قازاق اڭىز-ەرتەگىلەرى نەگىزىندە قۇراستىرىلعان ەرمەك باتىر تۋرالى كوميكس العاش رەت اقش نارىعىنداعى Amazon پلاتفورماسىندا ساتىلىمعا قويىلدى. قۇنى - 1,99 اقش دوللارى.
Tengri سomics باسپاسىن قۇرعان ماديبەك مۇسابەكوۆ پەن بەكزات مىرزاحمەتوۆ ستۋدەنت كەزدەن بەرى تانىس ەكەن. باسپانىڭ يدەيالىق جەتەكشىسى ءارى سۋرەتشىسى, ستسەناريسى ماديبەك بولسا, ءونىمنىڭ ۇيىمداستىرۋ جانە قارجىلىق جۇمىستارىمەن بەكزات اينالىسادى.
كوميكس سيۋجەتىندە ۇزاق ساياحاتتان سوڭ ەلىنە ورالۋدى ماقسات ەتكەن ەرمەك باتىردىڭ ەرلىگى باياندالادى. قازاق حاندىعى داۋىرىنە تۇسپا-تۇس كەلگەن وقيعا تاريحي فەنتەزي جانرىنا قۇرىلعان.
– شىعارما كولەمى اۋقىمدى. كىشكەنتاي اڭگىمەدەن باستالعان اڭگىمە جاڭا كەيىپكەرلەرمەن تولىعا تۇسەدى, قازىر 1000 بەت شاماسىندا. جۇمىس ءالى جالعاسادى, – دەيدى ماديبەك.
قوس جىگىتتىڭ جۇمىس كونتەنتىن پلاتفورما باقانداي 3 اي تەكسەرۋدەن وتكىزگەن. وسىلايشا 2018 جىلى 24 قاڭتاردا Ermek the Batyr سايتتا جارىق كوردى. بەكزاتتىڭ سوزىنشە, اقش ستاندارتىمەن جۇمىس ىستەۋ وڭاي بولماعان.
– ءبىزدىڭ ماقساتىمىز – كوميكس-ءوندىرىسىنىڭ ءىرى ويىندارىنا شىعۋ. بولاشاقتا ءبىزدىڭ كوميكستەرىمىز تۋرالى فيلم تۇسىرىلسە دەپ ارماندايمىز. قازىر گولليۆۋدتا يدەيا جەتپەيدى, جاڭا اڭگىمەلەر قاشان دا سۇرانىسقا يە. ءبىزدىڭ اڭىزدارىمىز باي ءارى ارقيلى, – دەيدى ول.
