اتالعان نىسانداردىڭ قۇرىلىسى ەكى جىل بۇرىن قولعا الىنعان بولاتىن. مىسالى, كبكب كراسنوگور كەنىشىنىڭ №17 جاڭا كارەرىندەگى كەن جىنىستارىن اشۋ جۇمىستارى 2016 جىلعى قاڭتاردا باستالعان ەدى. تاۋلىگىنە 18 مىڭ تەكشە مەتر شاماسىندا كەن جىنىسى تيەلىپ, شىعارىلىپ وتىردى. ۇزىندىعى – 2 شاقىرىم, ەنى – 0,9 شاقىرىم, تەرەڭدىگى 111 مەتر كارەردەن ارشىلاتىن جىنىستىڭ جالپى كولەمى 53 ملن تەكشە مەتردەن استام بولاتىن. ونىڭ قۇرىلىسىمەن قاتار بوكسيت توگەتىن قويماعا اپارار كولىك جولى توسەلىپ, سۋ تارتقىش جانە كەرنەۋى 6 كۆ ەلەكتر قۋاتىنىڭ ءۇش جەلىسى تارتىلدى. قازىر №17 كارەردەگى تازا كەننىڭ العاشقى تونناسى ءوندىرىلدى. جىل باسىنان جۇمىس ۇدەرىسى قارقىن الدى. وعان بەس ەكسكاۆاتور, توعىز اۆتوساموسۆال, ءۇش بۋلدوزەر مەن ءبىر اۆتوگرەيدەر ىسكە جۇمىلدىرىلعان. وسى كارەردەن جىلىنا 1 ملن تونناعا دەيىن بوكسيت كەنىن ءوندىرۋ جوسپارلانىپ وتىر.
ال ايات كەنىشىنىڭ №9 كارەرىندە بوكسيت ءوندىرىسى قاڭتار ايىنىڭ سوڭىندا باستالماق. بۇل كارەردىڭ ۇزىندىعى – 700 مەتر, ەنى – 600 مەتر, تەرەڭدىگى 119 مەتر بولادى. جارىلىس جۇمىستارىنان كەيىن بوكسيت كەنىن ءوندىرۋ قولعا الىنادى. اۆتوجول, سورعى ستانساسى, سۋ بۇرعىش, ەلەكتر قۋاتى جەلىسى, جارىقتاندىرۋ ءۇشىن باعاندار قۇرىلىسى اياقتالعان. بۇگىننىڭ وزىندە كارەردە ەكى ەكسكاۆاتور, ءتورت اۆتوساموسۆال, بۋلدوزەر جانە اۆتوگرەيدەر جۇمىس ىستەۋدە.
– كەنىشتەردەگى كارەرلەردى جاڭعىرتۋ قۇرىلىسىنا 6 ميلليارد تەڭگەدەن استام ينۆەستيتسيا جۇمسالدى. جوبا ايات جانە كراسنوگور كەنىشتەرى قۋاتىن جانە شاحتانىڭ ساپالى كورسەتكىشتەرىن ساقتاۋ, 2018 جىلعا ارنالعان وندىرىستىك جوسپاردى تولىق ورىنداۋ ءۇشىن جۇزەگە اسىرىلدى. ءبىز وندىرىستىك كورسەتكىشتەردى ورىنداۋعا جانە پاۆلودار اليۋميني زاۋىتىنا بوكسيتتى جەتكىزۋگە دايىنبىز, – دەدى «قازاقستان ءاليۋمينيى» اق فيليالى – كراسنووكتيابر بوكسيت كەن باسقارماسىنىڭ ديرەكتورى سەرگەي ششەلوكوۆ.
قازىر كراسنووكتيابر بوكسيت كەن باسقارماسىنىڭ شىعىس ايات كەن ورنىندا تاعى ءبىر كارەردىڭ قۇرىلىسى ءجۇرىپ جاتىر. كەنىشتەردەگى مۇنداي جاڭعىرتۋ قۇرىلىس جۇمىستارى 2020 جىلعا دەيىن جالعاسادى.
ءنازيرا جارىمبەت,
«ەگەمەن قازاقستان»
قوستاناي وبلىسى,
ليساكوۆ قالاسى
