بۇگىندە ونەر ادامدارىن «جۇلدىز» اتاۋ سانگە اينالىپ كەتكەندەي. كوپ تىڭدارماننىڭ الماتىدا الشاڭ باسىپ جۇرگەندەردىڭ ءبارىن سولاي قابىلدايتىنى بەلگىلى. اندەردىڭ اراسىندا سوڭعى كەزدەرى حيت ۇعىمى دا پايدا بولدى. الايدا ەل ىشىنەن شىعىپ, سول ەلدە قالىپ قويعان شىنايى ونەر ادامدارىن كوپشىلىك بىلە قويمايدى. سول حيت اندەرىڭىزدى كىمدەردىڭ جازعانىنان دا كوپشىلىك بەيحابار. ال اۋىلدا قالىپ, ەلەۋسىز كۇن كەشىپ جاتقان تالانتتاردىڭ تاعدىرى سولاي جۇمباق كۇيدە قالا بەرەدى.
ماناربەك قويشىباەۆ سارىسۋ اۋدانىنىڭ ءوندىرىس اۋىلىندا تۋعان. جاستايىنان ونەرگە قۇشتار ول بالا كۇنىنەن-اق ءتۇرلى اسپاپتاردا ويناپ, ءوزىنىڭ تالانتىن تانىتادى. ءتىپتى وبلىستىق, رەسپۋبليكالىق دەڭگەيدەگى بايقاۋلارعا دا قاتىسىپ, جۇلدەلى بولادى. ماناربەكتىڭ تالانتىنا باس يگەن اۋىلداستارى ونىڭ اۋداندىق «سارىارقا» انسامبلىندە ونەر كورسەتكەن جىلدارىن جۇلدىزدى شاعى دەپ ەسەپتەيدى. ساحنانىڭ ۇلكەن-كىشىسى بولمايدى دەسەك تە, ماناربەك ۇلكەن ساحنالاردا ونەر كورسەتۋدى ارماندايدى. ول ءۇشىن الماتى قالاسىنا بارىپ, جوعارى وقۋ ورنىنا تۇسۋگە نيەتتەنەدى. بىراق تاعدىردىڭ بۇيرىعى ونى الماتىعا اپارماي, اتا-اناسىنا قارايلاپ, اۋىلدا قالادى. ءبارىبىر بويىنداعى ونەرى تىنشۋ بەرمەگەن ماناربەك قويشىباەۆ كەيىن وڭتۇستىك قازاقستان وبلىسىنىڭ سوزاق اۋدانىنداعى ناعاشىلارىنىڭ قولىنا بارىپ, جيىرمادان ەندى عانا اسقان شاعىندا «شۋ ولكە» مۋزىكالىق ءانسامبلىن قۇرعان. سول كەزدە ول بۇگىندە تانىمال ءانشى ساكەن مايعازيەۆتى انسامبل قۇرامىنا الىپ, بىرلەسە ونەر كورسەتكەن ەكەن. ساكەن مايعازيەۆتىڭ دە تالاي سۇحباتتارىنان ماناربەك قويشىباەۆ ەسىمىنىڭ قۇرمەتپەن اتالاتىنىن وقىعان ەدىك. ساكەننىڭ «كىشكەنە كەزىمنەن سوقپالى اسپاپتاردا ويناعاندى ۇناتۋشى ەدىم. اۋىلدا جۇرگەندە گيتارادا دا, دومبىرادا دا وينادىم. ماعان ۇستازدىق ەتكەن اعالارىما راحمەت ايتامىن. ماناربەك قويشىباەۆ, ماقاش تاسىباەۆ دەگەن اعالارىم كوپ نارسەنى ۇيرەتتى», دەگەن سوزدەرىنەن دە ماناربەك تالانتىن تانۋعا بولاتىنداي.
اۋىلدا قالعان تالانت يەسى ءان شىرقاۋمەن بىرگە, سازگەرلىك قابىلەتىنىڭ بار ەكەنىن دە تانىتتى. ەشقاشان اتاق پەن داڭققا قۇمارتپاي, قاراپايىم تىرشىلىك كەشىپ كەلە جاتقان ماناربەك قويشىباەۆتىڭ قوڭىر اندەرى بۇگىندە الگى ءبىز ايتقان حيت اندەرگە اينالدى. مىسالى, ساكەن مايعازيەۆتىڭ ورىنداۋىنداعى «اققۋلاردىڭ ارمانى» ءانىنىڭ ءوزى ۇيلەسىمىن تاپقان عاجاپ ءان. ال جاستار اراسىندا كەڭ تانىلىپ, ءبىر كەزدە ول ءانسىز توي وتپەيتىن بولعان ايگەرىم قالاۋباەۆانىڭ «تەلەفونىم شىرىلداسا سەن دەيمىن» ءانىنىڭ ءوزى تىڭدارمان جۇرەگىندە. بۇدان بولەك, ونىڭ «قارا شاڭىراق», «شۋدىڭ بويىن مەكەندەگەن ءبىر ەلىك», «جول وتكەن», «جيەن بالا» اتتى اندەرى بار.
ءبىز ونەرگە ادالدىق جايلى كوپ ايتامىز. شىن مانىندە ونەرگە ادالدىق دەگەننىڭ ءوزى بويداعى تالانتتى ايالاپ ۇستاۋ عوي. اۋىلدا قالسا دا, ۇلكەن ساحنالاردا ونەر كورسەتپەسە دە ماناربەك قويشىباەۆتىڭ ونەرگە ادالدىعى سۇيسىنتەدى. ءوزىنىڭ قوڭىر اندەرىمەن كوپشىلىكتىڭ جۇرەگىنەن جول تاپقان ونەر يەسىن بۇگىندە كوپشىلىك بىلە قويمايدى. ەندى سارىسۋ اۋدانىنىڭ اكىمشىلىگى قولداۋ كورسەتىپ جاتسا, ول شىعارماشىلىق كەشىن وتكىزگىسى كەلەتىنىن دە جاسىرمايدى. «ەل ءىشى – ونەر كەنىشى» دەيدى عوي قازاق حالقى. ەل ىشىندە وسىنداي ازاماتتاردىڭ بولعانى قۋانتقانىمەن, ولارعا دەگەن قۇرمەتتىڭ دەر كەزىندە كورسەتىلە قويمايتىنى ويلاندىرادى. بىراق تىرشىلىك اعىنىمەن تۋعان جەرىندە قالعان تالانتتىڭ تۇعىرى قاشاندا بيىكتە.
حاميت ەسامان,
«ەگەمەن قازاقستان»
جامبىل وبلىسى
