وبلىستا جالپى بىلىممەن قامتۋعا, ونىڭ ىشىندە زامان تالابىنا ساي ءبىلىم بەرەتىن عيماراتتار سالۋعا ەرەكشە كوڭىل ءبولىنىپ وتىر. ماسەلەن, وڭىردەگى اپاتتى مەكتەپتەردىڭ ورنىنا جاڭاسىن سالۋ مەن ءۇش اۋىسىمدى وقىتۋ ماسەلەسىن شەشۋ كۇن تارتىبىندە تۇر. وسى ماقساتتا وتكەن جىلى 47 ءبىلىم بەرۋ نىسانىن سالۋعا جانە جاڭعىرتۋعا 26 ملرد تەڭگە بولىنگەن ەكەن. ونىڭ ىشىندە جالپى قۇنى 5,2 ملرد تەڭگەنى قۇرايتىن 24 عيمارات تولىقتاي كۇردەلى جوندەۋدەن وتكىزىلدى. مۇنىڭ كوبىسى وبلىستىڭ حالىق مولىنان قونىستانعان اۋدانداردا جۇزەگە اسقان. ال وبلىس ورتالىعىنداعى سۇرانىستى وتەۋگە بولىنگەن قارجى تولىقتاي يگەرىلىپ, ناتيجەسىندە سالىنعان عيماراتتار مەرزىمىندە قولدانىسقا بەرىلىپ وتىر. مىسالعا, الداعى جاڭا وقۋ ماۋسىمىنىڭ باستاۋىندا تالدىقورعان قالاسىندا شىت جاڭا مۋزىكا مەكتەبى جانە ارقايسىسى 1200 ورىندىق ەكى جاڭا مەكتەپ وقۋشىلارعا ەسىگىن ايقارا اشپاقشى.
جاقىندا وبلىس اكىمى اماندىق باتالوۆ قۇرىلىسى قىزۋ ءجۇرىپ جاتقان ءبىلىم وشاقتارىنداعى جۇمىس بارىسىمەن ارنايى بارىپ تانىستى. ارالاۋ كەزىندە ءوڭىر باسشىسى ءار نىسانعا قاتىستى ەسكەرتپەلەرىن ايتىپ, اتقارىلىپ جاتقان جۇمىستاردىڭ ساپاسىنا باسا نازار اۋدارۋدى تاپسىردى. وبلىس ورتالىعىنداعى 300 ورىندىق مۋزىكا مەكتەبى جاڭا وڭتۇستىك-باتىس تۇرعىن اۋدانىندا ورنالاسقان. ەكى قاباتتى مەكتەپ وزىنە عانا ءتان ساۋلەتتىك شەشىمىمەن ەرەكشەلەنەدى, عيماراتتىڭ كەيپى امفيتەاترعا ۇقساس, 200 ورىنعا ارنالعان جەكە كونتسەرت زالى بار. نىسانداعى جۇمىستار كەستەگە سايكەس جۇرگىزىلۋدە. جانە وسى شاعىن اۋدان اۋماعىندا 1200 ورىندىق جالپى ءبىلىم بەرەتىن مەكتەپتىڭ دە قۇرىلىسى ءجۇرىپ جاتىر. قۇرىلىس باسىنا كەلگەن اماندىق باتالوۆ اۋماقتى اباتتاندىرۋداعى كەمشىلىكتەرگە, عيماراتقا قويىلعان جەلدەتكىش شىلتەردىڭ, كارنيزدەردىڭ ساپاسىنا قاتىستى سىن-ەسكەرتپەلەرىن ايتىپ, قاجەت جاعدايدا اۋىستىرۋدى تاپسىردى.
ال 1200 ورىنعا ارنالعان تاعى ءبىر مەكتەپ وبلىس ورتالىعىنىڭ سولتۇستىك-باتىس اۋدانىندا سالىنۋدا. باس مەردىگەرى – «Melior Logistik» كومپانياسى, جوبالاۋشىسى – «ارلان-جوبا قۇرىلىس» جشس. بۇل ءبىلىم نىسانىنىڭ قۇرىلىسى شىلدە ايىندا اياقتالۋى ءتيىس. قازىر ىشكى ارلەۋ جۇمىستارى ءجۇرىپ جاتىر. وسى ساپارىندا وبلىس اكىمى مەكتەپتىڭ قاسبەتى ءتۇسىنىڭ قانداي بولاتىنىن ناقتىلاپ بەرىپ, سول سياقتى تاڭدالعان ىشكى ەسىكتەرىن, جارىق شامدارى مەن ەدەن توسەنىشتەرىن كورىپ, ماقۇلدادى.
وسى ءۇش نىساننىڭ دا سالىنىپ بىتەتىن مەرزىمى شىلدە ايى دەپ جوسپارلانىپ وتىر. ءبىلىم كۇنىندە بۇل ءبىلىم وشاقتارى ءوزىنىڭ العاشقى تاربيەلەنۋشىلەرىن قابىلداماق.
سونداي-اق ءوڭىر باسشىسى تالدىقورعان قالاسىنىڭ اۋماعىندا سالىنىپ جاتقان كوتتەدج قالاشىعىن دا نازاردان تىس قالدىرمادى. وندا قازىر ءتورت بولمەلى 48 پاتەردەن تۇراتىن, جالپى الاڭى 5,8 مىڭ شارشى مەتر بولاتىن 12 كوتتەدج عيماراتى سالىنىپ جاتىر. ارالاۋ بارىسىندا ايتىلعانداي, جىل سوڭىنا دەيىن جالپى قۇنى 2,4 ملرد تەڭگە بولاتىن 202 پاتەرلى 166 كوتتەدج تۇرعىزۋ كوزدەلگەن. وبلىس باسشىسى اماندىق باتالوۆ كوتتەدجدى قالاشىق اۋماعىندا شام باعانالارىن اۋىستىرۋدى ەسكەرتتى. وسى ارالاۋ بارىسىندا اكىم بيىلعى جىلدىڭ قىركۇيەك ايىندا پايدالانۋعا بەرىلەتىن جاڭا دراما تەاترىنا دا سوعىپ, ارلەۋ جۇمىستارىنىڭ بارىسىن كوردى.
سونداي-اق بۇل كۇنى تالدىقورعان قالاسىنىڭ اكىمدىگى وبلىس باسشىسىنا تۇرمىستىق قاتتى قالدىقتاردى سۇرىپتاپ جيناۋعا ارنالعان قوقىس جاشىكتەرىنىڭ زاماناۋي ۇلگىلەرىن تانىستىردى. ازىرگە «قاراتال» شاعىن اۋدانىنداعى الاڭداردىڭ بىرىنە 2 زاماناۋي قوقىس جاشىگى قويىلعان. ونىڭ بىرىنە پلاستيك, شىنى, مەتالل, قاعاز, پوليەتيلەن, اعاش سياقتى قۇرعاق قوقىس جينالسا, ەكىنشىسىنە دىمقىل, ياعني ورگانيكالىق جانە تاعام قالدىقتارى سالىنادى. مامىر ايىندا قالا بويىنشا قويىلاتىن وسىنداي قوقىس جينايتىن ورىنداردىڭ سانى ءجۇز ەلۋگە جەتپەك. اماندىق باتالوۆ جاڭا كونتەينەرلەردى ورناتۋمەن قاتار قۇرعاق جانە دىمقىل قالدىقتار دەپ سۇرىپتاپ تاستاۋ قاجەتتىگىن تۇرعىندارعا ءتۇسىندىرۋ كەرەكتىگىن ايتتى.
نىسانداردى ارالاۋدان كەيىن وبلىس اكىمى سالىنىپ جاتقان ءاربىر نىساننىڭ ەڭ الدىمەن ساپاسىنا باسا نازار اۋدارۋ قاجەتتىگىن, ۇساق-تۇيەككە دەيىن ەرەكشە ءمان بەرۋدى تاپسىردى.
– تۇرعىزىلىپ جاتقان نىسانداردىڭ اينالاسىن كوركەيتۋ جۇمىستارى نازاردان تىس قالماۋى كەرەك, سول سياقتى شاعىن ساۋلەتتىك فورمالار ورناتىلۋى ءتيىس, جانە ولاردىڭ ارقايسىسى جاڭا نىساندى تولىقتىرىپ, ايشىقتاپ, اشىپ تۇراتىنداي بولۋى قاجەت, – دەدى اماندىق باتالوۆ.
قالماحانبەت مۇقامەتقالي,
«ەگەمەن قازاقستان»
الماتى وبلىسى
