كەزدەسۋ بارىسىندا قاتىسۋشىلاردىڭ ءبىرى مينيسترگە سۇراق قويىپ, مينيسترلىك پەن قازاقستان مۇسىلماندارى ءدىني باسقارماسىنىڭ اراسىنداعى ءوزارا ءىس-قيمىلدى بەس بالدىق شكالا نەگىزىندە قالاي باعالايتىنىن سۇرادى.
ء«بىز قازاقستانداعى بارلىق رەسمي تىركەلگەن ءدىني بىرلەستىكتەرمەن, سونىڭ ىشىندە قازاقستاننىڭ ەڭ ءىرى ءدىني بىرلەستىگى – قازاقستان مۇسىلماندارى ءدىني باسقارماسىمەن دە سىندارلى قارىم-قاتىناستا جۇمىس جاسايمىز», دەدى مينيستر.
ن.ەرمەكباەۆتىڭ ايتۋىنشا, مينيسترلىك ءدىني باسقارماعا ءارتۇرلى باعىتتاعى ماڭىزدى ماسەلەلەردى شەشۋدە قولداۋ كورسەتەدى.
ء«دىني سالاداعى بارلىق ۇسىنىستارىمىز بەن شەشىمدەرىمىز بويىنشا ءبىز قمدب باسشىلىعىمەن الدىن الا كونسۋلتاتسيالار وتكىزەمىز, ولارمەن كەڭەسەمىز, سونداي-اق باسقا دا ءىرى كونفەسسيالار باسشىلىعىمەن كەڭەسەمىز. سوندىقتان مۇفتياتپەن ءوزارا بايلانىسىمىزعا بەس دەگەن باعا بەرەمىن. سونداي-اق قازاقستانداعى ەكىنشى ۇلكەن كونفەسسيا بولىپ تابىلاتىن ورىس پراۆوسلاۆيە شىركەۋىمەن دە ءوزارا ءىس-قيمىلىمىزدى بەس دەگەن بالمەن باعالايمىن. باسقا كونفەسسيالارمەن دە بايلانىسىمىز ءوز دەڭگەيىندە», دەدى ول.
ەستەرىڭىزگە سالا كەتەيىك, 23-24 اقپان كۇندەرى مينيستر نۇرلان ەرمەكباەۆ قوستاناي وبلىسىنا جۇمىس ساپارى بارىسىندا وبلىس اكىمى ارحيمەد مۇحامبەتوۆتىڭ حالىق الدىنداعى ەسەپتىك كەزدەسۋىنە قاتىستى. سونداي-اق مينيستر وبلىستاعى بىرقاتار ۇيىمداردى, وڭىردەگى مادەني جانە رۋحاني نىسانداردى ارالادى. ونىڭ ىشىندە ايماعانبەت قاجى سپان ۇلى اتىنداعى وبلىستىق مەشىتكە بارىپ, يمامدارمەن كەزدەسۋىندە قمدب-نىڭ وبلىستىق فيليالى جۇمىسىنداعى ماسەلەلەردى تالقىلادى.
«ەگەمەن-اقپارات»
