وتىرىستا ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆانىڭ تانىستىرۋىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوشى-قونى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى ءبىرىنشى وقىلىمدا تالقىلاندى.
زاڭ جوباسى مەملەكەت باسشىسىنىڭ 2017 جىلعى 31 قاڭتارداعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا, سونداي-اق بىرىڭعاي ەلەكتروندىق ەڭبەك بيرجاسىن تولىق اۋقىمدى ەنگىزۋگە قاتىستى ەلباسىنىڭ 2018 جىلعى 10 قاڭتارداعى ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا بەرگەن تاپسىرمالارىنا سايكەس ازىرلەنگەن.
ەڭبەك جانە حالىقتى الەۋمەتتىك قورعاۋ ءمينيسترى م.ابىلقاسىموۆا زاڭ جوباسىنا ءۇش وزگەرىس ەنگىزۋدى ۇسىندى. ءبىرىنشى, حالىقتى جۇمىسپەن قامتۋ قۇرالدارىن جەتىلدىرۋ قاجەت. وسىعان ساي, جۇمىسسىز ازامات وزىنە ۇسىنىلعان قىزمەتكە كەلىسىپ, كەلىسپەيتىندىگى جونىندەگى مالىمەتتى ۇيالى تەلەفون نەمەسە ەلەكتروندى پوشتا ارقىلى ءۇش كۇن ىشىندە حابارلاي الادى.
«زاڭ جوباسىندا ءۇش كودەكسكە, بەس زاڭعا وزگەرىستەر مەن تولىقتىرۋلار ەنگىزۋ كوزدەلىپ وتىر. جۇمىسپەن قامتۋعا جۇگىنۋ راسىمدەرى جەڭىلدەتىلەدى. جۇمىس ىزدەۋشىلەر ەندى جۇمىسپەن قامتۋ ورتالىقتارىنا «ەلەكتروندىق ۇكىمەت» ۆەب-پورتالىمەن عانا ەمەس, سونىمەن حقكو-لار ارقىلى جۇگىنە الادى», دەدى م.ابىلقاسىموۆا.
ۆەدومستۆو باسشىسىنىڭ دەرەكتەرىنە سۇيەنسەك, جاڭا زاڭ جوباسى اياسىندا مەملەكەتتىك جانە ۇكىمەتتىك باعدارلامالار اياسىنداعى قۇرىلاتىن بوس جۇمىس ورىندارىنا مونيتورينگ جۇرگىزۋ قۇزىرەتى ورتالىق جانە جەرگىلىكتى اتقارۋشى ورگاندارعا بەرىلمەك. ەڭبەك مينيسترلىگىنىڭ قۇزىرەتى بوس جۇمىس ورىندارى تۋرالى اقپارات ۇسىنۋ مەن وعان مونيتورينگ جۇرگىزۋ قاعيداسىن بەكىتۋمەن تولىقتىرىلادى.
سونىمەن قاتار ستۋدەنتتەر مەن جوعارعى سىنىپ وقۋشىلارى جازعى دەمالىس كەزىندە عانا ەمەس, وقۋدان تىس ۋاقىتتا قوعامدىق جۇمىستارعا اتسالىسۋعا مۇمكىندىك تۋادى. مينيستر قولدانىستاعى ەرەجەلەرگە سايكەس, قوعامدىق جۇمىستارعا بارۋعا نيەتتىلەر ساناۋلى انىقتاما ۇسىنۋى ءتيىس ەكەنىن اتاپ ءوتتى.
ەكىنشىدەن, مەملەكەت باسشىسىنىڭ تاپسىرماسىن ورىنداۋ ءۇشىن زاڭ جوباسىندا جۇمىسپەن قامتۋ ورتالىقتارىن رەفورمالاۋ جانە بارلىق بوس جۇمىس ورىندارى مەن بارشا ەلدى مەكەندەر بويىنشا بىرىڭعاي ونلاين الاڭ قۇرۋ كوزدەلگەن. سوعان سايكەس, ەڭبەك نارىعىنىڭ بىرىڭعاي اقپاراتتىق بازاسىن قۇرايتىن «ەلەكتروندى ەڭبەك بيرجاسى» جاسالاتىنىن دا اتاپ ءوتتى.
ءۇشىنشى, مەملەكەت باسشىسىنىڭ جارلىعىنا سايكەس كوشى-قون سالاسىنداعى فۋنكتسيالاردى ءبولۋ كوزدەلەدى. ۇجىمدىق شارتتاردىڭ مەرزىمىن جاڭا ۇجىمدىق شارت قابىلداعانشا, ءبىر جىلعا دەيىن ۇزارتۋ, مەديتسينا قىزمەتكەرلەرىنىڭ قوسا جۇمىس اتقارۋىنا جانە ورالمان مارتەبەسىنىڭ مەرزىمىن ءۇش ايعا ۇزارتۋعا رۇقسات بەرۋ, ستۋدەنتتەر مەن جوعارى سىنىپتار وقۋشىلارىنىڭ قوعامدىق جۇمىستارعا قاتىسۋ قۇقىقتارىن كەڭەيتۋ سياقتى الەۋمەتتىك تۇرعىدان ماڭىزدى نورمالار بار.
وتىرىستا دەپۋتاتتار اراسىندا زاڭ جوباسىندا جەكە جۇمىسپەن قامتۋ اگەنتتىكتەرىنىڭ قارجىلاندىرۋ تەتىكتەرى جانە بولىنگەن بيۋدجەت قاراجاتىن يگەرۋدىڭ تيىمدىلىگىن باقىلاۋ تۋرالى ماسەلە تۋىندادى. بۇعان بايلانىستى ءسوز سويلەگەن ءماجىلىس توراعاسى نۇرلان نىعماتۋلين ازاماتتاردى جۇمىسپەن قامتۋعا ارنالعان مەملەكەت قارجىسى ءتيىمدى جۇمسالۋى كەرەكتىگىنە نازار اۋداردى.
بۇدان كەيىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا قارالدى.
زاڭ جوباسى تۋرالى اگرارلىق ماسەلەلەر كوميتەتىنىڭ مۇشەسى بەرىك وسپانوۆ بايانداما جاسادى. ونىڭ سوزىنە سۇيەنسەك, جارعىلىق كاپيتالىندا شەتەلدىكتەردىڭ نە شەتەلدىك زاڭدى تۇلعالاردىڭ ۇلەسى بار بىرلەسكەن كاسىپورىندارعا اۋىل شارۋاشىلىعى جەرلەرىن جالعا بەرۋگە ءموراتوريدىڭ قولدانىلۋى كەڭەيتىلەدى. وسىعان سايكەس, ەندى جەر شەتەلدىكتەرگە جالعا بەرىلمەيدى.
«اۋىل شارۋاشىلىعى ماقساتىنداعى جەرلەر 2021 جىلعى 31 جەلتوقسانعا دەيىن شەتەلدىكتەرگە جالعا بەرىلمەيدى جانە بارلىق جەكە جانە زاڭدى تۇلعالاردىڭ جەكە مەنشىگىنە وتپەيدى. تيىسىنشە رەسپۋبليكامىزدىڭ ازاماتتارىنا جانە شەتەلدىكتەر قاتىسپايتىن زاڭدى تۇلعالارعا اۋىل شارۋاشىلىعى ماقساتىنداعى جەرلەر ۋاقىتشا جەر پايدالانۋ قۇقىعىمەن عانا ۇسىنىلادى», دەدى ب.وسپانوۆ.
سونىمەن قاتار زاڭ جوباسى اۋىل شارۋاشىلىعى جەرلەرىن جالعا الۋ ينستيتۋتىن ودان ءارى جەتىلدىرۋگە باعىتتالعان. ول ءۇشىن جالعا بەرۋ ءتارتىبىن كونكۋرستىق نەگىزدە ەگجەي-تەگجەيلى رەگلامەنتتەيتىن نورمالار ەنگىزىلىپ وتىر. كونكۋرستاردى وتكىزۋدىڭ اشىقتىعىن قامتاماسىز ەتۋ ءۇشىن جەر كوميسسياسىنىڭ قۇرامىنا مەملەكەتتىك ورگانداردىڭ وكىلدەرىنەن بولەك, قوعام قايراتكەرلەرى دە كىرەدى.
«تۇراقتى مونيتورينگ ەنگىزۋ ارقىلى اۋىل شارۋاشىلىعى جەرلەرىنىڭ قولدانىلۋىن باقىلاۋدى كۇشەيتۋ كوزدەلگەن. بۇل شارالار اۋىل شارۋاشىلىعى ماقساتىنداعى جەرلەردى ءتيىمدى ءارى ۇتىمدى پايدالانۋعا, بوس جاتقان جەرلەردى ۋاقتىلى انىقتاۋعا جانە ولاردى شارۋاشىلىققا تارتۋعا, ونى رەتتەۋدە قوعامدىق باقىلاۋ ءرولىن ارتتىرۋعا مۇمكىندىك بەرەدى. سونىمەن بىرگە, تۇراقتى مونيتورينگ جۇرگىزۋ جاۋاپتىلىق دەڭگەيىن دە ارتتىرادى», دەدى دەپۋتات.
جەرگە قاتىستى زاڭ ءبىر اۋىزدان ماقۇلدانىپ, سەناتقا جولداندى. وتىرىس سوڭىندا ءماجىلىس دەپۋتاتتارى بىرقاتار ورتالىق مەملەكەتتىك ورگان باسشىلارىنىڭ اتىنا دەپۋتاتتىق ساۋالدار جولدادى.
اباي اسانكەلدى ۇلى,
«ەگەمەن قازاقستان»
