قىسقى ويىندارعا قاتىسقانى ءۇشىن وڭتۇستىك كورەيا كورشىلەس سولتۇستىككە سالعان سانكتسيالارىن جۇمسارتۋىنا تۋرا كەلگەنى بەلگىلى بولدى. كەرى جاعدايدا سولتۇستىككورەيالىق دەلەگاتسيا پحەنچحانعا جەتۋى ەكىتالاي بولار ەدى.
سولتۇستىك كورەيا وكىلدەرى وڭتۇستىككە كەمە ارقىلى جەتتى. ونىڭ بورتىندا مۋزىكانتتار, بيشىلەر بار. سەۋل وسى تۇستا كحدر-عا سالعان سانكتسيالارىنان باس تارتۋىنا تۋرا كەلەدى. كحدر تاراپى دەلەگاتسيا مۇشەلەرى مىنگەن كەمەسى جەتكەننەن كەيىن ونى وڭتۇستىك كورەيا جانارمايمەن قامتاماسىز ەتۋگە مىندەتتى ەكەنىن حابارلادى (بىراق سەۋل ازىرگە ەشقانداي شەشىم قابىلدامادى). The New York Times مالىمەتى بويىنشا بۇل حالىقارالىق سانكتسيانىڭ تارتىبىنە قايشى كەلەدى.
Associated Press-ءتىڭ حابارلاۋىنشا وڭتۇستىك تاراپى سانكتسيانى وسىعان دەيىن دە جەڭىلدەتكەن ەكەن. 31 قاڭتار كۇنى كحدر-دا وتكەن شاڭعىشىلار جارىسىنا وڭتۇستىك كورەيا سپورتشىلارى اتتانعان. ال امەريكا سالعان سانكتسيا بويىنشا سولتۇستىك كورەياعا بارعان كەز كەلگەن ۇشاق جارتى جىل بويى اقش-قا قاتىناي المايدى. الايدا سەۋل وكىلدەرى ۆاشينگتونمەن كەلىسىپ, شاڭعىشىلاردى كحدر-عا جەتكىزگەن Asiana Air كومپانياسىنان بۇل قيىندىقتى الىپ تاستادى.
The New York Times سولتۇستىككورەيالىقتاردىڭ سپورتتىق جابدىقتارىندا دا قيىندىقتار بارىن حابارلادى. وتكەن جىلى جاڭا زەلانديادا حوككەيدەن وتكەن تۋرنيرگە كحدر قۇراماسى ايدىنعا اعاش تاياقتارىمەن شىقپاق بولعان. ال قازىرگى حوككەيشىلەر مۇنداي قۇرالداردى سوناۋ 1990 جىلدارى قولدانىستان الىپ تاستاعان. تۋرنير ۇيىمداستىرۋشىلارى سول كەزدە سولتۇستىككورەيالىقتاردى كومىرتەكتى پلاستيكتەن جاسالعان تۇرىمەن قامتاماسىز ەتكەن. بىراق كحدر حوككەيشىلەرى ونى ءوز ەلدەرىنە الىپ كەتە الماپتى. سەبەبى, سولتۇستىك كورەياعا ءساندى تاۋارلاردى كىرگىزۋگە بولمايدى.
بيىلعى وليمپياداعا كحدر-دىڭ حوككەي كومانداسى قاتىسپايدى. دەگەنمەن ايەلدەر اراسىنداعى حوككەيگە وڭتۇستىك پەن سولتۇستىك كورەيا سپورتشىلارى بىرگە شىعاتىنىن ۇمىتپاعان ءجون. سولتۇستىك حوككەيشىلەرى بۇل جولى دا جاڭا تاياقپەن قامتاماسىز ەتىلەدى. بىراق جارىس اياقتالىسىمەن بىردەن قايتارىلادى. ال سپورت كيىمدەرىن وليمپيادا دەمەۋشىسى Nike ەمەس Lahta كومپانياسى جەتكىزەتىن بولدى. Nike باسشىلىعى سولتۇستىككورەيالىقتاردى كيىمدەرمەن قامتاماسىز ەتكەنى ءۇشىن امەريكانىڭ سانكتسيالارىنان سەسكەنگەن. ولاردىڭ باعىنا وراي كحدر سپورتشىلارى دا امەريكالىق كومپانيانىڭ كيىمدەرىنەن باس تارتتى.
سولتۇستىك سپورتشىلارى ءۇشىن ءبىر وكىنىشتىسى حوككەي تاياقتارىن عانا ەمەس وليمپيادا دەمەۋشىسى Samsung-ءتىڭ سىيلىقتارىن دا الىپ كەتە المايدى. وڭتۇستىككورەيالىق كومپانيا سپورتشىلاردىڭ بارىنە Samsung Galaxy Note 8 قۇرىلعىسىن سىيلىق رەتىندە تارتۋ ەتەدى.
وليمپيادا ۋاقىتىنداعى سانكتسيالار تەك سولتۇستىك كورەيانىڭ سپورتشىلارىنا عانا ەمەس شەنەۋنىكتەرىنە دە جۇرمەيدى. سەۋل تاراپى مۇنداي قادام پحەنچحانمەن اراداعى شيەلەنىستىڭ جەڭىلدەۋىنە اكەلەدى دەپ ءتۇسىندىردى.
دايىنداعان
ايان ءابدۋالي,
"ەگەمەن قازاقستان"
