كەشە جوعارىدا جاريا ەتىلگەن جوبانىڭ العاشقى تۇساۋكەسەر ءراسىمى ءوتتى. وسى ۋاقىت اراسىندا ايتارلىقتاي ءىس اتقارىلعان ەكەن. اتاپ ايتقاندا, جوبانى تياناقتاپ ساپارعا اتتانعان توپ 30 مىڭ شاقىرىم جولدى باسىپ ءوتىپ, رەسەيدىڭ استراحان, موڭعوليانىڭ ۇلان-باتىر قالاسى, وزبەكستاننىڭ تاشكەنتتەگى كەنيمەح اۋدانى جانە تاجىكستاننىڭ حۋدجاند شاھارى قاتارلى ەلدى مەكەندەردە بولىپ, تاريحي ورىنداردى كوزىمەن كورىپ, سونداعى قازاقتار ءومىرى مەن تۇرمىسىن تاسپاعا تۇسىرگەن.
سونداي-اق ماڭىزدى شارانىڭ كوزدەگەن ماقساتى تۋرالى كوپشىلىكتى حاباردار ەتكەن مينيستر داۋرەن اسكەربەك ۇلىنىڭ ايتۋىنا قاراعاندا, بۇل جوبا ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسى اياسىندا قولعا الىنىپ وتىر. سەبەبى قازاقستان قازىرگى تاڭدا الەم بويىنشا سىرتتاعى قانداستارىن اتاجۇرتىنا تارتۋشى از عانا ەلدەردىڭ ءبىرى. ەكىنشىدەن, دۇنيەجۇزى قازاقتارىنىڭ قۇرىلتايىندا مەملەكەت باسشىسى: «سىرتتاعى ەلىم دەگەن قازاققا – قازاقستاننىڭ ەسىگى ارقاشان اشىق» – دەپ اتاپ وتكەنىندەي, مينيسترلىك وسى تاپسىرمانى ويداعىداي ورىنداۋ ءۇشىن جانە سىرتتاعى اعايىننىڭ ءومىرىن اتاجۇرتتاعى تۇرعىندارعا كەڭىرەك تانىستىرۋ ماقساتىندا وسى جوبانى قولعا الىپ وتىر دەدى.
شەتەلدەگى ءار قازاقتىڭ جۇرەگى اتامەكەن – ەلىم دەپ سوعاتىنىن ايتقان جوبا جەتەكشىسى ولجاس بەركىنباەۆ ەلباسىمىز جۇرگىزىپ وتىرعان كوپ سالالى ساياساتتىڭ ارقاسىندا بارعان ەلدەردىڭ بۇلارعا دەگەن وڭ كوزقاراسى ءىستىڭ ءساتتى اياقتالۋىنا كوپ اسەر ەتكەنىن اتاپ ءوتتى.
«قيىرداعى قازاقتار» دەرەكتى فيلمدەر توپتاماسىنىڭ بۇل جولعى كورسەتىلىمى – موڭعوليا قازاقتارىنا ارنالىپتى. ياعني ەلدىڭ استاناسى ۇلان-باتىر قالاسىندا جانە وعان جاقىن ورنالاسقان نالايحان اۋىلىندا عۇمىر كەشىپ جاتقان قازاقتاردىڭ بۇگىنگى تىرشىلىگى شىنايى باياندالعان.
دەرەكتى فيلمنەن تۇيگەنىمىز: نالايحان اۋىلىندا ءدال قازىر 800-دەن استام قازاق وتباسى ءومىر ءسۇرىپ جاتىر ەكەن. ارينە بۇل باۋىرلار اتا سالتىمىزدى جاقسى ساقتاعان. اۋىلدىڭ ەرەكشەلىگى – بۇل جەردە كۇللى ەلدى كومىرمەن قامداپ تۇرعان شاحتا ورنالاسقان. وتكەن عاسىردىڭ 30-جىلدارى وسى شاحتا قازاقتاردىڭ كۇشىمەن اشىلعان. سودان بەرى كەنىشتە تەر توككەن 10 قازاق ازاماتى سول ەلدىڭ ەڭبەك ەرى اتاعىن العان.
سونىمەن قاتار فيلمدە ەلدىڭ ورتالىعى ۇلان-باتىر قالاسىندا كاسىبىن دوڭگەلەتىپ وتىرعان بيزنەسمەندەر, جاڭا ءىت تەحنولوگياسىن يگەرگەن, ءتىپتى كەمبريجدە ءبىلىم العان جاس مامان, سول ەلدىڭ ساياسي ستراتەگياسىن نەگىزدەۋشى زەرتتەۋ ينستيتۋتىن باسقارىپ وتىرعان قانداسىمىز قاتارلى كوپتەگەن تۇلعالاردىڭ ءومىر-تاريحىمەن تانىسۋعا مۇمكىندىك بار. قالعان سەريالار الداعى كۇندەرى رەت-رەتىمەن ەكران ارقىلى كوپشىلىك نازارىنا ۇسىنىلادى.
تۇساۋكەسەر راسىمگە مەملەكەت جانە قوعام قايراتكەرلەرى, پارلامەنت دەپۋتاتتارى, باق باسشىلارى, عالىمدار, تاريحشىلار, بلوگەر-جۋرناليستەر قاتىستى.
بەكەن قايرات ۇلى,
«ەگەمەن قازاقستان»
