قانات بوزىمباەۆتىڭ ايتۋىنشا, 4-مۇناي زاۋىتىنىڭ قۇرىلىسىنا قاتىستى ناقتى شەشىم 2018 جىلدىڭ ەكىنشى جارتىسىندا قابىلدانادى.
«مەملەكەت باسشىسىنىڭ تاپسىرماسىنا سايكەس 4 مۇناي وڭدەۋ زاۋىتىنىڭ قۇرىلىسىنا قاتىستى ماسەلە پىسىقتالىپ جاتىر. جۇرگىزىلگەن ساراپتاما تۇتىنۋدىڭ بولجامدى ءوسىمىن ەسكەرگەندە اۆتوموبيل بەنزينىنە تاپشىلىق 2021-2023 جىلدارى ارالىعىندا, ديزەل وتىنىنا 2023 جىلى جانە اۆياكەروسينگە 2026 جىلدان كەيىن قالىپتاساتىندىعىن كورسەتىپ وتىر», - دەدى قانات بوزىمباەۆ. ونىڭ ايتۋىنشا, ەنەرگەتيكا مينيسترلىگىنىڭ باسشىلىعىمەن «قازمۇنايگاز» ۇلتتىق كومپانياسى 2018 جىلدىڭ ەكىنشى جارتىجىلدىعىندا 4-ءشى مۇناي وڭدەۋ زاۋىتىنىڭ الدىن الا تەحنيكالىق-ەكونوميكالىق نەگىزدەمەسىن ازىرلەيتىن بولادى.
«ەىنشى جارتىجىلدىقتا قۇرىلىستىڭ جۇرگىزىلۋ مۇمكىندىگى, ورنالاساتىن ورنى جانە زاۋىتتىڭ قۋاتى تۋرالى ناقتى شەشىم قابىلدانادى», - دەدى مينيستر. سونىمەن قاتار قانات بوزىمباەۆ 2018 جىلدىڭ ەكىنشى جارتىجىلدىعىندا جانار-جاعارماي ونىمدەرىن ەكسپورتقا شىعارۋعا مۇمكىندىك تۋاتىنىن ايتتى.
«2017 جىلدىڭ باستى وقيعاسى پاۆلودار مەن اتىراۋ مۇناي وڭدەۋ زاۋىتتارىن رەكونسترۋكتسيالاۋ جانە جاڭعىرتۋ جوبالارىنىڭ اياقتالۋى بولدى. 2018 جىلى شىمكەنت مۇناي وڭدەۋ زاۋىتىن جاڭعىرتۋدى اياقتاۋ جوسپارلانعان. 2018 جىلى مۇناي وڭدەۋ كولەمى 1,1 ملن تونناعا ارتىپ, 16 ملن توننانى قۇرايتىن بولادى», - دەدى مينيستر. ونىڭ ايتۋىنشا, ەلىمىزدىڭ جاڭعىرتىلعان بارلىق مۇناي وڭدەۋ زاۋىتتارى جوبالىق قۋاتىنا شىققاننان كەيىن 2018 جىلدىڭ ەكىنشى جارتىجىلدىعىنان باستاپ ىشكى نارىق مۇناي ونىمدەرىمەن قامتاماسىز ەتىلەدى. بەنزينگە, ديزەل وتىنىنا جانە اۆياكەروسينگە تاۋەلدىلىك جويىلادى. تەرەڭ قايتا وڭدەۋ كولەمى 63-تەن 83 پايىزعا دەيىن ارتادى. ك4 جانە ك5 ەكولوگيادىق ساناتىنداعى ونىمدەر شىعارىلادى جانە جانار-جاعارمايدى ەكسپورتقا شىعارۋ مۇمكىندىگى تۋادى.
«ىشكى نارىقتا وتاندىق جانار-جاعارمايمەن قامتاماسىز ەتۋ بەنزين بويىنشا 90, ديزەل وتىنى بويىنشا 90 جانە اۆياكەروسين بويىنشا 70 پايىزدى قۇرايتىن بولادى», - دەدى ول.
سونداي-اق قانات بوزىمباەۆ قازاقستان بەنزين باعاسى ارزان ەلدەردىڭ رەيتينگىندە 15-ءشى ورىندا تۇرعانىن ايتىپ ءوتتى.
«Global petroleum prices» حالىقارالىق اگەنتتىگى الەمدەگى جانار-جاعارماي باعاسى ەڭ ارزان ەلدەردىڭ رەيتينگىسىن جاسايدى. اتالعان رەيتينگتى جاساۋ ءۇشىن جوعارى وكتاندى بەنزين مەن ديزەل وتىننىڭ باعاسىن پايدالانادى. اتالعان رەيتينگتە 167 ەلدىڭ دەرەكتەرى قولدانىلادى. 2018 جىلى 19 اقپاندا جاريالانعان رەيتينگتە بىرقاتار مەملەكەت اراسىندا ەڭ ارزان بەنيزين بويىنشا قازاقستان 15-ءشى ورىندا تۇر», - دەدى مينيستر. ونىڭ دەرەگىنشە, ەلىمىزدە 1 ليتر بەنزيننىڭ باعاسى 56 تسەنتتى قۇراسا, الەمدە 1 ليتر بەنزيننىڭ ورتاشا باعاسى - 1 دوللار 15 تسەنت. ەڭ ارزان بەنزين ۆەنەسۋەلادا, 1 ءليترى 10 تسەنتكە تەڭ. ال ەڭ قىمبات بەنزين 2 دوللار 10 تسەنت كولەمىندە يسلانديادا تىركەلگەن.
«اتالعان رەيتينگتە قازاقستان ديزەل وتىنىنىڭ باعاسى بويىنشا 14-ءشى ورىندا تۇر. بىزدەگى ديزەل وتىننىڭ باعاسى - 50 تسەنت. الەمدەگى ديزەلدىك وتىننىڭ ورتاشا باعاسى - 1 دوللار 04 تسەنت. تمد ەلدەرى بويىنشا سالىستىرار بولساق, وندا بىزگە قاراعاندا ەڭ ارزان بەنزين تۇرىكمەنستاندا 0,43 تسەنتتى قۇرايدى. ديزەل وتىنى دا تۇرىكمەنستاندا جانە ازەربايجاندا بىزدەن ارزان», - دەدى قانات بوزىمباەۆ. ونىڭ ايتۋىنشا, 2018 جىلعى مۇناي ءوندىرۋ جوسپارى 87 ملن توننانى قۇرايدى.
«2017 جىلى 86,2 ملن توننا مۇناي ءوندىرىلىپ, 2016 جىلعى دەڭگەيدەن 105 پايىزعا ءوسىم كورسەتتى. ءوندىرۋدىڭ ەڭ جوعارى كولەمى اتىراۋ مەن ماڭعىستاۋ وبلىستارىمەن قامتاماسىز ەتىلدى. 2018 جىلعى مۇناي ءوندىرۋ جوسپارى 87 ملن توننانى قۇرايدى», - دەدى مينيستر. ونىڭ اتاپ وتۋىنشە, 2017 جىلى مۇناي ءوندىرۋ كولەمىنىڭ وسىمىنە قاشاعان, تەڭىز جانە قاراشىعاناق كەن ورىندارىنداعى تۇراقتى ەسەلەنۋمەن بايلانىستى. 2018 جىلى دا قاشاعان ەسەبىنەن نەگىزگى ءوسىم بولادى دەپ كۇتىلۋدە.
«قاشاعاننان مۇناي ءوندىرۋ جوسپارى 11 ملن توننانى قۇرايدى. بۇل رەتتە قىزىلوردا مەن اقتوبە وبلىستارىنداعى كەن ورىنداردا ءوندىرۋ كولەمىنىڭ تومەندەيتىندىگى كۇتىلۋدە. بۇل اتالعان كەن ورىندارىنىڭ تابيعي توزۋىمەن ازىرلەمەلەر كەزەڭىنىڭ كەش باستالۋىمەن بايلانىستى», - دەپ ءتۇسىندىردى ول. مينيستر دەرەگىنشە, 2017 جىلى 69,8 ملن توننا مۇناي ەكسپورتقا شىعارىلدى.
«2016 جىلى Brent ماركالى مۇنايدىڭ ورتاشا باعاسى 45, 2017 جىلى شامامەن 54 دوللاردى قۇرادى. 2018 جىلعى بولجام باررەلىنە شامامەن 55-60 دوللار بولادى دەپ كۇتىلۋدە. 2017 جىلدىڭ 30 قاراشاسىندا وپەك+ قاتىسۋشىلارىنىڭ كەڭەسىندە 2018 جىلدىڭ سوڭىنا دەيىن مۇناي وندىرۋگە قويىلعان شەكتەۋدى سوزۋعا ۋاعدالاستى», - دەدى قانات بوزىمباەۆ.
