«كۇنتىزبەلىك جوسپارعا سايكەس, رەسپۋبليكالىق دەڭگەيدەگى قازاقستان كۋبوگى مەن قازاقستان چەمپيوناتىن وتكىزبەكپىز. بۇل ءبىزدىڭ كەزەكتى جارىستارىمىز. ونىمەن قوسا باسقا فەدەراتسيالارمەن بىرىككەن جارىستار ۇيىمداستىرىلادى. ەڭ ماڭىزدىسىن ايتسام, ماۋسىم ايىنىڭ ورتاسىندا كيوكۋشينكاي-كان كاراتەدەن ازيا چەمپيوناتىن وتكىزەمىز دەپ جوسپارلاپ وتىرمىز. ول - حالىقارالىق جارىس. قازىرگى ۋاقىتتا حالىقارالىق كيوكۋشينكاي-كان كاراتە فەدەراتسياسى بىزگە قولداۋ ءبىلدىردى. سوعان ساي دايىندىق جۇرگىزىلىپ جاتىر. ءبىزدىڭ قۇرامامىز ناتيجەنىڭ ەڭ جوعارعى كورسەتكىشىن سول جەردە كورسەتسە ەكەن دەگەن تىلەگىمىز بار», - دەيدى ومارحان وكسىكباەۆ استاناداعى «سارىارقا» ۆەلوترەگىندە سپورتشىلارمەن كەزدەسۋ بارىسىندا.
ەسكە سالا كەتسەك, ۋكراينانىڭ ودەسسا قالاسىنان «التىنعا تولى» قورجىنمەن ورالعان ساڭلاقتارىمىزدىڭ باسىن ۇلتتىق رەسپۋبليكالىق كيوكۋشينكاي-كان كاراتە فەدەراتسياسى بۇگىن استاناداعى «سارىارقا» ۆەلوترەگىندە قوسقان بولاتىن. قازاق سپورتشىلارى اتالعان دودادان 12 التىن, 4 كۇمىس پەن 1 قولا مەدال الىپ كەلىپ وتىر. فەدەراتسيا پرەزيدەنتى ومارحان وكسىكباەۆتىڭ ايتۋىنشا, قازاقستان سپورتشىلارى بۇرىن سوڭدى كيوكۋشينكاي-كان كاراتەدەن الەم چەمپيوناتىندا مۇنداي زور جەتىستىككە قول جەتكىزبەگەن.
