بۇل سۋلى-باتپاقتى القاپتا ءار مەرزىمدە 175 ءتۇرلى سۋدا جۇزەتىن جانە سۋ ماڭىندا ءومىر سۇرەتىن قۇستار تىرشىلىك ەتەدى. ونىڭ ىشىندە سۇڭقىلداق اققۋ, بۇيرا جانە القىزىل بىرقازان, سارى, ەگيپەتتىك جانە كىشكەنتاي اققۇتان, فلامينگو, قالباعاي, قاراباي, قاراباستى وگىزشاعالا, اققۇيرىق سۋ بۇركىتتەرى سەكىلدى 20-دان اسا قۇس قازاقستاننىڭ قىزىل كىتابىنا ەنگەن.
«قولداۋ-قازاقستان» كوپبەيىندى كوممەرتسيالىق ەمەس حولدينگى جانىنداعى «قولداۋ-ەكولوگيا» مامانداندىرىلعان ورتالىعىنىڭ جەتەكشىسى ءا.قوزىباقوۆتىڭ سوزىنشە, قۇستار ساناعى الەمنىڭ 100-دەن استام ەلىندە 1967 جىلدىڭ قاڭتار ايىنىڭ ورتاسىنان باستاپ جۇرگىزىلە باستاعان. قازىردە بۇل ساناق جىل سايىن ۇيىمداستىرىلادى.
قاراقيا-قاراكول مەملەكەتتىك ەكولوگيالىق قورىقشاسىنىڭ بولىگى بولىپ ەسەپتەلەتىن قاراكولدەگى قۇستار ساناعىنىڭ ناتيجەسىندە, بالالار 6 سۇڭقىلداق اققۋدى, 4 مىڭعا جۋىق سىبىرلاق اققۋدى, 300-دەن اسا بارىلداۋىق (جابايى ۇيرەك), 70 سۇڭگۋىر ۇيرەكتى, 50-گە جۋىق وزەن قارقىلداۋىعىن, 2 انىقتالماعان يتەلگى, 3 اققۇيرىق سۋبۇركىتىن جانە 200-دەي ءار ءتۇرلى شاعالالاردى سانادى جانە جاس ەكولوگتار ساراپتاما ءۇشىن اۋانىڭ, سۋدىڭ, توپىراقتىڭ سىنامالارىن الدى. PASCO امبەباپ قۇرالىنىڭ كومەگىمەن سۋدىڭ, توپىراقتىق, اۋانىڭ تەمپەراتۋراسىن انىقتاپ, اۋا ىلعالدىلىعىن, بارومەتريالىق قىسىمدى سۋ مەن توپىراق قىشقىلدىعىن ولشەدى.
– قاراكولدەگى قۇستاردىڭ سانى جونىندەگى ءبىزدىڭ ءۇش جىل بويى جيناعان دەرەكتەرىمىز ورنيتولوگ-ماماندارعا سۋدا جانە ونىڭ ماڭىندا ءومىر سۇرەتىن قۇستار جونىندەگى اقپاراتتى جاھاندىق تۇرعىدان كورۋگە كومەك بەرەدى دەگەن ۇمىتتەمىز. ساناق بارىسىندا الىنعان ۇلگىلەر قاراكولدەگى تىرشىلىك ەتەتىن جانۋارلاردىڭ پروبلەمالارىن زەرتتەۋ ءۇشىن جۇرگىزىلەتىن عىلىمي جوبالارعا پايدالانىلادى, – دەيدى اتالعان مەكتەپ ديرەكتورىنىڭ عىلىمي-ادىستەمەلىك جۇمىستارى جونىندەگى ورىنباسارى باقىتگۇل جاقسىلىقوۆا.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
