دوڭگەلەك ۇستەل فورماتىندا ۇيىمداستىرىلعان باسقوسۋعا رەسپۋبليكالىق عىلىمي-پراكتيكالىق ورتالىق باسشىلارى, «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ ماماندارى مەن جوعارى وقۋ ورىندارىنىڭ پروفەسسور-وقىتۋشىلارى قاتىستى.
قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ وقۋ جانە تاربيە ىستەرى جونىندەگى پرورەكتورى اباي قۇرمانقۇلوۆ رەكتور گاۋحار الدامبەرگەنوۆانىڭ شاراعا قاتىسۋشىلارعا جولداعان قۇتتىقتاۋ حاتىن وقىپ بەردى.
– قازاقستاندا پەداگوگيكالىق كادرلاردىڭ قالىڭ شوعىرىن دايىنداۋعا سۇبەلى ۇلەس قوسىپ كەلە جاتقان ۇلاعات ۇياسى – قازاق مەملەكەتتىك قىزدار پەداگوگيكالىق ۋنيۆەرسيتەتىنە قوش كەلىپسىزدەر! ەلىمىز وركەنيەتكە قاراي ونەگەلى جولمەن دامۋدىڭ جاڭا ونەركاسىپتىك كەزەڭىنە قادام باستى. بۇل قازاقستان پرەزيدەنتى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى بيىلعى جولداۋىنا باستى ارقاۋ بولدى. ەلباسى جاريالاعان باسىمدىقتار مەن مىندەتتەر قازاقستاننىڭ الەۋمەتتىك-ەكونوميكالىق جانە تەحنولوگيالىق تۇرعىدا جاڭعىرتۋدىڭ لوگيكالىق جالعاسى ىسپەتتەس. جولداۋدا ءبىزدى ءبىلىم بەرۋدىڭ جاڭا ساپاسىنا كوتەرەتىن جاڭعىرۋدىڭ نەگىزى رەتىندەگى ادام كاپيتالى بولاتىنىن اتاپ كورسەتەدى. ادامي كاپيتالدىڭ ساپاسىن ارتتىرۋ – مەملەكەت دامۋىن قامتاماسىز ەتۋدىڭ نەگىزگى العىشارتى. قوعامنىڭ زياتكەرلىك الەۋەتىن ىلگەرىلەتۋدى جۇزەگە اسىرۋ پەداگوگ كادرلارعا تىكەلەي بايلانىستى. وتاندىق جوعارى وقۋ ورىندارى وي-ءورىسى دامىعان, تالانتتى, زەردەلى جانە ۇلتجاندى ۇستاز دايىنداۋدى ودان ارمەن جاڭا دەڭگەيگە كوتەرە ءتۇسۋ قاجەت. وسى ورايدا بۇگىنگىدەي جيىنداردىڭ ماڭىزى ايرىقشا ەكەنىن اتاپ وتكىم كەلەدى, – دەلىنگەن قۇتتىقتاۋ حاتتا.
جيىن بارىسىندا «مەكتەپكە دەيىنگى بالالىق شاق» رەسپۋبليكالىق ورتالىعىنىڭ ديرەكتورى بيجان يگەمباەۆ, اقپاراتتىق تالداۋ ورتالىعى اكتسيونەرلىك قوعامى پرەزيدەنتىنىڭ ورىنباسارى ەلدوس نۇرلانوۆ, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پەداگوگيكا جانە پسيحولوگيا فاكۋلتەتىنىڭ دەكانى سايرا جيەنباەۆا, «ەركەم-اي» بالاباقشاسى مەن «دانا» مەكتەبىنىڭ قۇرىلتايشىسى, مەكتەپكە دەيىنگى تاربيە مەن ءبىلىم بەرۋ ۇيىمدارىنىڭ الماتى قالاسى مەن الماتى وبلىسى بويىنشا قاۋىمداستىعىنىڭ ءتورايىمى كۇلاندا باتىربەكوۆا جانە الماتى قالاسى, جەتىسۋ اۋدانىنداعى №51 بوبەكجاي-بالاباقشاسىنىڭ مەڭگەرۋشىسى فاريدا وماربەكوۆا تاقىرىپقا بايلانىستى بايانداما جاسادى.
دوڭگەلەك ۇستەلدە ءسوز العانداردىڭ ايتۋىنشا, قازىرگى كۇندە مەكتەپكە دەيىنگى ۇيىمدارداعى پەداگوگ ماماندارعا دەگەن سۇرانىس 22 مىڭ 400 ادامدى قۇراپ وتىر.
– قىزدار ۋنيۆەرسيتەتى «مەكتەپكە دەيىنگى وقىتۋ جانە تاربيەلەۋ» ماماندىعى بويىنشا باكالاۆر, ماگيستراتۋرا جانە دوكتورانتۋرا دەڭگەيلەرى بويىنشا مامان دايارلايدى. بۇگىنگى ستۋدەنت ەرتەڭگى مامان ەكەنىن ەسكەرسەك, ەلىمىزدىڭ وركەنيەتكە باستار جولدىڭ باستاۋى – مەكتەپكە دەيىنگى ۇيىم جانە ونىڭ باستى تۇلعاسى پەداگوگتارعا جاڭا تالاپتار قويىلۋدا. سەبەبى, قازىرگى يننوۆاتسيالىق باعىتتاعى مەكتەپكە دەيىنگى ۇيىم پەداگوگى تيۋتور ءرولىن اتقارىپ, دامىعان ورتادا ءومىر سۇرۋگە قابىلەتتى, ءوزىن-ءوزى دامىتۋعا, ءوز ويىن ەركىن ايتاتىن, شىعارماشىل تۇلعانى تاربيەلەي الاتىن پەداگوگيكالىق قۇزىرەتتىلىگى بولۋى شارت, – دەيدى پەداگوگيكا جانە پسيحولوگيا فاكۋلتەتىنىڭ دەكانى سايرا جيەنباەۆا.
ونىڭ ايتۋىنشا, بۇگىندە ۋنيۆەرسيتەتتە «مەكتەپكە دەيىنگى ۇيىم مەنەدجەرى» قوسىمشا ءبىلىم بەرۋ باعدارلاماسى بويىنشا 3 ايلىق كۋرستان مامانداندىرۋ جۇرگىزىلۋدە. سونىمەن قاتار, وقۋ ورنىندا مەكتەپكە دەيىنگى ۇيىم تاربيەشىلەرىنە, ادىسكەرلەرىنە, جوعارى وقۋ ورىندارى وقىتۋشىلارىنا ارنالعان ەڭ قاجەتتى, ۇلكەن سۇرانىسقا يە جوعارى يننوۆاتسيالىق باعىتتاعى بىلىكتىلىكتى كوتەرۋ كۋرستارى اشىلۋدا.
بولاشاقتا قىزدار ۋنيۆەرسيتەتىنىڭ جانىنان زامانعا ساي بالاباقشا اشىپ, وندا دۋالدىق ءبىلىم بەرۋ ەلەمەنتتەرىن ەنگىزۋدى جالعاستىرىلماق. سونداي-اق, الداعى ۋاقىتتا «مەكتەپكە دەيىنگى وقىتۋ جانە تاربيەلەۋ», «باستاۋىش مەكتەپتە وقىتۋدىڭ پەداگوگيكاسى مەن ادىستەمەسى» ماماندىقتارى بويىنشا اعىلشىن تىلىندە دايارلايتىن پەداگوگيكالىق كوللەدج اشۋ جوسپارلانىپ وتىر. اتالعان ماماندىقتار بويىنشا دوكتورانتۋرا جانە ديسسەرتاتسيالىق كەڭەس اشۋ دا جوسپاردا بار.
جيىن اياسىندا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ پروفەسسور-وقىتۋشىلارىنىڭ عىلىمي ەڭبەكتەرىنە ارنالعان كىتاپ كورمەسى كوپشىلىك نازارىنا ۇسىنىلدى.
