«بۇل نىساننىڭ بىرەگەيلىگى ونىڭ راكتى ەمدەۋ سالاسىنداعى تەحنيكا مەن عىلىمداعى سوڭعى جەتىستىكتەرگە ساي بولۋىندا. زاماناۋي كەشەن اۋرۋحانا, ەمحانا, قوناقۇيدى بىرىكتىرەتىن بولادى», – دەيدى Vinci فيليالىنىڭ استاناداعى باسشىسى تيمۋر دجابۋا.
ول مۇنداي قۇرىلىستى سالۋدىڭ يدەياسى مەملەكەت باسشىسىنا تيەسىلى ەكەنىن, 2011 جىلى رەسپۋبليكادا الەمدىك ستاندارتقا ساي مەديتسينالىق كلاستەر قۇرۋ تۋرالى تاپسىرما بەرگەنىن ايتا كەتتى.
وسى باستامانىڭ اياسىندا قازاقستان استاناسىندا ۇلتتىق ونكولوگيالىق ورتالىقتىڭ قۇرىلىسى تۋرالى شەشىم قابىلداندى. تاپسىرىس بەرۋشى بولىپ «نازارباەۆ ۋنيۆەرسيتەتى» شىقتى. ولار كەڭەس بەرۋگە راكتى ەمدەۋ سالاسىنداعى كوشباسشى – پيتتسبۋرگ ۋنيۆەرسيتەتىنىڭ مەديتسينالىق ورتالىعىن شاقىردى. 2016 جىلى فرانتسيالىق Vinci حالىقارالىق تەندەردە استاناداعى ورتالىقتىڭ قۇرىلىسىن سالۋدى جەڭىپ الدى.
ء«بىزدىڭ مىندەتىمىز ورتالىق ازياداعى جاڭا ورتالىقتىڭ ۋاقىت وتە كەلە ءوز قادامىن جايمەنەن العا جىلجىتۋ. سول سەبەپتى, تەحنولوگيالىق جابدىقتاۋعا كوپ كوڭىل بولىنۋدە, ياعني بولاشاقتا پيتتسبۋرگ مەديتسينالىق ورتالىعىمەن ونلاين رەجيمدە جۇمىس ىستەي الۋىنا, سونداي-اق وسىنداي ءىرى ەۋروپالىق ورتالىقتارمەن دە بايلانىس ورناتۋ. بۇدان باسقا, جاڭا مەديتسينالىق كەشەن ونكولوگيا سالاسىندا حالىقارالىق نورماتيۆكە ساي بولۋى ءتيىس», – دەپ ءتۇسىندىردى تيمۋر دجابۋا.
فرانتسيالىق كومپانيا جوبانى ىسكە اسىرۋ ءۇشىن ءوزىنىڭ تاڭداۋىندا قازاقستاندىق Bi Groupقا توقتادى.
«جوبالاۋ قازىر اياقتالۋدىڭ الدىندا تۇر, ءساۋىردىڭ سوڭى مەن مامىردىڭ باسىندا قۇرىلىستىڭ ءبىرىنشى كەزەڭىن باستايمىز, ياعني ىرگەتاسى قالانادى», – دەدى ت.دجابۋا.
ۇلتتىق عىلىمي ونكولوگيالىق ورتالىق نازارباەۆ ۋنيۆەرسيتەتى ماڭايى جاقتا ورنالاسادى جانە 5 گەكتارداي جەردى الادى. وندا ەمدەۋدىڭ جاڭا تەحنولوگياسى, يننوۆاتسيا, الدىڭعى قاتارلى بيومەديتسينالىق زەرتتەۋلەر جۇرگىزىلەدى. ورتالىق ايماقتا تولىقتاي ونكولوگيالىق جاردەم بەرۋدى قامتاماسىز ەتۋى ءتيىس.
