار حودجابەرگەنوۆا.
الماتى قالاسىنىڭ ءبىلىم بەرۋ جۇيەسىندە 1078 ءبىلىم بەرۋ ۇيىمى جۇمىس ىستەسە سونىڭ 700-ءى مەكتەپكە دەيىنگى ءبىلىم بەرۋ ۇيىمى. ماسەلەن, سوڭعى ەكى جىلدىڭ وزىندە قالادا 10,4 مىڭ ادامعا ارنالعان 262 مەكتەپكە دەيىنگى مەكەمە اشىلعان. مەكتەپكە دەيىنگى ءبىلىم بەرۋ جانە تاربيەلەۋمەن 3 جاستان 6 جاسقا دەيىنگى 81,2 پايىز بالالار قامتىلعان. 296 مەكتەپكە دەيىنگى ۇيىمنىڭ بازاسىندا 13 712 ورىنعا مەملەكەتتىك ءبىلىم بەرۋ تاپسىرىسى ورنالاستىرىلعان. جالپى قالاداعى ورتا ءبىلىم بەرۋ ۇيىمدارىندا 243 348 وقۋشى ءبىلىم الادى. جۋىردا عانا حالىق الدىندا ەسەپ بەرگەن شاھار باسشىسى جاستاردىڭ جاقسى ءبىلىم الۋىنا وڭتايلى كوڭىل بولىنەتىنىن تىلگە تيەك ەتكەن ەدى. بۇل رەتتە وقۋشىلاردىڭ ساپالى ءبىلىم الۋى ءۇشىن, مۇعالىمدەرگە قويىلاتىن تالاپ تا كۇشەيتىلمەك.
ارمان وكتيابر,
«ەگەمەن قازاقستان»
