پرەزيدەنت • 09 اقپان، 2018

ەلباسى: وتكەن جىلى ەكونوميكالىق دامۋدىڭ كورسەتكىشتەرى وڭ بولدى

109 رەتكورسەتىلدى

نۇرسۇلتان نازارباەۆ ۇكىمەتتىڭ كەڭەيتىلگەن وتىرىسىندا ۇكىمەت، ۇلتتىق بانك پەن جەرگىلىكتى اتقارۋشى ورگانداردىڭ ناتيجەلى جۇمىستارىن اتاپ ءوتتى. 

«سىرتقى فاكتورلاردىڭ تۇراقسىزدىعىنا قاراماستان وتكەن جىلى ەكونوميكالىق دامۋدىڭ كورسەتكىشتەرى وڭ بولدى. وسىعان بايلانىستى ۇكىمەت، ۇلتتىق بانك، جەرگىلىكتى اتقارۋشى ورگانداردىڭ ناتيجەلى جۇمىسىن اتاپ ءوتتىم. قازىرگى تاڭدا دۇنيەجۇزىندەگى احۋال ءبىرشاما جاقسارىپ كەلە جاتقانىن ءبارىمىز بىلەمىز. ول بىزگە ءوز اسەرىن  تيگىزەدى. الەمدەگى دامىعان 30  ەلدىڭ قاتارىنا قوسىلۋ ءۇشىن ءالى دە تالاي بەلسەندى جۇمىستار اتقارىلۋى كەرەك. قاجەتتى  بارلىق باعدارلامالىق قۇجاتتار، ءتيىستى زاڭدار قابىلداۋ جۇمىستارى جالعاسپاق»، - دەدى نۇرسۇلتان نازارباەۆ.

ەلباسى بيىلعى جولداۋىندا ءتورتىنشى ونەركاسىپتىك رەۆوليۋتسيا  جاعدايىندا دامۋدىڭ جاڭا مۇمكىندىكتەرى ايقىندالعانىن اتاپ ءوتتى. «ونىڭ توڭىرەگىندە جۇمىس ىستەۋ باستالدى. سوندىقتان دامۋدىڭ قارقىنىن ۇدەتۋ كەرەك. جاقسى ىستەلگەن نارسەنىڭ بارلىعى «قالتامىزدا». وعان راحمەت ايتامىز. ال ەندى ىستەلمەگەن جۇمىستارعا، الدا اتقارىلاتىن جۇمىستارعا، كەمشىلىكتەرگە كوڭىل ءبولۋ كەرەك. باعدارلامالاردى ساپالى تۇردە ىسكە اسىرۋ، ولارعا ءبولىنىپ جاتقان قارجىلاردى ءتيىمدى پايدالانۋ وسى وتىرعان بارلىق ازاماتتاردىڭ مىندەتى بولىپ سانالادى»،  - دەدى مەملەكەت باسشىسى.

سونىمەن قاتار قازاقستان پرەزيدەنتى قابىلدانعان بارلىق باعدارلامالاردى، بيىلعى جولداۋدا قويىلعان مىندەتتەردى ورىنداۋ ۇكىمەتتىڭ الدىندا تۇرعان باستى مىندەت ەكەندىگىن باسا ايتتى. «شارۋا از ەمەس. كۇندەلىكتى جاسالىپ جاتقان جۇمىس تا جەتەرلىك. بىراق، بۇل باعدارلامالارعا بارلىقتارىڭىز كوڭىل ءبولىپ وتىرۋلارىڭىز كەرەك. بۇل ءبىزدىڭ جالپى ماقساتىمىزدى ورىنداۋعا سەپتىگىن تيگىزەدى»، - دەدى ەلباسى.

سونداي-اق پرەزيدەنت ەلىمىزدەگى بارلىق ارنايى ەكونوميكالىق ايماقتاردىڭ (اەا) جۇمىستارىنا تەكسەرۋ جۇرگىزىلەتىنىن ايتتى.

«بيۋدجەتتىڭ مول قاراجاتى ارنايى ەكونوميكالىق ايماقتاردى قۇرۋعا جۇمسالۋدا. قازىرگى ۋاقىتتا  بىزدە 11-ءى بار، 283 ملرد تەڭگە ءبولىندى. وبلىس اكىمدەرى جاڭا اەا قۇرۋ وتىنىشتەرىمەن ءبىزدى قاعازدىڭ استىندا قالدىرۋدى جالعاستىرۋدا. ۇكىمەت اتالعان 11 اەا-عا سىني كوزبەن قاراسىن، ولار نە بەردى؟ ءمان-جايدى انىقتامايىنشا ەشقانداي اەا قۇرىلماسىن»، - دەدى نۇرسۇلتان نازارباەۆ.

وسى رەتتە ەلباسى ەلىمىز ەكونوميكاسىنداعى وڭدەۋ ونەركاسىبىنىڭ ۇلەسىن ارتتىرۋ قاجەتتىگىنە نازار اۋدارتتى. ء«بىز جىل سايىن ونداعان جاڭا ءوندىرىستى ىسكە قوسىپ، جاڭا جۇمىس ورىندارىن قۇرامىز. يندۋستريالاندىرۋ جىلدارى ىشىندە وڭدەۋ سەكتورى 36 پروتسەنتكە ءوستى. بۇل جەتىستىك، شيكىزاتتىق رەسۋرستاردان بالاما قۇرۋعا تىرىسۋدامىز. بۇعان قوسا، ەكونوميكاداعى وڭدەۋ ونەركاسىبىنىڭ ۇلەسى وسكەن جوق. 11 پروتسەنت بولعان. سول كۇيىندە قالىپ وتىر»، - دەدى نۇرسۇلتان نازارباەۆ. مەملەكەت باسشىسى بۇل جايت شيكىزاتتىڭ ەكونوميكامەن قاتار وسۋىمەن تۇسىندىرىلەتىندىگىن اتاپ ءوتتى. «بىراق، مۇنداي ءتۇسىندىرۋ قابىلدانبايدى. ەكونوميكانىڭ جالپى كولەمى ءوسۋى ءتيىس. بىزگە الدىڭعى قاتارلى تەحنولوگيا بەرىپ، ەكسپورتتىق ءونىم شىعاراتىندارعا مەملەكەتتىك قولداۋ كورسەتۋىمىز قاجەت»، - دەدى قازاقستان پرەزيدەنتى.  

سوڭعى جاڭالىقتار

ۇقساس جاڭالىقتار