اتالعان شارادا قاھارماندىعىمەن ەرەكشەلەنگەن وقۋشىلاردى جانە بەلگىلى ءبىر جەتىستىككە قول جەتكىزگەن بالداۋرەندىك جاس پاتريوتتاردى اكادەميا مۇشەلىگىنە قابىلداۋ ءراسىمى بولىپ ءوتتى. جالپى سوڭعى ەكى جىلدا «بالداۋرەن» رەسپۋبليكالىق وقۋ-ساۋىقتىرۋ ورتالىعىندا مەكتەپ وقۋشىلارىنا پاتريوتتىق تاربيە بەرۋدە ءبىراز شارۋا اتقارىلعان. ۇلكەن ىزدەنىستەردىڭ ناتيجەسىندە قازاقستاندىق جاس پاتريوتتار اكادەمياسىنىڭ ساپىنا 1442 وقۋشى مۇشەلىككە قابىلدانىپتى. سولاردىڭ قاتارىندا جاڭادان قابىلدانعان ەكى وقۋشى ەرەكشە اتاۋعا تۇرارلىق. ءبىرى الماتى قالاسىنىڭ وقۋشىسى كوندرات ميل بولسا, ەكىنشىسى اقمولا وبلىسىنىڭ وقۋشىسى ۇلدانا سوۆەت. سوڭعىسىنىڭ ەرلىك ءىسىڭ ايتقاندا ەرىكسىز باسىڭدى يەسىڭ. ول ورتەنىپ جاتقان ۇيدەن ءىنىسى مەن ءسىڭلىسىن امان الىپ شىققان. قازىر ۇلدانا كوكشەتاۋ مەكتەپتەرىنىڭ بىرىندە ءۇشىنشى سىنىپتا وقيدى.
مۇشەلىككە قابىلدانعاندار اراسىندا, سونىمەن قاتار «مەن – ءوز ەلىمنىڭ ازاماتىمىن!» اتتى رەسپۋبليكالىق بايقاۋدىڭ 25 جەڭىمپازى دا بار. بايقاۋعا ەلىمىزدىڭ تۇكپىر-تۇكپىرىنەن 157 مەكتەپ وقۋشىسى ءوز جۇمىستارىن جولداعان. ال «رۋحاني جاڭعىرۋ» باعدارلاماسىنىڭ نەگىزگى مىندەتتەرىن جۇزەگە اسىرۋ بويىنشا وتكىزىلگەن ۇنقاتىسۋ الاڭىنا 500 دەلەگات جينالعانى ءمالىم بولدى. «بالداۋرەن» روسو باس ديرەكتورى مۇحيتدين تولەپباي فورۋم قاتىسۋشىلارىنا ارناعان سوزىندە ولاردىڭ الداعى ۋاقىتتا قازاقستاندىق جالپىۇلتتىق قۇندىلىقتارعا جانە مەملەكەت الدىنا قويىلعان مىندەتتەرگە اتسالىساتىندارىنا سەنىم ءبىلدىردى.
ء«بىز سىزدەردىڭ فورۋمدا يننوۆاتسيالىق يدەيالارىڭىزدى قالىپتاستىرۋ مەن ۇسىنۋ بويىنشا قۇندى تاجىريبە الاتىندارىڭىزعا, ەرەسەكتەردىڭ ۇستانىمدارىن ەستيتىندەرىڭىزگە سەنىمدىمىز. فورۋم جاس ۇرپاقتىڭ پاتريوتتىق تاربيەسىن دامىتۋعا, جانە «رۋحاني جاڭعىرۋ» باعدارلاماسىنىڭ نەگىزگى مىندەتتەرىن جۇزەگە اسىرۋعا ءوز ۇلەسىن قوساتىن دەلەگاتتاردىڭ سۇحبات الاڭىنا اينالۋى ءتيىس. وسى وتىرعان پاتريوتتاردان ۇلكەن ءۇمىت كۇتەمىز. ەندى 15-20 جىلدان كەيىن ەلگە قىزمەت جاسايتىن ناعىز پاتريوتتار سىزدەرسىزدەر دەپ ويلايمىن», – دەدى م.تولەپباي. بۇدان باسقا, شارا اياسىندا الماتى وبلىسى جاركەنت قالاسىنىڭ بالالارى «تۋعان جەر» باعدارلاماسى بويىنشا وزدەرىنىڭ جۇمىس تاجىريبەلەرىمەن ءبولىستى. ودان كەيىن بالالارعا ارنالعان قازاق ەستراداسىنىڭ ونەرپازدارىنىڭ كونتسەرتى بولىپ, ول قاتىسۋشىلارعا كوتەرىڭكى كوڭىل-كۇي سىيلادى. جانە دە «قازاق حالقىنىڭ ۇلتتىق ويىندارى» سپورتتىق ويىندارى دا فورۋم باعدارلاماسىنا ەنىپ, بالالاردى ءبىر سەرپىلتىپ تاستادى. ونىڭ ارتى «قازاق ەلى وسىنداي!» سپورتتىق فلەشموبقا ۇلاستى.
شارا اياسىندا «باقىتتى بولىپ جۇرگەنىم – سەنىڭ ارقاڭ, ۇلى وتان!» دەپ اتالعان توپتىق جۇمىستار كورسەتىلىپ, قازاقستاننىڭ كورىكتى جەرلەرى كورىنىس تاپقان پازلدار جينالدى. سونداي-اق پاتريوتتىق تاربيە بويىنشا «يننوۆاتسيالىق ويلار بانكىن» قۇرۋ بويىنشا جۇمىستار قورعالدى. مۇنىڭ بارلىعى دا بالالاردىڭ ويىندا جاقسى اسەرلەر قالدىرىپ, ولاردىڭ وتانسۇيگىش ءارى باۋىرمال بولىپ قالىپتاسۋىنا وزىندىك وڭ اسەرىن بەرگەنى انىق.
اسقار تۇراپباي ۇلى,
«ەگەمەن قازاقستان»
اقمولا وبلىسى
