شارا بارىسىندا باسقارما توراعاسى ەلباسىنىڭ قازاقستان حالقىنا جولداۋىندا بەلگىلەنگەن تاپسىرمالاردىڭ ماڭىزدىلىعىن تىلگە تيەك ەتتى.
«وڭدەۋ ونەركاسىبى سەكتورىن دامىتۋ, ەڭبەك ونىمدىلىگىن ارتتىرۋ جانە يندۋستريالاندىرۋدىڭ يننوۆاتسيالىق دامۋىنىڭ قاجەتتىلىگىنە باسىمدىق بەرىلگەنى – وزەكتى ءارى ۋاقىتىندا جاسالعان باعدار. ءبىز ەلباسىنىڭ جولداۋىن ەگجەي-تەگجەيلى ساراپتاپ, ءوزىمىزدىڭ جوسپارىمىزدى دايىنداپ الدىق. جالپى, كاسىپكەرلىك توڭىرەگىندە ايتاتىن بولساق, ەلىمىزدىڭ نەگىزگى ساياساتتارىنىڭ ءبىرى نارىقتىق ەكونوميكانى كوتەرۋ, ورتا جانە شاعىن بيزنەستىڭ ءبىزدىڭ ەكونوميكامىزعا قوساتىن ۇلەسىن كوبەيتۋ جۇمىستارىنا توقتالۋعا بولادى. ەندى سونىڭ اياسىندا جاسالعان جۇمىستار جونىندە ايتساق, ءبىزدىڭ توڭىرەكتە بەس ءارتۇرلى سالا بار. ولار ماكروەكونوميكالىق ساياسات, اقشا ساياساتى, تاريف ساياساتى, ءتورتىنشى – كاسىپكەرلىكتىڭ قۇقىقتىق قورعاۋ ماسەلەسى, بەسىنشىسىنە ءوزىمىزدىڭ يندۋستريالىق ساياساتىمىزدى جاتقىزۋعا بولادى. وسىنداي بەس ساياسات بويىنشا اۋقىمدى جۇمىستار اتقارىلىپ جاتىر», دەدى ول.
سونىمەن قاتار جيىن بارىسىندا «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ەلدار جۇماعازيەۆ «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى» اياسىندا جۇزەگە اسىرىلىپ جاتقان جۇمىستارعا توقتالىپ, «كاسىپكەرلىك جانە بيزنەس نەگىزدەرى» ءپانى قاشان ەنگىزىلەتىن اتاپ ءوتتى.
«مەملەكەت باسشىسى «اتامەكەن» ۇكپ-نىڭ جاپپاي كاسىپكەرلىكتى دامىتۋ جۇمىسىنا جوعارى باعا بەردى. ۇلتتىق پالاتا «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى» اياسىندا جۇزەگە اسىرىلىپ وتىرعان «باستاۋ بيزنەس» جوباسىنىڭ باستاماشىسى ەكەنى بەلگىلى. 2017 جىلى اۋىلدا تۇراتىن 15000 ازامات وقىتىلىپ, ناتيجەسىندە 3000-نان اسا ادام ءوز كاسىبىن اشتى جانە جۇمىس ىستەپ تۇرعان بيزنەسىن ۇلعايتا الدى. سونداي-اق ءبىز 2015 جىلى «كاسىپكەرلىك جانە بيزنەس نەگىزدەرى» ءپانىن ەنگىزۋ تۋرالى ۇسىنىس جاساعان بولاتىنبىز. ءبىلىم جانە عىلىم مينيسترلىگى ونى قولدادى. قازىر بۇل وقۋلىق دايىن دەپ ايتۋعا بولادى. ول 2018 جىلدان باستاپ قاناتقاقتى جوبا رەتىندە, ال 2019 جىلدان باستاپ مەكتەپ باعدارلاماسىنا ەنەدى. بۇل ءپاننىڭ باسقا پاندەردەن ايىرماشىلىعى, ول ينتەراكتيۆتى تۇردە وقىتىلادى. جانە ءبىز وسىعان بايلانىستى پورتال دايىنداپ جاتىرمىز. تاعى دا ايتايىن, بۇل ءپان دايىن, الداعى 2019 جىلدىڭ قىركۇيەك ايىنان باستاپ وقىتىلادى», دەدى ەلدار جۇماعازيەۆ.
راۋان قايدار,
«ەگەمەن قازاقستان»
