«بتا بانكىمەن بىرىكتىرىلگەننەن كەيىن ايتارلىقتاي پروبلەمانى باستان كەشىرگەن جۇيەقۇراۋشى بانك «قازكوممەرتسبانكى» ساۋىقتىرىلدى. ساۋىقتىرۋ ناتيجەسىندە بتا بانكىنىڭ كرەديتىن «پروبلەمالى نەسيەلەر قورى» ساتىپ الدى, ال «قازكوممەرتسبانكتىڭ» ءوزىنىڭ كاپيتالداندىرۋ مىندەتتەمەسى ستراتەگيالىق ينۆەستورعا ساتىلدى. مەملەكەتتىك قولداۋدىڭ ارقاسىندا جالپى سوماسى 4,5 ترلن تەڭگەنى قۇرايتىن حالىقتىڭ دەپوزيتى, مەملەكەتتىك جانە جەكە كومپانيالاردىڭ قاراجاتتارى ساقتالىپ قالدى», - دەدى ۇلتتىق بانك توراعاسى دانيار اقىشەۆ وتىرىس بارىسىندا.
ونىڭ ايتۋىنشا, ۇلتتىق بانك ەلىمىزدىڭ بانك جۇيەسىنىڭ 28 پايىزىن قۇرايتىن 5 بانككە قولداۋ كورسەتىپ وتىر. ولارعا حالىقتىڭ 2 ترلن تەڭگە دەپوزيتى جانە كۆازيمەملەكەتتىك كومپانيالاردىڭ 2,2 ترلن تەڭگە دەپوزيتتەرى مەن ەسەپشوتتارى ورنالاستىرىلعان. اكتسيونەرلەردىڭ بانكتى كاپيتالداندىرۋعا ىنتىماقتى قاتىسۋىنىڭ سىزباسى ۇيىمداستىرىلعان. اتالعان بانكتەرگە مەملەكەتتىك قولداۋ 653 ملرد تەڭگەنى قۇراسا, ولاردىڭ اكتسيونەرلەرى 421 ملن تەڭگە سوماسىندا كاپيتال سالۋعا مىندەتتەمە العان. سونىمەن قاتار, ول ۇكىمەت پەن ۇلتتىق بانك ءىرى بانكتەردى كاپيتالداندىرۋ شارالارى باعدارلاماسىن جۇزەگە اسىرۋدى اياقتاۋ تۋرالى شەشىم قابىلداعاندىعىن اتاپ ءوتتى.
«دۇرىس. بىرىنشىدەن, بانكپەن جۇمىس ىستەگىسى كەلگەن اۋقاتتى ادامدار ولاردى مەملەكەتتىڭ ەش قاتىسۋىنسىز قۇراتىندىعىن بارلىعىنا جاريا ەتۋى كەرەك. ودان كەيىن بانك ساتسىزدىككە ۇشىرايدى دا, مەملەكەت ونىڭ «شالبارىن» ۇستاپ تۇرۋى ءتيىس بولادى. قۇرعان ەكەن ءوزى سوڭىنا دەيىن جاۋاپ بەرسىن. ەكونوميكانى كرەديتتەۋ قولداۋدى تالاپ ەتتى. ۇلتتىق بانك جۇيە قۇراۋشى بانكتەرگە بۇل قولداۋدى كورسەتتى», - دەدى نۇرسۇلتان نازارباەۆ ءوز كەزەگىندە.
سونىمەن قاتار نۇرسۇلتان نازارباەۆ مەملەكەتتىك تۇرعىن ءۇي قۇرىلىسىن ەكىنشى دەڭگەيلى بانكتەر قارجىلاندىرۋى تيىستىگىن اتاپ ءوتتى, دەپ حابارلايدى قازاقپارات. «ەكى جىلدىڭ ىشىندە ءۇي سالۋ ماسەلەسىنە مەملەكەت 550 ملرد تەڭگە جۇمسادى. بۇل قۇرىلىستى تىكەلەي قارجىلاندىرۋ. داعدارىس جىلدارىندا جول كارتالارىن ازىرلەگەن كەزدە ءتيىستى قولداۋ شارالارىن جاساۋعا بەت بۇردى, ياعني بۇل دۇرىس قادام بولدى. ەندى وسى قارجىنى نارىقتىق تەتىكتەرمەن پايدالانۋعا كوشۋ كەرەك. قۇرىلىستى بانكتەر قارجىلاندىرۋى ءتيىس, ال ۇكىمەت, ۇلتتىق بانك, اكىمدەر باسپانا قۇنىنىڭ ارزانداۋى ءۇشىن جاعداي جاساۋى قاجەت», - دەدى پرەزيدەنت ۇكىمەتتىڭ كەڭەيتىلگەن ماجىلىسىندە. مەملەكەت باسشىسى وسىنداي تىزبەكپەن بيۋدجەت قارجىسىنا باقىلاۋ بولاتىنىن اتاپ ءوتتى. بانكتەر وسى قارجىعا جاۋاپتى بولىپ, ونى قايتارىپ, ۇكىمەت الدىندا ەسەپ بەرەدى.
