جالپى پارتيالىق جاڭعىرۋ «جاس وتانداعى» كۇردەلى وزگەرىستەرمەن باستالدى دەۋگە تولىق نەگىز بار. بۇگىندە اتالعان قۇرىلىم قالىپتاسقان باسقارۋ جۇيەسىنەن باس تارتىپ, جاستار ۇيىمىنا ساي ەركىن نەگىزگە كوشىرىلدى. سونداي-اق, «نۇر وتان» پارتياسىنىڭ عيماراتىندا جاستاردىڭ شىعارماشىلىعىن شىڭدايتىن, ويىن تىنىقتىرىپ, جاڭا جوبانىڭ جاي-كۇيىن تالقىلايتىن ارنايى ورىن دا پايدا بولدى.
بۇگىن جاڭعىرۋ اياسىندا قايتا جاساقتالعان «جاس وتاننىڭ» جاڭا كەڭسەسىنىڭ تۇساۋكەسەر ءراسىمى ءوتتى. ءىس-شاراعا «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد ارنايى قاتىسىپ, «جاس وتاننىڭ» تىڭ باستامالارىنا ساتتىلىك تىلەدى. سونداي-اق, ول جاسوتاندىقتاردىڭ جاڭا جوبالارىنىڭ تابىستى جۇزەگە اسىرىلۋىنا پارتيا تاراپىنان جان-جاقتى قولداۋ كورسەتىلەتىنىن ايتتى.
– ەلباسى اتاپ وتكەندەي, «جاس وتان» بارلىق جاستار ۇيىمدارىنىڭ باسىن قوسىپ, قازاقستان جاستارى مەن بارشا ساياسي يننوۆاتسيالاردىڭ ۇيىتقىسى بولۋى كەرەك. پارتيا ساياسي كەڭەسىنىڭ كەڭەيتىلگەن وتىرىسىندا ەلباسى, پارتيا توراعاسى «نۇر وتان» پارتياسىمەن قاتار ونىڭ جاستار قاناتىنىڭ دا جۇمىسىن جاڭعىرتۋ جونىندە ناقتى تاپسىرمالار بەردى. سوندىقتان بيىل جاسوتاندىقتاردىڭ الدىندا اسا ماڭىزدى سىناق – «جاس وتاننىڭ» IV سەزىن وتكىزۋ مىندەتى تۇر. ءبىزدىڭ جاستارىمىز بۇل سىناقتان سۇرىنبەي ءوتىپ, وزدەرىنە جۇكتەلگەن مىندەتتەردى ابىرويمەن اتقارىپ شىعادى دەپ ەسەپتەيمىن. ويتكەنى, جاستار ءبىزدىڭ قوعامنىڭ ەڭ بەلسەندى, ارمانشىل, ءورشىل, وكىلدەرى, – دەدى مۇحتار قۇل-مۇحاممەد.
بۇل وڭ وزگەرىستەر مەن تىڭ باستامالار «جاس وتاننىڭ» جاستارعا جاقىندىعىن, جاڭا ۇسىنىستارعا اشىقتىعىن, بەلسەندى جاندارعا قولداۋ كورسەتۋگە قاشاندا دايىن ەكەندىگىن جانە ەلىمىز بەن الەمدە بولعان وقيعالاردى ءاردايىم وي ەلەگىنەن وتكىزىپ, جاڭالىقتار مەن جاڭعىرۋلارعا بەيىمدىگىن ايقىن كورسەتەدى.
