تاراپتار ەكىجاقتى قارىم-قاتىناستى نىعايتۋدىڭ وزەكتى سۇراقتارىن تالقىلادى.
ن. نىعماتۋلين اتاپ وتكەندەي, فرانتسيامەن جان-جاقتى جانە ءوزارا ءتيىمدى بايلانىستى نىعايتۋ قازاقستاننىڭ سىرتقى ساياساتىنداعى باسىم باعىتتاردىڭ ءبىرى. وتكەن جىلى ەكى ەل اراسىندا ديپلوماتيالىق بايلانىستىڭ ورناعانىنا 25 جىل تولسا, بيىلعى جىلى قازاقستان مەن فرانتسيا اراسىندا ستراتەگيالىق ارىپتەستىك تۋرالى شارتقا قول قويىلعانىنا 10 جىل تولىپ وتىر. وسى ۋاقىت ىشىندە سەنىمدى ساياسي ۇنقاتىسۋمەن قاتار, ءتۇرلى باعىتتاردا ءوزارا ءىس-قيمىل تابىستى دامىپ كەلەدى.
ءماجىلىس توراعاسى ەۋرووداق ءبىزدىڭ ەلىمىزدىڭ ماڭىزدى سىرتقى ساياسي جانە ءىرى ساۋدا ارىپتەسى ەكەنىن العا تارتا كەلىپ, الداعى ۋاقىتتا ەلدەرىمىز قازاقستان مەن اتالعان وداق اراسىنداعى كەڭەيتىلگەن ارىپتەستىك جانە ىنتىماقتاستىق تۋرالى كەلىسىمنىڭ الەۋەتىن تولىققاندى پايدالانا الاتىندىعىنا سەنىم ءبىلدىردى.
ەلباسى بەلگىلەپ بەرگەن 10 باسىم باعىتتى جۇزەگە اسىرۋ اياسىندا پالاتا سپيكەرى فرانتسيالىق ارىپتەستەردىڭ يننوۆاتسيالىق تەحنولوگيالار, تسيفرلاندىرۋ سالاسىن زاڭنامالىق قامتاماسىز ەتۋ تاجىريبەسىنىڭ قىزىعۋشىلىق تۋدىراتىنىن اتاپ ءوتتى.
ءوز كەزەگىندە ەلشى قازاقستان مەن فرانتسيا تەك ساياسي, ستراتەگيالىق قانا ەمەس, ەكونوميكالىق ماڭىزدى ارىپتەستەر ەكەنىن ءسوز ەتىپ, بولاشاقتا ەكىجاقتى جانە كوپقىرلى, سونداي-اق پارلامەنتارالىق ىقپالداستىقتى جان-جاقتى نىعايتۋعا ىنتالى ەكەنىن جەتكىزدى.
سونىمەن بىرگە, تاراپتار ىنتىماقتاستىق جونىندەگى توپتار قىزمەتىنىڭ بەلسەندىلىگىن ارتتىرا وتىرىپ, تۇراقتى كەزدەسۋلەر مەن ءىس-ساپارلار الماسۋ ارقىلى پارلامەنتارالىق ءىس-قيمىلدى ودان ءارى دامىتاتىن بولادى.
