ەلباسى جولداۋى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ كەڭەيتىلگەن ماجىلىسىندە دە قىزۋ تالقىلاندى. بولاشاق ونەر ماماندارىن ازىرلەپ وتىرعان وقۋ ورداسىندا جولداۋ باعىتتارىنا ورايلاستىرىلعان «ادامي كاپيتال: ينتەللەكتۋالدى ۇلت قالىپتاستىرۋدىڭ رۋحاني نەگىزدەرى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى.
كونفەرەنتسيادا ت.جۇرگەنوۆ اتىنداعى ۇلتتىق ونەر اكادەمياسىنىڭ رەكتورى بيبىگۇل ءنۇسىپجانوۆا «ادام كاپيتالى – مەملەكەت دامۋىنىڭ باستى فاكتورى» اتتى بايانداماسىندا بۇكىل الەم ەلدەرىنىڭ ونەركاسىپتىك رەۆوليۋتسيا داۋىرىنە قادام باسقانىن, جاڭا تەحنولوگيالىق ءومىر سالتىنان قازاقستاندىقتاردىڭ دا تىسقارى تۇرمايتىنىن, ساناعا تۇبەگەيلى وزگەرىستىڭ قاجەتتىلىگى تۋىنداعانىن اتاپ ءوتتى. «جاھاندىق وزگەرىستەردى قابىل الا وتىرىپ, «قازاقستان-2050» دامۋ ستراتەگياسىن, وزىق دامىعان وتىز ەلدىڭ قاتارىنا قوسىلۋ ماقساتىن جانە «100 ناقتى قادام» ۇلت جوسپارىن دامىتا وتىرىپ, «تسيفرلى قازاقستان» كەشەندىك باعدارلاماسىن قابىلداۋعا باسا نازار اۋدارىلعانى بولاشاققا جارقىن جول اشادى», دەدى بيبىگۇل نۇرعاليقىزى.
سونداي-اق كونفەرەنتسياعا قاتىسقان فيلوسوفيا عىلىمدارىنىڭ دوكتورى, پروفەسسور مۇرات ءسابيت ۇلى دا «رۋحاني جاڭعىرۋدىڭ» مادەني-الەۋمەتتىك, تاريحي تانىمدىق نەگىزدەمەلەرى تۋرالى» دەگەن بايانداماسى ارقىلى جوعارى وقۋ ورنى مەن عىلىم ءۇشىن قاجەتتى تەتىكتەر تۋرالى ءسوز ەتتى. «جولداۋ ونەر سالاسىندا باسەكەگە قابىلەتتى جاستار تاربيەلەۋمەن اينالىساتىن ءبىزدىڭ ۇجىمنىڭ پروفەسسورلىق-وقىتۋشىلار قۇرامىنا دا ۇلكەن سەرپىلىس بەرىپ وتىر», دەدى.
كونفەرەنتسياعا قاتىسقان عالىمدار يندۋستريالاندىرۋ, جاڭا تەحنولوگيالاردى ەنگىزۋ, سونىڭ ىشىندە تسيفرلاندىرۋعا بايلانىستى وزىندىك وي, تىڭ ۇسىنىستارىمەن ءبولىستى. ەكونوميكانى تسيفرلاندىرۋ ەلىمىزگە تابىس اكەلگەنىمەن, وندىرىستە جۇمىس كۇشى ازايىپ قالعان جاعدايدا ەڭبەك نارىعىندا پايدا بولاتىن كەلەڭسىز تۇيتكىلدى وڭتايلى شەشۋ جولدارىن ءسوز ەتتى. جاس بۋىن ءححى عاسىردىڭ تابيعي رەسۋرستارعا مۇقتاج عاسىر ەكەندىگىن ەسكەرە وتىرىپ, ونى ۇنەمدى ءارى ماقساتتى پايدالانۋدى ۇيرەنىپ وسسە يگى. ويتكەنى قوعامنىڭ وندىرىستىك دامۋىنا بايلانىستى ادامنىڭ تابيعاتقا اسەرى, تابيعات بايلىعىن, تابيعات كۇشتەرىن پايدالانۋى دا ارتىپ كەلەدى. عىلىمي-تەحنيكالىق جەتىستىكتەردىڭ دامۋى قورشاعان ورتاداعى ۇيلەسىمدى شيەلەنىستىرمەۋى ءتيىس.
جاڭا كەزەڭگە لايىق تولىققاندى ادام تۋراسىندا تولعامدى وي بىلدىرگەن ماماندار ءبىلىم بەرۋدىڭ جاڭا ساپاسىنا قول جەتكىزۋ ءۇشىن بۇل سالاداعى ءوزىمىزدىڭ وزىق جۇيەمىزدى قۇرۋدى جەدەلدەتۋ قاجەت دەگەن ءتۇيىن جاسادى.
ايگۇل احانبايقىزى,
«ەگەمەن قازاقستان»
الماتى
