سول جارىستا وزىنەن جاسى الدەقايدا ۇلكەن ستۋدەنتتەرمەن بىرگە ويىنعا قاتىسىپ, ءتىپتى كەي ساتتەردە ولاردىڭ الدىن وراپ كەتكەن قازاقتىڭ قارشاداي بالاسى نازارىمىزدى ەرىكسىز اۋداردى. سويلەسەيىك دەپ قاسىنا بارعانىمىزدا سول جاق كوزىنىڭ استى كوگەرىپ كەتكەنىن اڭعاردىق. بىراق ونى ەلەڭ قىلعان ول جوق. بار ويى – مۇزايدىندا. قاتارلاستارىمەن حوككەي ويناعىسى كەپ كەرمەدەگى تۇلپارداي تىپىرشيدى. اسىعىپ تۇرعانىن سەزسەك تە ءبىر-ەكى سۇراق قويىپ, اڭگىمەگە تارتتىق.
– اتى-ءجونىڭ كىم؟ قايدا وقيسىڭ؟
– ەلدوس كادەنوۆ. №20 مەكتەپتە, 3-سىنىپتا وقيمىن.
– حوككەيگە قاتىسقانىڭا قانشا جىل بولدى؟
– ەكى جىل عوي دەيمىن.
– قايدا وينايسىڭ؟
– «تورپەدو» كومانداسىندا.
– وندا ءوزىڭ سەكىلدى قازاق بالالارى بار ما؟
– بار. بىراق ازداۋ.
– كىمگە ەلىكتەيسىڭ؟ تالعات جايلاۋوۆتى تانيسىڭ با؟
– ارينە, بىلەمىن. سول كىسى سەكىلدى حوككەيشى بولعىم كەلەدى.
– بولاشاقتا قانداي كوماندادا ويناعىڭ كەلەدى؟ «بارىستا» ويناعىڭ كەلمەي مە؟
– كەلەدى.
– كانادادا, امەريكادا ويناعىڭ كەلمەي مە؟ (بۇل سۇراقتى ادەيى قويدىق. نە ايتاتىنىن تەكسەرەيىك دەپ – ا.ق).
– جوق. قازاقستاندا وينايمىن.
– كوزىڭە نە بولعان؟ بىرەۋ سوققان با؟
– جوق. حوككەي ويناپ جۇرگەندە تاياق ءتيىپ كەتتى.
وسىلاي دەدى دە كەلەسى سۇراعىمىزدى قويعىزىپ ۇلگەرتپەي مۇزايدىنعا قويدى دا كەتتى. قالعان سۇراقتى مۇزايدىن شەتىندە ۇلىنىڭ ويىنىنا قاراپ تۇرعان نۇرجان كادەنوۆكە قويۋعا تۋرا كەلدى. بىراق ول كىسى كوپ سويلەمەيدى ەكەن. «اۋەلى ۇلىما ءبىر جىل بويى كونكي تەبۋدى ۇيرەتتىم. حوككەيگە 6 جاسىنان بەرى قاتىسىپ كەلەدى. 2008 جىلى تۋعان بالالارمەن بىرگە «تورپەدو» كومانداسىندا 4 بەستىكتىڭ 2-ءشى بەستىگىندە شابۋىلدا وينايدى. قازاقستان چەمپيوناتتارىنا قاتىسىپ ءجۇر», دەپ قىسقا قايىردى.
ازامات قاسىم,
«ەگەمەن قازاقستان»
وسكەمەن
