اقتوبە وبلىسى اكىمىنىڭ اپپارات جەتەكشىسى قىزمەتىن اتقارعان التىنبەك امىرعاليەۆ 30 قاڭتار كۇنى وبلىستىق كاسىپوداق توراعاسى بولىپ تاعايىندالعان ەدى. ارادا 20 كۇن وتكەندە اقتوبە وبلىسىنىڭ اكىمى بەردىبەك ساپارباەۆ وكىمىمەن, پرەزيدەنت اكىمشىلىگىنىڭ كەلىسىمىمەن جاڭا لاۋازىمدىق قىزمەتكە نۇرجاۋعان قالاۋوۆ تاعايىندالدى.
جاڭا باسشى ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىن تاريح ءپانىنىڭ مۇعالىمى, ورتا ازيالىق ۋنيۆەرسيتەتىن ەكونوميست ماماندىقتارى بويىنشا تامامداعان. ەڭبەك جولىن 1993 جىلى تەمىر اۋدانىنىڭ تاسقوپا اۋىلىنا قاراستى تەرەكتى سوۆحوزىنىڭ جۇمىسشىسى بولىپ باستاعان.
اقتوبە وبلىسى اكىمىنىڭ ءباسپاسوز قىزمەتىنىڭ حابارلاۋىنشا, ول 1998-2004 جىلدارى تەمىر اۋدانىنىڭ التىقاراسۋ اۋىلىنداعى التىقاراسۋ ورتا مەكتەبىندە تاريح ءپانىنىڭ مۇعالىمى, تەمىر اۋداندىق ءبىلىم بەرۋ ءبولىمىنىڭ ادىسكەرى, تەمىر اۋدانى اكىمى اپپاراتىنىڭ الەۋمەتتىك سالا جانە مادەني دامۋ ءبولىمىنىڭ باسشىسى قىزمەتتەرىن اتقارعان. ال 2004-2006 جىلدارى تەمىر اۋدانى اكىمىنىڭ كومەكشىسى, كەيىن تەمىر اۋدانى اكىمى اپپاراتىنىڭ جالپى ءبولىمىنىڭ باسشىسى بولىپ ەڭبەك ەتتى. سونىمەن قاتار,تەمىر اۋداندىق تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى, شۇبارقۇدىق كەنتى وكرۋگىنىڭ اكىمى, تەمىر اۋدانى اكىمىنىڭ ورىنباسارى قىزمەتتەرىن اتقارعان. 2015 جىلدىڭ اقپان ايىنان بۇگىنگى كۇنگە دەيىن اقتوبە وبلىسى مارتوك اۋدانىنىڭ اكىمى بولىپ قىزمەت ەتتى.
