اتالعان بريفينگتە ينۆەستيتسيالار جانە دامۋ ۆيتسە-ءمينيسترى تيمۋر توقتاباەۆ مەملەكەت باسشىسى جولداۋىنىڭ «يندۋستريالاندىرۋ جاڭا تەحنولوگيالاردى ەنگىزۋدىڭ كوشباسشىسىنا اينالۋى ءتيىس» اتتى ءبىرىنشى باعىتى اياسىندا قازاقستاندىق كاسىپورىنداردىڭ جاڭا تەحنولوگيالىق احۋالى تۋرالى ايتىپ بەردى.
ت.توقتاباەۆتىڭ مالىمدەۋىنشە, اقپارات جانە كوممۋنيكاتسيالار مينيسترلىگى «تسيفرلى قازاقستان» مەملەكەتتىك باعدارلاماسىن ىسكە اسىرۋدىڭ باستى ۇيلەستىرۋشى ورگانى بولعاندىقتان يننوۆاتسيالىق تەحنولوگيالار پاركتەرىن وسى مينيسترلىكتىڭ قاراماعىنا بەرۋ تۋرالى شەشىم قابىلدانعان. سەبەبى يننوۆاتسيالىق تەحنولوگيالار پاركى اياسىندا جۇزەگە اسىرىلاتىن جوبالاردىڭ 80 پايىزى ەكونوميكانى تسيفرلاندىرۋمەن جانە تسيفرلى ەكسپورتپەن تىكەلەي بايلانىستى.
بۇل ەكسپو-2017 بازاسىندا ات-ستارتاپتاردىڭ حالىقارالىق تەحنوپاركىن ءتيىمدى قالىپتاستىرۋعا ءارى سول پاركتەردە اقپارات جانە كوممۋنيكاتسيالار سالاسىن دامىتۋ ءۇشىن اتقارىلعان جۇمىستار مەن تەحنولوگيالاردى پايدالانۋعا مۇمكىندىك بەرەدى.
مەملەكەت باسشىسى بيىلعى جولداۋىندا الماتىدا ورنالاسقان «الاتاۋ» يننوۆاتسيالىق تەحنولوگيالار پاركى» ارنايى ەكونوميكالىق ايماعىنىڭ قىزمەتىن ۇيىمداستىرۋدى تۇبەگەيلى قايتا قاراۋدى تاپسىرعان بولاتىن. وسىعان بايلانىستى ەندىگى جەردە يننوۆاتسيالىق كəسىپورىندارعا ارنالعان جەڭىلدەتىلگەن رەجىمدە جۇمىس ىستەيتىن اتالعان ارنايى ەكونوميكالىق ايماق ۇكىمەت شەشىمىمەن تىكەلەي الماتى قالاسىنىڭ اكىمدىگىنە بەرىلەدى. ول جوعارى تەحنولوگيالىق ءوندىرىس باعىتتارىنىڭ سانىن كەڭەيتۋمەن اينالىسادى.
ت.توقتاباەۆ سونداي-اق مينيسترلىك قاراماعىنان اكىمدىككە وتكىزۋ كەزىندە قىزمەتكەرلەر جۇمىستان قىسقارتىلمايتىنىن اتاپ ءوتتى. سونىمەن قاتار قازىرگى تاڭدا اەا-نىڭ ەكىنشى كەزەڭى دامىپ جاتىر جانە ونىڭ ودان ءارى كەڭەيۋى قىزمەتكەرلەر سانىنىڭ ارتۋىنا جول اشادى. «جالپى, بۇل «اقىلدى» تەحنولوگيالار الماتى قالاسىنىڭ دامۋىنا وڭ اسەر ەتەدى», دەدى ۆيتسە-مينيستر.
مالىمەتكە سۇيەنسەك, 2015-2017 جىلدارى جەر قويناۋىن پايدالانۋشىلاردان «الاتاۋ» يتپ» اەا-عا تارتىلعان قاراجات 3,5 ملرد تەڭگەدەن اسقان. ياعني, وندا بارلىعى 35 كومپانيا بولعان. 2,6 ملرد تەڭگەگە 64 جوبا قارجىلاندىرىلعان. سونىڭ ىشىندە 2015 جىلى 21,4 ملن تەڭگەگە 5 جوبا, 2016 جىلى 856 ملن تەڭگەگە 27 جوبا, 2017 جىلى شامامەن 1,7 ملرد تەڭگەدەن استام سوماعا 32 جوبا قولعا الىنعان.
دينارا بىتىك,
«ەگەمەن قازاقستان»
