وبلىستىق ءبىلىم باسقارماسىنىڭ مالىمەتىنشە, بايقاۋعا قىزىلوردا وبلىسىنان 13 مەكتەپتەن (7 قازاق تىلىندە وقىتاتىن جانە 6 ارالاس) 857 وقۋشى قاتىستى.
رەيتينگى بويىنشا ورىس تىلىندە وقيتىن قىزىلوردا, جامبىل, اقتوبە وبلىستارىنىڭ 4-سىنىپ وقۋشىلارى جالپى رەيتينگتە ۇزدىك 5 مەملەكەتتىڭ كورسەتكىشتەرىمەن سالىستىرمالى جانە ودان دا جوعارى ناتيجەلەردى كورسەتتى.
ەستەرىڭىزگە سالا كەتەيىك, حالىقارالىق ماتەماتيكا جانە جاراتىلىستانۋ پاندەر بويىنشا ءبىلىم بەرۋ ساپاسىنا حالىقارالىق مونيتورينگ جۇرگىزەتىن TIMSS (اعىلش. TIMSS — Trends in Mathematics and Science Study) زەرتتەۋى حالىقارالىق IEA ءبىلىم بەرۋ جەتىستىكتەرىن باعالاۋ قاۋىمداستىعىنىڭ ۇيىمداستىرعان باعدارلاماسى بولىپ تابىلادى. بۇل زەرتتەۋ 4-ءشى سىنىپ وقۋشىلارى مەن 8-سىنىپ وقۋشىلارىنىڭ ماتەماتيكا جانە جاراتىلىستانۋ تاربيەسىنىڭ دەڭگەيىن, ساپاسىن الەمنىڭ ءارتۇرلى ەلدەرىندە سالىستىرۋعا, سونداي-اق ۇلتتىق ءبىلىم بەرۋ جۇيەسىندەگى ايىرماشىلىقتاردى انىقتاۋعا مۇمكىندىك بەرەدى.
ءتورت جىلدا ءبىر جۇرگىزىلەتىن زەرتتەۋ تسيكلى وسى كۇنگە دەيىن 6 رەت 1995, 1999, 2003, 2007, 2011 جانە 2015 جىلدارى ۇيىمداستىرىلعان.
2007 جىلدان باستاپ قازاقستاندىق وقۋشىلار رەيتينگكە قاتىسادى. TIMSS-2015 جىلى قازاقستان 179 مەكتەپتەن (4710 ءتورتىنشى سىنىپ وقۋشىلارى جانە 4869 سەگىزىنشى سىنىپ وقۋشىلارىن) جالپى سانى 9 579 وقۋشىنى تانىستىردى. ماتەماتيكا بويىنشا ءتورتىنشى سىنىپ وقۋشىلارىنىڭ ورتاشا بالى 544 ۇپاي, جاراتىلىستانۋدان 550 بالل جيناسا,8 سىنىپ وقۋشىلارى ماتەماتيكادان - 528 بالل, جاراتىلىستانۋ عىلىمدارىنان – 533 ۇپايمەن كوزگە كورىنگەن.
كەلەسى زەرتەۋ 2019 جىلى جۇرگىزىلەدى.
