سۋرەت وسكەمەن قالاسى اكىمىنىڭ ءباسپاسوز قىزمەتىنەن الىندى
ء«بىز تالاي جۇرتتى ابىگەرگە سالعان ساقىلداعان سارى ايازدا قالا تۇرعىندارىنا جاردەم كورسەتكەن كەڭپەيىل ازاماتتاردىڭ قامقورلىعىن ەسكەرۋسىز قالدىرماۋدى ءجون كوردىك. ولار ءوز كولىكتەرىمەن تۇرعىنداردى ۇيىنە, جۇمىسىنا دەيىن ءبىر تيىن دا سۇراماستان جەتكىزىپ سالدى. قالامىزدا وسىنداي قايىرىمدى جانداردىڭ بار ەكەنىن ماقتان تۇتامىز, شاھار تۇرعىندارى اتىنان العىس بىلدىرەمىز. مۇنداي ازاماتتاردى جۇرتقا ۇلگى ەتۋىمىز كەرەك», - دەدى قالا اكىمى قۋات تۇماباەۆ.
«جاقسىنىڭ جاقسىلىعىن ايت نۇرى تاسىسىن» دەمەكشى, قالا تۇرعىندارىن تەگىن تاسىمالداعان ازاماتتاردىڭ ەسىمدەرىن اتاپ ءوتۋدىڭ ارتىعى بولماس. ولار: اسحات وقاشەۆ, ليا كريۆولاپوۆا, زارينا ەسكەندىروۆا جانە نۇرعابىل سقاقوۆ. شاھار تۇرعىندارى الەۋمەتتىك جەلىلەردە بۇل كىسىلەر تۋرالى جىلى پىكىر ءبىلدىرىپ, ءتىپتى كولىكتەرىنىڭ نومىرلەرىنە دەيىن كورسەتىپتى. تۇرعىنداردىڭ وسىنداي ۇسىنىس-پىكىرلەرى ماراپاتتاۋعا نەگىز بولعانىن جەتكىزگەن قالا اكىمى شاھارداعى «Helios», «Sinooil», «شتيف» سەكىلدى جانارماي بەكەتتەرىن يگى ىسكە اتسالىسۋعا شاقىردى.
ازامات قاسىم,
«ەگەمەن قازاقستان»
وسكەمەن
