ءىس-شاراعا پرەزيدەنت اكىمشىلىگى باسشىسىنىڭ ورىنباسارى تالعات دوناقوۆ, جوعارى سوت كەڭەسىنىڭ توراعاسى اناتولي سمولين, پارلامەنت سەناتى مەن ماجىلىسىندەگى كوميتەتتەردىڭ توراعالارى گەورگي كيم مەن نۇرلان ءابدىروۆ, قازاقستان رەسپۋبليكاسىنداعى ادام قۇقىقتارى جونىندەگى ۋاكىل اسقار شاكىروۆ, قازاقستان حالقى اسسامبلەياسى توراعاسىنىڭ ورىنباسارى دارحان مىڭباي, رەسپۋبليكالىق ادۆوكاتتار القاسىنىڭ توراعاسى ءانۋار تۇگەل قاتىستى.
كەڭەسكە باس پروكۋراتۋرانىڭ, ادىلەت مينيسترلىگىنىڭ, «اتامەكەن» ۇكپ, رەسپۋبليكالىق نوتارياتتار پالاتاسىنىڭ, ادۆوكاتتار القاسىنىڭ وكىلدەرى, وتستاۆكاداعى سۋديالار, سونداي-اق حالىقارالىق ساراپشىلار شاقىرىلدى. سونداي-اق وتىرىستى بەينەبايلانىس ارقىلى جەرگىلىكتى سوتتار, وبلىستاردىڭ, استانا جانە الماتى قالالارى اكىمدەرىنىڭ ورىنباسارلارى, وڭىرلەردەگى پروكۋراتۋرا, ادۆوكاتۋرا, «اتامەكەن» ۇكپ جانە وزگە دە مەملەكەتتىك ورگانداردىڭ وكىلدەرى باقىلادى.
كەڭەستىڭ العاشقى بولىگىندە جوعارعى سوتتىڭ القا توراعالارى قىلمىستىق, ازاماتتىق, اكىمشىلىك ىستەر جانە ينۆەستيتسيالىق داۋلار بويىنشا سوت تورەلىگىن جۇزەگە اسىرۋدىڭ قورىتىندىسى تۋرالى باياندادى. بۇدان ءارى ج.اسانوۆ ءسوز سويلەپ, سوت جۇيەسى قىزمەتىنىڭ وزەكتى ماسەلەلەرىنە توقتالىپ ءوتتى. اتاپ ايتقاندا, ول تاياۋ بولاشاقتا سوتتىڭ قالاي وزگەرەتىنى, قازاقستان دامىعان ەلدەردىڭ «وتىزدىعىنا» كىرۋى ءۇشىن سوت بيلىگى مەن ءاربىر سۋديا نە ىستەۋى كەرەكتىگى جونىندە, ازاماتتاردىڭ سوتتارعا سەنىمىن ارتتىرۋدىڭ جولدارى تۋرالى ويلارىمەن ءبولىستى.
جوعارعى سوت توراعاسى ءوزىنىڭ ۇندەۋى بويىنشا سۋديالار كورپۋسى, پروكۋرورلار, ادۆوكاتتار, مەملەكەتتىك ورگاندار مەن ازاماتتىق قوعامنىڭ وزگە دە وكىلدەرى تاراپىنان كوپتەگەن ۇسىنىس-پىكىرلەردىڭ كەلىپ تۇسكەنىن مالىمدەدى. ول «100 ناقتى قادام» ۇلت جوسپارىن, «تسيفرلى قازاقستان» جانە «رۋحاني جاڭعىرۋ» باعدارلامالارىن ىسكە اسىرۋ تۇرعىسىنداعى سوت جۇيەسىن ودان ءارى جاڭعىرتۋ بويىنشا ۇسىنىستار كەلىپ تۇسكەنىن اتاپ ءوتتى.
ال القالى جيىننىڭ ەكىنشى بولىگىندە سوت ءجيۋريىنىڭ توراعاسى مورياك شەگەنوۆ, سوت تورەلىگى اكادەمياسىنىڭ رەكتورى تولەش قاۋدىروۆ جانە بىرقاتار وبلىستىق سوتتاردىڭ توراعالارى ءوز قىزمەتتەرى تۋرالى باياندادى. جوعارى سوت كەڭەسىنىڭ توراعاسى اناتولي سمولين دە ءسوز سويلەدى.
ج.اسانوۆ ءىس-شارانى اياقتاي كەلە, بارلىق سۋديالار مەن قوعام وكىلدەرىن سوتتار قىزمەتىن جاقسارتۋ باعىتىنداعى جۇمىسقا بەلسەنە قاتىسۋعا شاقىردى.
ايتا كەتەيىك, جيىن سوڭىندا 2017 جىلعى رەسپۋبليكالىق بايقاۋ-كونكۋرستىڭ جەڭىمپازدارىن ماراپاتتاۋ ءراسىمى ءوتتى. اۋداندىق جانە وعان تەڭەستىرىلگەن سوتتار اراسىندا سولتۇستىك قازاقستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى – ءبىرىنشى, وڭتۇستىك قازاقستان وبلىسىنىڭ ارىس اۋداندىق سوتى – ەكىنشى, اتىراۋ وبلىسىنىڭ ماحامبەت اۋداندىق سوتى ءۇشىنشى ورىندى يەلەندى. وبلىستىق جانە وعان تەڭەستىرىلگەن سوتتاردىڭ اراسىندا پاۆلودار (1-ورىن), اقتوبە (2-ورىن) جانە شىعىس قازاقستان وبلىستىق (3-ورىن) سوتتارى ۇزدىكتەر قاتارىنان كورىندى.
نۇرلىبەك دوسىباي,
«ەگەمەن قازاقستان»
