فوتو: ۆالەري بۋگاەۆ
جۋىردا عانا ءبىز «ەگەمەندە» وبلىس ورتالىعىنداعى «ەرتىس ىرىسى» دەپ اتالاتىن اشىق الاڭدا وتەتىن جارمەڭكە تۋرالى جازعان ەدىك. قاڭتارداعى ايازدى كۇندەرى كەيىنگە شەگەرىلگەن جارمەڭكە 3 اقپاندا ءوتىپ, اسىعا كۇتىپ جۇرگەن تۇرعىندار دا ءبىر قارق بولىپ قالعان بولاتىن.
بىراق, كۇتپەگەن جەردەن «ەرتىس ىرىسى» جارمەڭكەسى كوشەتىن بولىپ شىقتى. قالا اكىمدىگى, وبلىستىق اۋىل شارۋاشىلىعى, كاسىپكەرلىك, ساۋدا جانە تۋريزم باسقارمالارى جانە «Gold Plaza» جشس بىرلەسىپ مەموراندۋمعا قول قويىپ تا ۇلگەرىپتى. قالا اكىمدىگى «ەندى اۋىلشارۋاشىلىق جارمەڭكەسى اشىق الاڭدا وتكىزىلمەيدى. اپتا سايىن قالاداعى سۋۆوروۆ كوشەسى, 11-ءۇي عيماراتىندا جابىق جەردە وتەدى. ساۋدا الاڭىن 5 جىل مەرزىمگە وتەۋسىز پايدالانۋ ءۇشىن كاسىپكەرمەن كەلىسىمگە وتىردىق» دەپ حابارلادى. حالىق اڭ-تاڭ. جارمەڭكەنىڭ باسقا جەرگە جانە جابىق عيماراتقا كوشۋىنە نارازى.
جالپى, جارمەڭكە 2015 جىلعا دەيىن وبلىس ورتالىعىنداعى «كۆازار» ساۋدا ءۇيىنىڭ ماڭايىندا ءوتىپ كەلدى. ءار سەنبى سايىن ساۋدا ءۇيى ورنالاسقان ەسەناليەۆ پەن ەستاي كوشەلەرىنىڭ قيىلىسى جابىلىپ, قىزۋ جارمەڭكەگە اينالاتىن. وسى جەردە 2010 جىلدارى اۋداندار وبلىس ورتالىعىنا كەلىپ, ءار اپتا سايىن جارمەڭكەنى كەزەكتەسىپ وتكىزۋدى باستاعان-دى. كەزەكتەسىپ وتكىزۋ – ءار اۋداننىڭ قولدا بارىن, وندىرگەن ونىمدەرىنىڭ قانشالىقتى باعالى, ساپالى ەكەنىن كورسەتسە, ەكىنشىدەن, اۋداندار اراسىنداعى باسەكەلەستىك ارتادى. ۇشىنشىدەن, وبلىس ورتالىعىنا جاقىن جانە الىس اۋداندار اراقاشىقتىعى, اۋا رايى جايى دا ەسكەرىلگەن-ءدى. كەيدە ەكى-ءۇش اۋدان بىرلەسىپ تە وتكىزىپ ءجۇردى. اكىمدەر دە ءوز اۋداندارى وتكىزەتىن جارمەڭكەگە جاۋاپكەرشىلىكپەن قاراي باستادى. الاڭدا ءان مەن كۇي قالىقتاپ, ساحنادا كونتسەرتتىك باعدارلامامەن اۋدان جاستارى ونەر كورسەتەدى.
كەيىن جارمەڭكە وبلىس ورتالىعىنىڭ وڭتۇستىك شەتىنە قاراي جىلجىپ, تورگوۆايا كوشەسى, 4/1 شاعىن اينالىم اۋماعىنا اۋىستى. بىلتىر قىستا بۇل جارمەڭكەگە «ەرتىس ىرىسى» دەگەن ارنايى اتاۋ دا بەرىلدى. وبلىس اكىمى بولات باقاۋوۆتىڭ ءوزى ارنايى نازار اۋدارىپ, تاپسىرما بەرىپ, جاڭا جارمەڭكە ەرەكشە باقىلاۋعا دا الىنعان-دى.
ال قازىر قالا اكىمى نۇرجان اشىمبەتوۆ «جابىق كوممۋنالدىق بازار اشۋدى كوپتەن بەرى ويلاپ جۇرگەن ەدىك» دەپ وتىر.
– سەبەبى تۇرعىندار جاز مەزگىلىندە اپتاپ ىستىققا, قىستا قاتتى ايازعا شاعىمداناتىن. ەندى ءوز عيماراتىمىز بار. كۇن سايىن ساۋدا جاساي الامىز. كاسىپكەر 5 جىلعا تەگىن بەرىپتى, – دەيدى.
بىراق, ايازعا, ىستىققا شاعىمدانعان تۇرعىندار بار دەگەنگە سەنۋ دە قيىن. ويتكەنى سولتۇستىكتە ءومىر سۇرەتىن وبلىس حالقى, قالا جۇرتشىلىعى قىسى-جازى ءوتىپ كەلە جاتقان جارمەڭكەلەرگە ابدەن ۇيرەنگەن, اسىعا كۇتەدى. وبلىستىق, قالالىق اكىمدىك سايتتارىنان دا اياز بەن ىستىققا ارىزدانعان شاعىم كەزدەستىرمەدىك. قايتا, تۇرعىندار جارمەڭكەنىڭ اشىق الاڭدا ءوتۋىن سۇرايدى. كەيبىرەۋلەردىڭ جاڭا ورىنعا كوڭىلدەرى تولمايدى. ءبارىنىڭ دە ايتاتىندارى: جارمەڭكەنىڭ جابىق الاڭعا كوشكەنى دۇرىس ەمەس. ۇزىن-سونار كەزەك. تار جەر. ونىمدەر جەتپەيدى. ءوندىرۋشى كاسىپورىنداردىڭ وكىلدەرى ورىنعا تالاسىپ, ءوزارا جانجالداسىپ قالۋدا. تۇرعىندارعا دا قيىن بازار ءىشى ەمىن-ەركىن ساۋدا جاساۋعا كەدەرگى كەلتىرەدى. ازىق-ت ۇلىك ونىمدەرىنە تاڭداۋ از. سوندىقتان جارمەڭكەنىڭ ەمىن-ەركىن كەڭ جەردە, اشىق الاڭدا وتكەنىن قالايدى.
جابىق بازاردا وتكىزىلگەن العاشقى جارمەڭكە جاقسى ناتيجە بەرە قويعان جوق. تۇرعىندار دۇرلىگۋىن كۇتپەگەن قالالىق اكىمدىك «ەندى اۋىلشارۋاشىلىق جارمەڭكەسى تاڭعى ساعات 9.00-دەن 21.00-گە دەيىن كۇن سايىن وتەدى. اپتا سايىن وتەتىن جارمەڭكەنى ەندى كۇن سايىن وتكىزەمىز» دەپ ۋادە بەرۋدە.
– سۇرانىستىڭ ارتۋىنا بايلانىستى 15 قاڭتاردان باستاپ كۇندەلىكتى وتكىزۋ تۋرالى شەشىم قابىلداندى, – دەيدى قالالىق كاسىپكەرلىك جانە اۋىل شارۋاشىلىعى ءبولىمىنىڭ باسشىسى رۋسلان تىلەۋلەسوۆ.
ءبىز «ەرتىس ىرىسى» دەپ اتالاتىن اشىق الاڭداعى جارمەڭكەنى وتكىزىپ جۇرگەن «فورساج» جشس-ءنىڭ وكىلدەرىمەن كەزدەستىك.
– جارمەڭكە وتكىزۋ جونىندە قالالىق اكىمدىكپەن كەلىسىلگەن. ءبىز جارمەڭكەگە كەلەتىن كوشەگە دەيىن جوندەپ بەردىك. ءبارى دە ءوزىڭىز كورىپ تۇرعانداي كەڭ جەردە, اشىق الاڭعا ىڭعايلانىپ جاسالدى. جالپى, اشىق الاڭدا ءوتۋى كەرەك قوي, – دەيدى سەرىكتەستىك ديرەكتورى تالعات ىسقاقوۆ.
ال, قالا اكىمدىگىنىڭ كاسىپكەرلىك, اۋىل شارۋاشىلىعى ءبولىمى جانە وبلىستىق اۋىل شارۋاشىلىعى باسقارماسىنداعىلار ء«بىز ەشتەڭە بىلمەيمىز, ورىنداۋشى عانامىز» دەپ جاۋاپ بەردى.
– ەگەر حالىق قايتا-قايتا جارمەڭكە كەرەك دەپ سۇراپ جاتسا, مۇمكىن كوشىپ تە كەلەرمىز, – دەستى ولار.
قازىر اكىمدىكتەر كاسىپكەرلەرگە, كاسىپكەرلەر اكىمدىكتەرگە ءبىر-بىرىنە جاۋاپكەرشىلىك ارتادى. ءبىر-بىرىمەن ءتىل تابىسا الماۋدا. مۇددەلەر قايشىلىعى بايقالادى. ناتيجەسىندە ەكىجاقتى كەلىسىمدەر ورىندالماي قالادى. جارمەڭكەنىڭ اتىن جامىلعان «جابىق كوممۋنالدىق بازاردىڭ ەندىگى يەسى «Gold Plaza» جشس-ءنىڭ مۇددەسى قانداي؟ ەرتەڭگى كۇنى قالالىق اكىمدىك «Gold Plaza» سەرىكتەستىگىمەن دە كەلىسىمدى ءۇزىپ, جارمەڭكەنى تاعى دا باسقا جەرگە كوشىرمەسىنە كىم كەپىل؟!
جارمەڭكە حالىق ءۇشىن – مەرەكە. وسىنى تۇسىنەيىك الدىمەن. ءار سەنبى سايىن وتەتىن جارمەڭكەنى قالا تۇرعىندارى, زەينەتكەرلەر اسىعا كۇتەتىنى ەسكەرىلسە ەكەن.
فاريدا بىقاي,
«ەگەمەن قازاقستان»
پاۆلودار وبلىسى
