دۇنيەجۇزىنىڭ نازارى بۇگىن ازيانىڭ شىعىسى - وڭتۇستىك كورەيا ەلىنە اۋىپ وتىر. ححIII قىسقى وليمپيادا ويىندارىن وتكىزۋ 2018 جىلى وسى ەلدىڭ ەنشىسىنە بۇيىردى. جالپى, بىرەگەي سپورتتىق شارانىڭ اشىلۋ سالتاناتى سپورتشىلاردىڭ شەرۋمەن ءجۇرىپ ءوتۋى, رەسمي وكىلدەردىڭ ءسوز سويلەۋى - ءبارىن قوسقاندا شامامەن 2 ساعاتقا سوزىلادى. ۇيىمداستىرۋشىلار بۇعان دەيىن حابارلاعانداي, اتالعان مەرەكەنىڭ دايارلىق جۇمىسىنا 300-گە جۋىق ادام قاتىسادى. ال اشىلۋ سالتاناتىنىڭ ارنايى قويىلىمىنا 2 مىڭعا جۋىق اكتەر اتسالىسپاق.
شاراداعى ءبىز ءۇشىن ايتۋلى وقيعالاردىڭ ءبىرى - سپورتشىلاردىڭ شەرۋى. قازاقستاننىڭ كوك تۋى ءبىزدىڭ دەلەگاتسيانى باستاپ شىعاتىن شورت-ترەكشى ابزال اجىعاليەۆتىڭ قولىندا بولادى. ايتا كەتسەك, وليمپياداعا قازاقستاننان 49 سپورتشى 57 جولداما جەڭىپ العان بولاتىن. ولار سپورتتىڭ 9 تۇرىنەن سىنعا تۇسەدى. وليمپيادادا جالپى 15 سپورت تۇرىنەن 102 مەدال جيىنتىعى ساراپقا سالىنادى. اتاپ ايتقاندا, بياتلوننان - 11, بوبسلەيدەن - 3, سكەلەتوننان - 2, كيورلينگتەن - 3, كونكيمەن جۇگىرۋدەن - 14, مانەرلەپ سىرعاناۋ - 5, شورت-ترەك - 8, تاۋ شاڭعىسى - 11, شاڭعى قوسسايىسىنان - 3, شاڭعى جارىسى - 12, شاڭعىمەن ترامپليننەن سەكىرۋدەن - 4, فريستايل - 10, سنوۋبورد - 10, شانا سپورتى - 4, شايبالى حوككەيدەن - 2 مەدال ويناتىلادى.
ەسكە سالا كەتسەك, پحيونچحان وليمپياداسىنىڭ اشىلۋ ءراسىمىن تىكەلەي ەفيردەن حابار, Qazaqstan مەن Qazsport تەلەارنالارى كورسەتەدى.
