ۇكىمەتتىڭ كەڭەيتىلگەن وتىرىسىنا قاتىسقان مەملەكەت باسشىسى زاڭنىڭ ۇستەمدىگى مەن سىبايلاس جەمقورلىققا قارسى كۇرەس كۇن تارتىبىنەن تۇسپەيتىنىن اتاپ ءوتتى. بۇل باعىتتا نۇرسۇلتان نازارباەۆ ايتىپ وتكەندەي, از جۇمىس جۇرگىزىلمەگەن.
«قۇقىق قورعاۋ قۇرىلىمدارىنىڭ جۇمىسى ءۇشىن بارلىق جاعداي جاسالدى, ايلىقتارى كوتەرىلدى. الايدا قۇقىق قورعاۋ ورگاندارىنا دەگەن قوعامنىڭ سەنىمى ءالى دە تومەندەۋ دەيتىندەي سەبەپتەر بار. وسىعان بايلانىستى قىلمىستىق پروتسەستەردىڭ ارتىق جازالايتىن تۇستارىن تومەندەتۋ مەن ونى گۋمانيزمگە قاراي باعىتتاۋ باعدارىن جالعاستىرا بەرۋ كەرەك. سىزدەر وزدەرىڭىز باتىستا قىلمىستىق ىستەردىڭ 80-90 پايىزى بەيبىت جولمەن شەشىلەتىنىن ايتاسىزدار. بىزگە نەگە ولاي ەتپەسكە؟ بىزدە ايتەۋىر مىندەتتى تۇردە ۇستاپ الىپ, قاماۋ كەرەك. ال ماسەلەنى باسقا دا جولمەن شەشۋگە بولاتىن ەدى عوي», - دەدى نۇرسۇلتان نازارباەۆ.
پرەزيدەنت ءوز سوزىندە قۇقىق قورعاۋ مەن سوت ورگاندارىنىڭ كادرلىق قۇرامىنا قاتاڭ تالاپتار قويىلىپ كەلگەنىن اتاپ ءوتتى. الداعى ۋاقىتتا تالاپ قويۋ جالعاسا بەرمەك. «ولاردىڭ جۇمىسى سونداي. ولاردىڭ ابىرويى, مورالدىق-ادەپتىلىك كەلبەتى ءمىنسىز بولۋى كەرەك. سىبايلاس جەمقورلىققا قارسى تاباندى كۇرەستى جالعاستىرۋعا ءتيىسپىز», - دەدى مەملەكەت باسشىسى.
سونداي-اق ەلباسى نۇرسۇلتان نازارباەۆ سوڭعى كەزدە لاۋازىم يەلەرى تەرگەلىپ جاتقان قىلمىستىق ىستەرگە قاتىستى پىكىر ءبىلدىردى.
«تەك سوڭعى ەكى جىلدا قىلمىستىق جاۋاپكەرشىلىككە 2 200 لاۋازىم يەلەرى تارتىلعان. ولاردىڭ اراسىندا مينيسترلەر, بارلىق دەڭگەيدەگى اكىمدەر, ۆەدومستۆو باسشىلارى بار. قازىرگى كەزدە سوتتا ۇلتتىق ەكونوميكا مينيسترلىگىنىڭ ەكس-باسشىسىنا قاتىستى قىلمىستىق ءىس قارالىپ جاتىر. شىنىن ايتسام, قۋاندىق بيشىمباەۆقا ايانىشپەن قارايمىن. ونى «بولاشاقپەن» وقىتىپ, ءۇمىت ارتتىق. ارينە, وكىنىشتى. بىلىكتى ماماندى دايارلاۋعا قىرۋار ۋاقىتتى, قارجىنى جۇمسايمىز»,- دەدى ەلباسى. سونىمەن قاتار پرەزيدەنت ينۆەستيتسيالار جانە دامۋ مينيسترلىگى گەولوگيا كوميتەتىنىڭ توراعاسىنا, دەنساۋلىق ساقتاۋ مينيسترلىگى فارماتسيا كوميتەتىنىڭ توراعاسىنا قاتىستى سوتقا دەيىنگى تەرگەۋ ءجۇرىپ جاتقانىن ەسكە سالىپ ءوتتى «فارماتسيانىڭ رەسپۋبليكالىق قۇرىلىمى وسى جىلدار بويى فارماتسەۆتيكالىق كاسىپورىنداردىڭ قۇرىلىسىنا جول بەرمەي كەلگەن», -دەدى ن. نازارباەۆ.
