وڭتۇستىك قازاقستان وبلىسىندا حالىق تىعىز ورنالاسقاندىقتان, بالا تۋ كورسەتكىشى وتە جوعارى. مەكتەپكە باراتىن بالا جەتكىلىكتى. ەڭ باستى ماسەلە – مەكتەپ جەتپەيدى. ونىڭ ۇستىنە بىرقاتار ءبىلىم مەكەمەلەرىنىڭ پايدالانۋعا بەرىلگەنىنە بىرنەشە جىل بولعاندىقتان, اپاتتى جاعدايدا. بۇل – سارىاعاش اۋدانىنا دا ءتان جاعداي. مىنە, وسى ماسەلەنى ەسكەرە وتىرىپ, سوڭعى جىلدارى ءبىزدىڭ وبلىستا مەكتەپ قۇرىلىسىنا ەرەكشە كوڭىل بولىنە باستادى. ءبىر عانا سارىاعاش اۋدانىندا سوڭعى ءۇش جىلدىڭ وزىندە 23 مەكتەپ پايدالانۋعا بەرىلدى. قازىرگى ۋاقىتتا اۋداندا 16 مەكتەپتىڭ قۇرىلىسى ءجۇرىپ جاتىر. ال وسى جىلدىڭ كوكتەمىندە تاعى دا 15 مەكتەپتىڭ قۇرىلىسى باستالادى دەگەن جوسپار بار. وسىنىڭ ناتيجەسىندە اۋداندا مەكتەپ پروبلەماسى لايىقتى شەشىمىن تاۋىپ, ءبىلىم ساپاسى ايتارلىقتاي جاقسارادى دەگەن ۇمىتتەمىز. ويتكەنى مۇنى زاماننىڭ ءوزى تالاپ ەتىپ وتىر. مۇنى ەلباسى بيىلعى جولداۋىندا تاعى دا باسا ايتتى.
مەملەكەت باسشىسىنىڭ ءبىلىم بەرۋ سالاسى ماماندارىنىڭ الدىنا قويىپ وتىرعان تالابى وتە ورىندى. جولداۋدا اتاپ كورسەتكەندەي, ءبىلىم بەرۋ باعدارلامالارىنىڭ نەگىزگى باسىمدىعى وزگەرىستەرگە ۇنەمى بەيىم بولۋ جانە جاڭا ءبىلىمدى مەڭگەرۋ قابىلەتىن دامىتۋ ءبىلىم مەكەمەلەرىنىڭ قازىرگى ۋاقىتتاعى باستى ۇستانىمدارىنىڭ ءبىرى بولۋى ءتيىس. ويتكەنى بۇل سالا زامان كوشىنەن, ۋاقىت تالابىنان قالىس قالماۋى ءتيىس. وزگەرىس قاجەت. سەرپىلىس قاجەت. مەكتەپ باعدارلامالارى دا زامان تالابىنا سايما-ساي جەتىلدىرىلىپ, جاڭارۋى ءتيىس. ال بۇل ءۇشىن بالالارعا ءدارىس بەرەتىن ۇستازداردىڭ وزدەرى ۇنەمى ىزدەنىپ, وقۋ-بىلىمدەرىن جەتىلدىرىپ, وزىق تاجىريبەلەرىن ءبولىسۋى قاجەت. «جوعارى وقۋ ورنىن بىتىرگەنمىن, قالتامدا ديپلومىم بار, مۇعالىم بولعانىما تالاي جىل بولدى, ەندى ماعان ودان ءارى وقۋ-ءبىلىمنىڭ قاجەتى جوق» دەپ ويلايتىن مۇعالىم قاتەلەسەدى. ۇستاز ءاردايىم ءبىلىمى مەن تاجىريبەسىن تولىقتىرىپ وتىرۋى قاجەت. ء«بىلىم – ينەمەن قۇدىق قازعانداي» دەپ تەگىن ايتىلماسا كەرەك. مۇنى ءار مۇعالىم ءبىر ءسات تە جادىنان شىعارماۋى ءتيىس دەپ ويلايمىن. قازىر سارىاعاش اۋدانىندا 138 ءبىلىم وشاعى بار. وندا 83 169 بالا ءبىلىم الادى. 8641 ۇستاز ءدارىس بەرەدى. ولاردىڭ ىشىندە ەڭبەك تاجىريبەسى جەتكىلىكتى مۇعالىمدەر دە, جاستار دا بار. بارلىعى دا قازىرگى ۋاقىتتا ءبىلىم مەكەمەلەرىنە جۇكتەلىپ وتىرعان ايقىن ماقسات-مىندەتتەردى جەتە ءتۇسىنىپ, سوعان سايما-ساي بولۋى ءتيىس.
باۋىرجان مايريحوۆ,
سارىاعاش اۋداندىق ءبىلىم ءبولىمىنىڭ باسشىسى
وڭتۇستىك قازاقستان وبلىسى
