وڭتۇستىك كورەيانىڭ پەنچانگ قالاسىندا 9-25 اقپان ارالىعىندا XXIII قىسقى وليمپيادا ويىندارىنىڭ جالاۋى جەلبىرەيتىنى ايان. ءدۇبىرلى سايىسقا وراي, سەيسەنبى كۇنى وڭتۇستىك شاھاردا بۇكىالەمدىك بوكس اكادەمياسىندا قر ۇوك, قر مادەنيەت جانە سپورت مينيسترلىگى مەن قۇزىرلى مەكەمەلەردىڭ قاتىسۋىمەن سپورتشىلارىمىزدى رەسمي تۇردە شىعارىپ سالۋ ءراسىمى ءوتتى.
قازىرگى تاڭدا قازاقستان سپورتشىلارى قىستىق سپورتتىڭ بىرنەشە تۇرىنەن 49 ليتسەنزيا ۇتىپ الدى. ولاردىڭ قاتارىندا مەدالعا دەگەن ۇمىتكەرلەر دە از ەمەس. ەلسيار قاناعاتوۆتىڭ ايتۋىنشا ولار فريستايلشىلار دميتري رەيxارد, يۋليا گالىشەۆا, جانبوتا الدابەرگەنوۆا, مانەرلەپ سىرعاناۋشى دەنيس تەن, شاڭعىشى الەكسەي پولتورانين سىندى ساڭلاقتار.
– سپورتشىلاردىڭ دايىندىعى ويداعىداي. قر ۇوك, فەدەراتسيالاردىڭ جانە قر مسم تاراپىنان قولداۋ كورسەتىلۋدە. بىرنەشە كۇندە ليتسەنزيالارىمىزدىڭ سانى انىق بەلگىلى بولادى. سپورتشىلارىمىزعا جەڭىس تىلەيمىز! – دەدى قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ.
ال پەنچانگ قالاسىنداعى قىسقى وليمپيادا ويىندارى ەكى كلاستەردە ورنالاسقان 12 سپورتتىق نىسانىندا وتكىزىلەدى. پەنچانگ تاۋلى كلاستەرىندە شاڭعى سپورتىنان جارىستار وتسە, جاعاجايداعى كاننىڭ كلاستەرىندە كونكي سپورتىنىڭ شەبەرلەرى ءوزارا مىقتىنى انىقتايتىن بولادى. قازاقستان سپورتشىلارى وڭتۇستىك كورەياعا ءبىرىنشى اقپاننان باستاپ اتتانا باستايدى.
– وسى تارتىستى دوداعا دايىندىق قارقىندى تۇردە وتۋدە. ءوزىمدى جاقسى جاعىمنان كورسەتىپ, ءبىر ناتيجەگە قول جەتكىزسەم دەيمىن. ءبىزدىڭ سپورت تۇرىنەن قازىر 3 ليتسەنزيا بار. مەنەن بولەك العاشقى رەت وليمپيادادا اقمارجان كالمۇرزاەۆا مەن مارجان اقجىگىت ونەر كورسەتەدى. ءتورتىنشى ليتسەنزيانى جىبەك اراپباەۆا جەڭىپ الادى دەپ ويلايمىز. بۇل مەن ءۇشىن ەكىنشى وليمپيادا. قوبالجىپ ءجۇرمىن, ويتكەنى ماعان سەنىم ارتۋشىلار كوپ, 2014 جىلى العاش بارعانىمدا قازىرگىدەي جاۋاپكەرشىلىك بولماعان ەدى, – دەدى باق وكىلدەرىمەن بەرگەن سۇحباتىندا فريستايل-اكروباتشى جانبوتا الدابەرگەنوۆا.
سالتاناتتى شارا بارىسىندا قر ۇوك پرەزيدەنتى تيمۋر ق ۇلىباەۆ پەن قر مادەنيەت جانە سپورت ۆيتسە-ءمينيسترى ساكەن مۇسايبەكوۆ سپورتشىلارىمىزعا جەڭىس تىلەپ, اتتاندىردى. ەل نامىسىن قورعايتىن سپورتشىلار ءوز العىستارىن ءبىلدىرىپ, ەل ءۇمىتىن اقتاۋعا تىرىسامىز دەستى.
ايناش ەسالي,
«ەگەمەن قازاقستان»
الماتى
