بۇدان بولەك جاڭا اۆتوتۇراقتار سالىنىپ, فەلدشەرلىك پۋنكت اشىلىپ, ساياباق پەن اۆتوۆوكزال پايدالانۋعا بەرىلگەن-ءدى. ءبىر قۋانىشتىسى, كول جاعاسىن اباتتاندىرۋ جۇمىستارى بيىل دا جالعاسىن تاپپاق. ەڭ باستىسى, اعىمداعى جىلى وسكەمەن مەن سەمەي قالالارىنان «جالاڭاشكول» ستانساسىنا دەيىن تەمىر جول قاتىناسى جولعا قويىلىپ, وبلىستىق بيۋدجەت ەسەبىنەن اتالعان تەمىر جول بەكەتىنەن قابانباي اۋىلىنا دەيىنگى (الاكول) اۆتوكولىك جولى جوندەلمەك. مۇنداي جاعىمدى جاڭالىقتى وبلىس تۇرعىندارى الدىنداعى ەسەپتىك كەزدەسۋدە ايماق باسشىسى دانيال احمەتوۆتىڭ ءوزى جەتكىزدى. «الاكول – ەلىمىزدىڭ ماقتانىشى. ءبىز الاكولدى تۇركيا مەن وزگە دە ەلدەردەگى دەمالىس ورىندارىنىڭ دەڭگەيىنە جەتكىزۋگە كۇش سالىپ جاتىرمىز. سوڭعى ەكى جىلدا جالپى سوماسى 4,3 ميلليارد تەڭگەگە وبلىستاعى نەگىزگى تۋريستىك ورىندارعا اپاراتىن اۆتوكولىك جولدارىن جوندەۋدەن وتكىزدىك. سونىمەن قاتار ءوڭىردىڭ كيەلى ورىندار تىزىمىنە ەنگەن اباي اۋدانىنداعى قوڭىر اۋليە ۇڭگىرىنىڭ جانە تارباعاتاي اۋدانىنداعى ىرعىزباي اۋليە كەسەنەسىنىڭ تۋريستىك ينفراقۇرىلىمى جاقسارتىلدى», دەدى وبلىس اكىمى.
ازامات قاسىم,
«ەگەمەن قازاقستان»
شىعىس قازاقستان وبلىسى
