سونداي-اق فورۋمدا ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا كورسەتىلگەن باسىم باعىتتاردى جۇزەگە اسىرۋ كەزىندەگى مەگاپوليستىڭ دامۋ پەرسپەكتيۆاسى كەڭىنەن ءسوز بولدى.
فورۋم جۇمىسىنا «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد, استانا قالاسىنىڭ اكىمى اسەت يسەكەشەۆ, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ەلدار جۇماعازيەۆ, پارلامەنت ءماجىلىسىنىڭ دەپۋتاتتارى, «اقىلدى قالا» تەحنولوگيالارىن ەنگىزۋگە تىكەلەي قاتىسقان IT-كومپانيالاردىڭ, ەلوردالىق جوعارى وقۋ ورىندارىنىڭ, يننوۆاتسيا ورتالىقتارىنىڭ, يندۋستريالىق-يننوۆاتسيالىق كومپانيالاردىڭ, سونداي-اق شاعىن جانە ورتا بيزنەستىڭ وكىلدەرى قاتىستى.
جيىندى اشقان «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد ەلوردانىڭ 20 جىلدا قول جەتكىزگەن جەتىستىكتەرىنە نازار اۋداردى. ول ءوز سوزىندە استانا تاۋەلسىز قازاقستاننىڭ مۇلدە جاڭا داۋىرىنە جول اشقانىن ەرەكشە اتاپ ءوتتى. «تاۋەلسىزدىك جىلدارى ءبىز ۇلتتىق يدەيا تۋرالى كوپ اڭگىمە قوزعادىق. ەگەر شىندىعىن ايتار بولساق, ەلباسىنىڭ عاجايىپ جوباسىمەن دۇنيەگە كەلگەن ەلوردامىز 20 جىل بويى ەڭ باستى ۇلتتىق يدەيا رەتىندە حالقىمىزدى وركەنيەت بيىگىنە باستاپ كەلەدى. استانا بۇگىندە جاھاندىق ساياسي ۇدەرىستەر مەن بىتىمگەرشىلىك باستامالاردىڭ بەلدى قاتىسۋشىسى رەتىندە الەم كارتاسىنان ويىپ تۇرىپ ورىن الدى. از ۋاقىتتىڭ ىشىندە استانا دۇنيە جۇزىنە كونفەسسياارالىق كەلىسىم مەن ۇلتارالىق تاتۋلىقتىڭ التىن بەسىگى رەتىندە تانىلدى. ەلوردامىز بۇكىل الەمدى بەيبىتشىلىككە شاقىرعان حالىقارالىق فورۋمداردىڭ ۇيىتقىسىنا دا اينالىپ ۇلگەردى. الەمگە ايگىلى ينۆەستورلاردىڭ قىزىعۋشىلىعىن وياتقان باس قالامىز شىن مانىندە ءىرى قارجى ورتالىعىنا اينالىپ, حالقىمىزدىڭ ۇلتتىق برەندى بولىپ قالىپتاستى. اسا زور تابىسپەن وتكىزىلگەن ەكسپو-2017 حالىقارالىق كورمەسى دە استانانىڭ يننوۆاتسيالىق الەۋەتىن ايقىن كورسەتىپ بەردى», دەدى م.قۇل-مۇحاممەد.
فورۋم اياسىندا استانانىڭ دامۋى جانە الەۋمەتتىك-ەكونوميكالىق جەتىستىكتەرى تۋرالى قالا اكىمى اسەت يسەكەشەۆ ەسەپ بەردى. ودان بولەك اكىم ەلوردانى جاھاندىق دەڭگەيدەگى اقىلدى تسيفرلى قالاعا اينالدىرۋ ستراتەگياسىن جۇزەگە اسىرۋ جۇمىستارىنا دا توقتالدى. «سوڭعى 20 جىلدا جالپى وڭىرلىك ءونىم 190 ەسەگە ءوستى. مەملەكەتتىك بيۋدجەتكە تۇسىمدەر 80 ەسەگە ارتتى, ياعني 1997 جىلداعى 13 ميلليارد تەڭگەدەن 2017 جىلداعى تريلليون تەڭگەگە دەيىن جەتتى. جيىرما جىلدا تۇرعىن ءۇي قۇرىلىسىنا 1 تريلليون 600 ميلليارد تەڭگە سالىنىپ, 180 مىڭعا جۋىق پاتەردى قامتيتىن 1 265 تۇرعىن ءۇي پايدالانۋعا بەرىلدى. سوڭعى بەس جىلدا استانادا 9 ميلليون شارشى مەتردەن استام باسپانا تاپسىرىلدى. اتاپ ايتقاندا, 5 جىل ىشىندە 300 مىڭ ادامعا ارنالعان قالا سالىنىپ شىقتى, ياعني بۇل ورتاشا وبلىس ورتالىعى سەكىلدى اۋماق استانادا پايدا بولعانىن بىلدىرەدى», دەدى ول.
وسى ورايدا ءا.يسەكەشەۆ بۇل كورسەتكىشتەر ۇلكەن جەتىستىكتەردى بىلدىرەتىنىن, دەگەنمەن الداعى ۋاقىتتا دا ەلەۋلى جۇمىستار كۇتىپ تۇرعانىن اتاپ ءوتتى. «20 جىلدا استانادا 1 172 وندىرىستىك, الەۋمەتتىك-مادەني ءارى قوعامدىق ماڭىزداعى نىساندار سالىندى. نەگىزگى كاپيتالعا ينۆەستيتسيالاردىڭ جىلدىق كولەمى 1997 جىلدان بەرى 44 ەسەگە ءوستى جانە 20 جىلدا جالپى 8 تريلليون تەڭگەنى نەمەسە 47 ميلليارد دوللاردى قۇرادى. بۇل ۇدەرىس 2017 جىلى دا جالعاسىن تاپتى, ياعني ەكسپو-نى وتكىزۋدىڭ ارقاسىندا بىزدە وڭ ەكونوميكالىق كورسەتكىشتەر بايقالدى. 2017 جىلى ەلوردانىڭ ەكونوميكاسىنا 945 ميلليارد تەڭگە ينۆەستيتسيا تارتىلعان بولسا, ونىڭ 70 پايىزى جەكە ينۆەستيتسيا ۇلەسىنە تيەسىلى», دەدى استانا اكىمى.
سونداي-اق وتىرىسقا قاتىسقان سپيكەرلەر «سەرگەك» بەينەباقىلاۋ باعدارلامالىق جۇيەسى, باس شاھارداعى ءتۋريزمدى دامىتۋ, Smart City جۇيەسىن كەشەندى ەنگىزۋ جانە يننوۆاتسيالىق باستامالارعا استانالىق جوعارى وقۋ ورىندارىنىڭ قاتىسۋ دەڭگەيى جونىندە كەڭىنەن ايتتى. «تسيفرلى قازاقستان» مەملەكەتتىك باعدارلاماسىن جۇزەگە اسىرۋداعى ناقتى مىندەتتەر جونىندە پىكىر الماسىپ, مەملەكەت باسشىسى جولداۋداعى باسىم باعىتتار ارقىلى ەلىمىزدىڭ تەحنولوگيالىق جانە ينفراقۇرىلىمدىق دامۋىنا تىڭ سەرپىن بەرۋدىڭ تەتىكتەرىن ءسوز ەتتى. بۇل باستامالار استانانىڭ ودان ءارى دامۋىنا دا وڭ اسەرىن تيگىزەرى ءسوزسىز.
سول سياقتى دامۋدىڭ يننوۆاتسيالىق باعىتىن «اتامەكەن» ۇكپ باسقارما توراعاسىنىڭ ورىنباسارى ە.جۇماعازيەۆ تە قولداپ, بۇگىندە استانالىق كاسىپكەرلەرگە بيزنەس ءۇشىن بارلىق جاعداي جاسالعانىن تىلگە تيەك ەتتى. مۇنداعى قىزمەت كورسەتۋ ساپاسى مەن تۇرلەرى بيزنەس-قاۋىمداستىقتىڭ جۇمىسىن ايتارلىقتاي جەڭىلدەتەدى. وسىنداي يننوۆاتسيالىق باستامالاردىڭ باستى تۇتىنۋشىسى سانالاتىن بيزنەس وكىلدەرى دە تاپسىرىس بەرۋ ارقىلى استانانىڭ دامۋىنا ءوز ۇلەستەرىن قوسۋدا.
«نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەد جاڭا تەحنولوگيالاردى ەنگىزۋ باستاماسىن قولداپ, «اقىلدى قالالار» وڭىرلەردىڭ دامۋىنا, يننوۆاتسيانىڭ كەڭىنەن تارالۋىنا, ەلىمىزدىڭ ءار تۇكپىرىندەگى حالىقتىڭ تۇرمىس جاعدايىن جاقسارتۋعا ۇلكەن ۇلەس قوساتىن نەگىزگى كۇش ەكەنىن ايتتى. «استانانىڭ «اقىلدى قالا» رەتىندە سالىنۋى ونىڭ تابيعاتى تازا, ءومىر ساپاسىنىڭ جوعارى ستاندارتتارىنا ساي شاھار بولىپ قالىپتاسۋىنا زور مۇمكىندىك بەرەدى. بۇگىندە ەلىمىزدىڭ ينۆەستيتسيالىق احۋالى ءىرى مەگاپوليستەردىڭ قۇرىلۋىنا جول اشۋدا. ويتكەنى ينۆەستورلار بارلىق جاعداي جاسالعان, جۇمىس ىستەۋگە قولايلى, قاۋىپسىز جەرلەرگە كەلەدى. دۋباي – تاياۋ شىعىسقا, سينگاپۋر وڭتۇستىك شىعىس ازياعا قالاي ۇلگى بولسا, استانا دا ورتالىق ازياعا ۇلگى بولۋى كەرەك. ءبىزدىڭ ەلدىڭ وعان كۇش-قۋاتى, الەۋەتى, يننوۆاتسيالىق جانە ينۆەستيتسيالىق دەڭگەيى ابدەن جەتەدى. سوندىقتان «نۇر وتان» پارتياسى الداعى ۋاقىتتا استانانىڭ تسيفرلى تەحنولوگيا مەن يننوۆاتسيانى ەنگىزۋدەگى تاجىريبەسىن قازاقستاننىڭ بارلىق قالاسىندا جۇزەگە اسىرۋعا جان-جاقتى قولداۋ كورسەتۋگە ارقاشان دايىن», دەدى م.قۇل-مۇحاممەد.
ايتا كەتەيىك, فورۋم سوڭىندا قاتىسۋشىلار استانانىڭ دامۋىنا وڭ اسەرىن تيگىزەتىن بىرقاتار ناقتى ۇسىنىستاردى قابىلدادى.
نۇرلىبەك دوسىباي,
«ەگەمەن قازاقستان»
