كونفەرەنتسيا بارىسىندا قازىرگى زامانعى تاريح عىلىمىنىڭ وزەكتى ماسەلەلەرى, ۇلتتىق تاريحي مەكتەپتەردىڭ ەرەكشەلىكتەرى جانە پوستكەڭەستىك مەملەكەتتەردەگى تاريحي ءبىلىم بەرۋ ماسەلەلەرى تالقىلاندى.
كونفەرەنتسياعا رەسەي, بەلارۋس, ۋكراينا, وزبەكستان, قىرعىزستان ەلدەرىنىڭ تانىمال ساراپشىلارى, وتاندىق مەملەكەت جانە قوعام قايراتكەرلەرى, ديپلوماتيالىق كورپۋستىڭ وكىلدەرى, عىلىمي-زەرتتەۋ ينستيتۋتتارىنىڭ عالىمدارى مەن رەسپۋبليكالىق جوعارى وقۋ ورىندارىنىڭ عىلىمي قىزمەتكەرلەرى قاتىستى.
ءىس-شارانى قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى جانە قر بعم عك مەملەكەت تاريحى ينستيتۋتى وتكىزدى.
كونفەرەنتسيا بارىسىندا قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورى قانات جۇماباەۆ بىلاي دەپ اتاپ ءوتتى: «تاۋەلسىزدىك جىلدارىندا ەلباسىنىڭ باستاماسىمەن وراسان جۇمىس جۇرگىزىلدى. دامىعان مەملەكەتتىك جانە قوعامدىق ينستيتۋتتارى بار تۇراقتى ساياسي قۇرىلىم قۇرىلدى, نارىقتاعى ىرگەلى زاڭدارعا نەگىزدەلگەن يكەمدى, ءتيىمدى ەكونوميكالىق مودەل قالىپتاستىرىلدى. ەلىمىز الەمدىك قوعامداستىقتىڭ تولىق جانە قۇرمەتتى مۇشەسى بولدى. ەلىمىز حالىقارالىق دەڭگەيدە كەڭ تانىلدى. بىراق تاۋەلسىز قازاقستاننىڭ باستى جەتىستىگى - تۇراقتى جانە تۇتاس قوعام. بۇگىن ءبىز ءۇشىنشى جاڭعىرۋ جانە «رۋحاني جاڭعىرۋ» باعدارلاماسى شەڭبەرىندە جۇيەلى رەفورمالار جۇرگىزە وتىرىپ, جاڭا دامۋ كەزەڭىنە كوشتىك. دەگەنمەن بولاشاق باعىت-باعداردى ايقىن قالىپتاستىرۋ ءۇشىن مەملەكەتىمىز وتكەن جولدى زەرتتەۋ وتە ماڭىزدى. بۇل تۇرعىدا «تاۋەلسىزدىك ءداۋىرى» كىتابىن جان-جاقتى تالداۋ ءبىزدىڭ جەتىستىكتەرىمىزدى, اتقارىلعان جۇمىستى باعالاۋعا مۇمكىندىك بەرەدى. بۇل پرەزيدەنتىمىز نۇرسۇلتان نازارباەۆتىڭ يدەيالارى مەن باستامالارىنىڭ تاريحي تۇرعىدان دۇرىس ءارى قاجەت ەكەنىن تاعى ءبىر رەت دالەلدەيدى».
