- استاناداعى ويىننان كەيىن «سپورتينگ» ساپىنان كىمدى ەرەكشە اتاپ وتەر ەدىڭىز؟
- مەن جەكەلەي ويىنشىلاردى ەمەس, كوماندانىڭ ويىنىنا باسا ءمان بەرەمىن. «سپورتينگ» قۇرامىندا مىقتى ويىنشىلار جەتەرلىك. پورتۋگاليالىق ۇجىم ساپىندا ويىن تاعدىرىن شەشىپ كەتە الاتىن بىرنەشە ويىنشى بار.
- قازاقستانداعى ايازدان كەيىن, پورتۋگالياداعى اۋا تەمپەراتۋراسىنا بەيىمدەلىپ ۇلگەردىڭىزدەر مە؟
- ءبىز دۋبايدا ءدال وسىنداي اۋا رايىندا دايىندالدىق. كوماندا ءدال قازىر جاقسى دايىندالىپ جاتىر. ءبىزدى كۇتىپ الىپ, جاتتىعۋ جۇمىستارىنا بارىنشا جاقسى جاعداي جاساعان ۇيىمداستىرۋشىلارعا ەرەكشە العىس بىلدىرەمىن.
- ستانيمير, ءبىرىنشى ويىندا يۋري لوگۆينەنكو قىزىل قاعاز الىپ قالدى. بۇل ويىنشىلاردان بولەك, ەرتەڭگى كەزدەسۋدە الاڭعا شىعا المايتىن نەمەسە جاراقاتى بار قانداي ويىنشىلار بار؟ جالپى كوماندانىڭ وسى ويىنعا دايىندىعى قالاي؟
- كوماندا قۇرامىندا بىرنەشە ماسەلەلەر بار. ءيۋريدىڭ الاڭعا شىقپايتىنى تۇسىنىكتى. جانە دە سەرىكجان مۋجيكوۆ الاڭعا شىعا المايدى. ءبىز ونىڭ دەنساۋلىعىنا الاڭداعاندىقتان, ەرتەڭگى كەزدەسۋدە الاڭعا شىعارۋدى ءجون سانامايمىز. ودان بولەك, كوماندا قۇرامىندا ەۋروپا ليگاسىنىڭ تىزىمىنە ىلىنبەگەن فۋتبولشىلار بار. كوماندا قۇرامىندا ءبىرىنشى كەزدەسۋمەن سالىستىرعاندا ايتارلىقتاي وزگەرىستەر ورىن المايدى. تەك قورعانىستا وزگەرىس بولادى. ال كوماندانىڭ دايىندىعىنا كەلەر بولساق, ەرتەڭگى كەزدەسۋدە ۇيىمداسقان ويىن كورسەتۋگە تىرىسامىز. ويىننىڭ قيىن بولاتىندىعىنا قاراماستان, ەۋروپا ليگاسىنىڭ 1/16 فينالىنا ساي كەلەتىن, «استانا» كومانداسىنا ءتان ويىن ورنەگىن كورسەتەمىز.
- «سپورتينگ» كومانداسى ەكى كۇن بۇرىن ىشكى بىرىنشىلىكتە وتە قيىن وتكىزدى. بۇگىنگى ءباسپاسوز جيىنىندا «سپورتينگ» كومانداسىنىڭ باس باپكەرى ەرتەڭگى ماتچتا جەڭىسكە جەتۋدىڭ اسا ماڭىزدى ەمەس ەكەندىگىن تىلگە تيەك ەتتى. وسى تۇرعىدان العاندا, بۇل جاعداي ءسىزدىڭ كومانداعا قول بولا الا ما؟
- «سپورتينگ» ساپىندا الاڭعا شىعىپ, وزدەرىن دالەلدەيتىن ويىنشىلار جەتەرلىك. ءبىزدىڭ ويىنداعى كەز كەلگەن قاتەلىگىمىز, جەڭىلىسكە اكەلەتىندىگى انىق. ءبىرىنشى ويىنداعى قارسىلاس سوققان گولدار ءبىزلدىڭ قاتەلىگىمىزدەن كىردى. سوندىقتان, ەرتەڭگى كەزدەسۋدە بارىنشا ساق ويناپ, ءوز ويىنىمىزدى كورسەتۋىمىز قاجەت.
- ەرتەڭ, «استانا» كومانداسىنىڭ باس باپكەرى رەتىندە ءسىزدىڭ سوڭعى ويىنىڭىز بولۋى مۇمكىن بە؟
- مەن قازىر «استانا» كومانداسىنىڭ باس باپكەرىمىن. سوندىقتان, ويىن الدىندا ارتىق ەشتەڭە ايتقىم كەلمەيدى. مەنىڭ كومناداداعى ورنىم تۋرالى, ەلگە جەتكەن سوڭ سويلەسەتىن بولامىز. ءبىزدىڭ بار ويىمىز ەرتەڭگى كەزدەسۋدە.
- استاناداعى كەزدەسۋ اياقتالعاننان كەيىن, «سپورتينگ» كومانداسىنى تۆيتتەردەگى پاراقشاسى «بورات» تۋرالى جازعان بولاتىن. وسى تۋرالى نە ايتاسىز؟
- مەن شىنى كەرەك ونى وقىمادىم. سوندىقتان, بۇل جاعداي تۋرالى ارتىق ەشتەڭە ايتا المايمىن. «سپورتينگ» ەۋروپانىڭ مىقتى كوماندالارىنىڭ ءبىرى. «استانا» كومانداسىنىڭ وسى كۇنگە دەيىن ەۋروپا ليگاسىنداعى جەتكەن جەتىستىگى لايىقتى دەپ سەنىممەن ايتا الامىن. ەگەر, ءدال وسىنداي جاعداي ورىن العان بولسا, «سپورتينگ» تاراپى ءبىزدىڭ كلۋبتان كەشىرىم سۇراعاندارى ءجون.
ەرمۇحامەد ماۋلەن
«ەگەمەن قازاقستان»
