بىلاي قاراساڭىز قاراپايىم بەلبەۋ مەن تەلپەك. بىراق ونىڭ ارجاعىندا ماعىنا جاتىر. ءسال شەگىنىس. سوناۋ 60-70- جىلدارى مەكتەپتە وقىپ جۇرگەنىمىزدە ارميادان اعالارىمىز ورالاتىن. ولاردى بۇكىل اۋىل اسپانعا كوتەرىپ قارسى الاتىن. بالا بىتكەن اسكەردەن كەلگەن اعانىڭ قاسىنان شىقپايتىن. بىرەۋى فۋراجكاسىن كيەدى, بىرەۋى بەلبەۋىن تاعادى. بەلبەۋدى اۋىل بالالارى «سولداتسكي رەمەن» (بالالاردىڭ تىلىمەن ايتقاندا) دەپ اتايتىن. سول «سولداتسكيدى» بەلىمىزگە تاعىپ الىپ, كوشەدە جۇرەتىنبىز. ءتىپتى مەكتەپكە دە تاعىپ باراتىنبىز. ونى تاققان بالا ۇلكەن بەدەلگە يە بولاتىن. سول قالىڭ قايىس بەلدىكپەن بالالاردى «قورقىتىپ» تا قوياتىنبىز... ءيا, سول كەزدىڭ بالالارى اسكەرگە بارۋدى ارماندايتىن. اسكەري كيىمدى كيىپ جۇرگىسى كەلەتىن. بۇل كەڭەستىك كەزەڭنىڭ پاتريوتيزمگە تاربيەلەۋدىڭ ءبىر ۇلگىسى سياقتى كورىنەدى دە تۇرادى.
قازىرگى كۇندە جاستاردى پاتريوتيزمگە, وتانسۇيگىشتىككە تاربيەلەۋدە بۇرىنعى كەزدىڭ اسكەري كيىمى دە اسەر ەتكەنىن بىلگەن دۇرىس-اۋ دەيمىز. ءبىر عانا «سولداتسكيمەن» قانشا بالا اسكەرگە ارمان قۋىپ اتتاندى. ءبىر عانا «سولداتسكيمەن» قانشاما جاستار كەشەگى اۋعانستاننىڭ وت-جالىنىنا شارپىلدى... بۇل ادام بويىنداعى باتىرلىقتى جانيتىن رۋح. ەلباسىمىزدىڭ «رۋحاني جاڭعىرۋ» باعدارلاماسىنداعى سوزدەردىڭ ماندەرىنە ۇڭىلسەك, وتكەننىڭ بۇگىنگىگە تيگىزەر جاقسى جاقتارىن الۋدى مىندەتتەپ تۇر ەمەس پە؟ كۇنى ەرتەڭ قازتالوۆتىق وقۋشىلار دا اكەلەرى تاققان اسكەري بەلدىكتىڭ ءمانىن ۇعىپ, ناعىز وتان قورعاۋشىلارعا اينالادى.
سەرىك جۇماعاليەۆ
باتىس قازاقستان وبلىسى
