ەلباسى نۇرسۇلتان نازارباەۆ «بولاشاقتا ەڭبەك ەتىپ, ءومىر سۇرەتىندەر – بۇگىنگى مەكتەپ وقۋشىلارى, مۇعالىم ولاردى قالاي تاربيەلەسە, قازاقستان سول دەڭگەيدە بولادى. سوندىقتان ۇستازعا جۇكتەلەتىن مىندەت اۋىر», دەپ اتاپ كورسەتكەن بولاتىن. ۇرپاققا تاربيە بەرۋ, ءبىلىم نارىمەن سۋسىنداتۋ – قىزمەت قانا ەمەس, قاسيەتتى پارىز. سوندىقتان ۇستاز بولۋدى جۇرەكتىڭ باتىرلىعى دەپ باعالاۋعا بولادى.
مەن وسكەن ورتادا ساباقتى جاقسى وقىعاندار مۇعالىم بولۋعا ءتيىس سەكىلدى سانالاتىن. اتتەستاتىم قولعا تيىسىمەن مۇعالىمدىكتى تاڭداۋىم سول ءتارتىپتىڭ ناتيجەسى بولار. ايلىعىنان قاعازى كوپ بولسا دا, مەكتەبىن وزگە كاسىپكە ايىرباستاماي كەلە جاتقان ۇستازداردىڭ ەڭبەگى ەرەن. شاكىرت ساناسىنا ءبىلىم ءنارىن سەۋىپ, ەل بولاشاعىنىڭ ورەندەرىن تاربيەلەپ شىعارۋ شەكتەۋسىز ەڭبەكتى, تەرەڭ ءبىلىمدى قاجەت ەتەدى. ۇستاز بولۋ – جۇرەك جىلۋىن, مەيىرىم شۋاعىن, ادامگەرشىلىك ۇلىلىعىن بالانىڭ بويىنا دارىتۋ. ءار ءۇيدىڭ ەركە بالاسىنا تالاپ قويا وتىرىپ, تارتىپكە شاقىرۋ وڭاي ەمەس. الايدا مۇعالىمنىڭ باسقا ەشكىمدە جوق ءبىر قارۋى بار, ول – ءبىلىمى مەن تاجىريبەسى. ءتاسىلىن تاپقان بالۋانداي ول دا ءار ساباعىنىڭ سوڭىندا جەڭىسكە جەتىپ وتىرادى. جىلدار بويى وقۋ مەن ۇيرەنۋدەن جالىقپايتىن ءبىر جان بولسا, ول – مۇعالىم! سونىڭ ناتيجەسىندە ءوز ءىسىنىڭ شەبەرى, ۇزدىگى انىقتالاتىن سايىستارعا ءبىلىمدى مۇعالىم قورىقپاي قاتىسا الادى. قوعامنىڭ مۇعالىمگە كوڭىل اۋدارعانى, ەڭبەگىنە لايىق ماراپاتتاعانى, ارينە, قۋانتادى.
«ۇستازىڭدى ۇلى اكەڭدەي سىيلا» دەگەن ءسوز بار. مۇعالىمنىڭ ءوز ءتارتىبى مەن مادەنيەتى, ءوزىن ءوزى ۇستاۋى مەن كيىنۋ ونەگەسى دە وقۋشىنىڭ بولاشاق ازىعى. قانشا ۋاقىت وتسە دە, ادام ۇستازى ءۇشىن شاكىرت قالپىندا, ال ۇستاز ءتالىم ەگۋشى قالپىندا قالادى. ەسكە الار ءساتتىڭ جاقسى بولعانى, ايتىلعان اڭگىمەنىڭ ماڭىزدى بولعانىنا نە جەتسىن؟ ادام بالاسى قۇندىلىق دەپ تانيتىن اتاۋلاردىڭ ءبىرى – سىيلاستىق ءسوزى مۇعالىمگە قاراتا ايتىلعانداي. وقۋشىنى سىرتقى الەممەن بايلانىستىراتىن بىردەن-ءبىر جاندى اقپارات كوزى – مۇعالىم, قۇرالى – ونىڭ ساباعى. ەندەشە, مۇعالىم ءار ساباعىن مازمۇندى ءارى قىزعىلىقتى وتكىزۋگە ءتيىس. بۇل – ءومىر تالابى. ۇرپاق بولاشاعى, حالقىمىزدىڭ كەلەشەگى قازىرگى ۇستازداردىڭ قولىندا.
قازىرگى مۇعالىم ءيميدجى قانداي؟ جاڭا زاماننىڭ مەكتەبىنە قانداي مۇعالىم لايىق؟ وقۋشىلارعا قانداي مۇعالىم ۇنايدى؟ مىنە, بۇگىنگى قوعامدى, مينيستردەن باستاپ, مەكتەپ باسشىلارى مەن قوعامدىق ۇيىمداردى وسى ماسەلەلەر ويلانتۋى كەرەك. بۇگىنگى تاڭدا ەلىمىزدىڭ ءبىلىم بەرۋ جۇيەسىندە وقىتۋ پروتسەسىن تىڭ يدەيالارعا نەگىزدەلگەن جاڭا مازمۇنمەن قامتاماسىز ەتۋ مىندەتى تۇر.
ءبىلىم بەرۋدىڭ باستى ماقساتى – كەلەشەك ومىرگە بەلسەندى ارالاسۋعا دايىن قۇزىرەتتى تۇلعانى قالىپتاستىرۋعا ىقپال ەتۋ. مەن ەڭبەك ەتەتىن وقۋ ورداسى – ءتۇرلى پاندەردى تەرەڭدەتىپ وقىتاتىن دارىندى بالالارعا ارنالعان وبلىستىق مامانداندىرىلعان مەكتەپ-ينتەرنات اتالعان ماقساتتى جۇزەگە اسىرۋدا وزىندىك تاجىريبەسى مەن جولى بار مەكتەپ. مۇعالىمدەرىمىز تۇگەلدەي دەرلىك جاڭاشا وقىتۋ مازمۇنىنا نەگىزدەلگەن ارنايى كۋرستاردان وتكەن. وسى ءبىلىم مەكەمەسىندە ينفورماتيكا پانىنەن ساباق بەرە ءجۇرىپ, رەسپۋبليكا دەڭگەيىندە تانىمال ۇزدىك پەداگوگتارمەن يىقتاسا جۇمىس ىستەيتىنىمە ەلىمىزدىڭ ءبىلىم بەرۋ قىزمەتىنە ءوز ۇلەسىمدى قوسا العانىما قۋانامىن. ال مەنىڭ الدىمدا ءوز جولىمدى قالىپتاستىرۋعا باعىتتالعان جاڭا يدەيالار مەن سمارت-ماقساتتارىم بار. 2014 جىلدىڭ قازان ايىندا استانا قالاسىندا وتكەن «ZIAT» عىلىمي-ادىستەمەلىك ورتالىعى ۇيىمداستىرعان «مەنىڭ ۇزدىك پرەزەنتاتسيالىق ساباعىم» اتتى مۇعالىمدەر سايىسىندا «ساباق بەرۋ كەزىندەگى پرەزەنتاتسيانىڭ قولدانىلۋى» تاقىرىبىنداعى جۇمىسىم قازىلار تاراپىنان جوعارى باعالانىپ, ءى دارەجەلى ديپلوممەن ماراپاتتالدىم. ىزدەنۋشى-پەداگوگ رەتىندە جاڭا ماقساتتاردى بەلگىلەپ, وقۋشىلاردى عىلىمي جوبالارعا قىزىقتىرۋىما تاعى ءبىر جول اشىلدى. مەن جاس مۇعالىمدەردىڭ الار اسۋى ءالى دە كوپ ەكەنىنە سەنەمىن.
ماقساتىما جەتۋ ءۇشىن, ەڭ الدىمەن ءبىلىم بەرۋدىڭ جاڭا تاسىلدەرىن بويىما ءسىڭىرۋدى جالعاستىرىپ كەلەمىن. ەلىمىزدىڭ پەداگوگ قىزمەتكەرلەرىنىڭ بىلىكتىلىگىن ارتتىرۋ ماقساتىندا جاسالعان باعدارلامانىڭ باسىم بولىگىندە ءتۇرلى تاسىلدەردى, سىندارلى وقىتۋ تەورياسى نەگىزدەرىن قامتىعان. مىنە, وسى سىندارلى وقىتۋدى نەگىزگە العان باعدارلامانى يگەرۋ بارىسىندا جەتى ءمودۋلدى وقىپ, ساباقتىڭ قاي جەرىندە قالاي كىرىكتىرىلۋى كەرەك ەكەندىگىن ۇيرەندىم. بۇل مەن ءۇشىن ۇلكەن جاڭالىق بولدى. سۇيىكتى كاسىبىمە جاڭاشىل باستاما ەنگىزۋدى قاشاندا قولدايمىن. ينفورماتيكا ءبىلىمىنىڭ نەگىزى مەكتەپتە قالانعانى ءجون.
وقۋشىلارىمىز جاھاندانۋ زامانىندا ۇيدە وتىرىپ-اق دۇنيەنىڭ ءتورت بۇرىشىن ەركىن شارلاي الاتىنداي ءبىلىمدى بولۋى كەرەك. وقۋشىلارىمنىڭ ءوزىن عانا ەمەس, وتباسى مۇشەلەرىن دە ءارتۇرلى حاكەرلەردەن ساقتاندىرۋدى بىلگەنى جاقسى. عالامتور ارقىلى جاستاردى اجالعا ايداپ وتىرعان زياندى ويىندار مەن اقپاراتتاردان قالاي قۇتىلۋعا بولادى؟ قاپتاعان جارنامالاردىڭ جەتەگىندە كەتپەۋدى قالاي ۇيرەنۋ كەرەك؟ ءوز پانىمە اسا جاۋاپكەرشىلىكپەن قاراۋىما وسى ماسەلە تۇرتكى بولىپ وتىر. كەلەشەكتە تاۋەلسىز ەلىمىزدىڭ تىزگىنىن ۇستار ازاماتتار – بۇگىنگى مەكتەپ وقۋشىلارى. «حالىقتى حالىقپەن, ادامدى اداممەن تەڭەستىرەتىن – ءبىلىم», دەپ ۇلى جازۋشى مۇحتار اۋەزوۆ ايتقانداي, ەلىمىزدى وركەنيەتكە اپارار جولدىڭ باستاۋىندا مەكتەپ تۇرادى. مەكتەپتەگى ءبىلىم – بارشا الەم تىنىس-تىرشىلىگىنىڭ العاشقى ىرگەتاسى. وسى باعدارلامانىڭ نەگىزگى مىندەتى – قازاقستاندىق مۇعالىمدەرگە پەداگوگيكالىق تاجىريبەلەرىن جەتىلدىرۋ مەن باعالاۋعا كومەكتەسۋ.
سوندىقتان وقىتۋ مەن وقۋدىڭ قازىرگى زامانعى ادىستەرى مۇعالىمنىڭ كۇندەلىكتى تاجىريبەسى جانە كاسىبي قۇزىرەتتىلىگىمەن ءوزارا بايلانىستا قاراستىرىلادى. وسى كۋرستىڭ ءبىرىنشى «بەتپە-بەت» كەزەڭىن اياقتاعاننان كەيىن, تىڭ يدەيالار ناتيجەسىندە, ءوزىمنىڭ باعدارلامانىڭ نەگىزگى دەڭگەيىن وقۋ ارقىلى وزگەرگەنىمدى كورسەتەتىن ءساتتىڭ كەلگەنىن ءتۇسىندىم. ءداستۇرلى وقىتۋ ارقىلى العان ءبىلىمنىڭ جاتتاندى, وقۋشىلار ءۇشىن كەلەشەك ومىردە كوپ ىسكە اسپايتىنىن ءبىلدىم. وسى باعدارلاما اياسىندا جەتى مودۋل بويىنشا سىندارلى وقىتۋ ارقىلى العان تەوريالىق ءبىلىمنىڭ تەرەڭ, ومىردە, مەكتەپتەن باسقا جەردە دە قولدانۋعا بولاتىنىنا كوزىم جەتتى. بۇل كەزدە ءوزىمنىڭ كوشباسشىلىق داعدىلارىم جەتىلدىرىلدى. ساباق بارىسىندا مەتاتانۋدى ءتيىمدى ىسكە اسىرۋ ارقىلى وقۋشىلاردىڭ كوگنيتيۆتى قابىلەتتەرىن جەتىلدىرۋگە بولاتىندىعىنا كوز جەتكىزدىم.
كەلەشەككە جوسپار قۇرا وتىرىپ, مەن وسى كۋرس بارىسىندا العان بىلىمدەرىم مەن تاجىريبەمدى ۇشتاستىرىپ, ساباق بەرۋ ۇردىستەرىمدى ۇلكەن باعىتقا وزگەرتەمىن دەپ ويلايمىن. جاڭاشا ادىستەر مەن تاسىلدەردى قولدانا وتىرىپ وقۋشىلارعا دۇرىس باعىت-باعدار بەرۋگە تىرىسامىن. مەنىڭ ويىمشا, بارلىق ۇستازدار دا وزگەرۋى ءتيىس. ويتكەنى زامانىمىز رۋحاني قۇندىلىقتاردى ساقتاي وتىرىپ, جاڭاشىلدىققا بەت بۇرۋىمىزدى قاجەت ەتىپ وتىر. قازاق مەكتەبىنىڭ بولاشاعى تۋرالى م.جۇماباەۆ ء«اربىر ەلدىڭ كەلەشەگى مەكتەبىنە بايلانىستى», دەگەن ەكەن. پەداگوگ ءۇشىن وسى ءسوز باستى ۇستانىم بولماق. رۋحاني جاڭعىرۋ اياسىندا جاسالاتىن بارلىق شارانىڭ وزەگى ءبىلىم مەن تاربيە, وركەندى جاس ۇرپاق بولىپ قالا بەرەدى.
رىسجان اققۇلوۆا,
ءتۇرلى پاندەردى تەرەڭدەتىپ وقىتاتىن دارىندى بالالارعا ارنالعان وبلىستىق مامانداندىرىلعان مەكتەپ-ينتەرنات مۇعالىمى
اقتاۋ
جاڭاشىلدىق جارشىسى بولعان «ورلەۋ»
2012 جىلدان باستاپ ەلىمىزدە پەداگوگ قىزمەتكەرلەردىڭ بىلىكتىلىگىن ارتتىرۋ ءۇشىن دەڭگەيلىك كۋرستار وقىتىلا باستادى. باعدارلاماعا ەنگىزىلگەن جاڭا ءتاسىلدىڭ ءبىرى – مۇعالىمنىڭ ءوز تاجىريبەسى تۋرالى ويلانۋى.
ءوز ىسىنە دەگەن سەنىمى مەن ماقساتى ايقىن ءار مامان يەسى «مۇعالىم دە, وقۋشى دا ريزا بولۋى ءۇشىن ساباعىمدى قالاي وتكىزسەم بولادى؟ وقۋشى بولاشاق مامان رەتىندە بۇگىنگى قوعام تالابىنا دايىن بولۋ ءۇشىن نە ىستەۋ كەرەك؟» دەپ تولعاناتىنى بەلگىلى.
باتىس قازاقستان وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى بازاسىندا ءۇشىنشى (بازالىق) دەڭگەي بويىنشا ءبىلىمىمدى جەتىلدىردىم. ينستيتۋت ديرەكتورى, پەداگوگيكا عىلىمدارىنىڭ كانديداتى سوفيا يزمۇحانبەتوۆا باستاعان ۇجىم زاماناۋي تاجىريبەلەردى زەردەلەۋ جانە قولدانۋ باعىتى بويىنشا مۇعالىمدى دامىتۋعا باعىتتالعان باعدارلاما نەگىزىندە ءبىلىم الۋىما تولىق مۇمكىندىك جاسادى. ءار تىڭداۋشىعا قولايلى ورتا, وڭ احۋال قالىپتاستىردى, ءار وقۋ سەسسياسى ساۋاتتى قۇرىلىمدالىپ, مۇعالىمنىڭ بەلسەندى جۇمىس جاساۋىنا, ءوزارا ارەكەتتەستىك ارقىلى وقۋىنا باعىتتالدى. باپكەرلەرىمىزدىڭ شەبەرلىگى, تەوريالىق بىلىمدەرىمەن قاتار پاندىك بىلىمدەرىنىڭ تەرەڭدىگى, مەكتەپ تاجىريبەسىن ءبىلۋى, ءار مۇعالىمگە جول تاۋىپ, ونىڭ ىشكى الەۋەتىن اشۋعا ۇمتىلىسى, العا جەتەلەۋى, ازاماتتىق جانە ادامي قاسيەتتەرىنىڭ بيىكتىگى ءتيىمدى وقۋعا, كوزقاراسىمىزدىڭ وزگەرۋىنە سەپتىگىن تيگىزدى.
كۋرستىڭ اسەرىنەن قازىرگى تاڭدا وزىمە باعا بەرە وتىرىپ, كەمشىلىگىمدى تۇزەپ جانە جاڭا جول ىزدەپ, جۇمىسىمدى جاڭاشا تالقىلايتىن بولدىم. ءار ساباعىمدى سۇراقپەن باستاپ, سۇراقپەن اياقتاۋدى داعدىعا اينالدىردىم. ساباعىمدا جۇيەلى قويىلعان سۇراق وقۋشىلاردىڭ سىني ويلاۋىن دامىتاتىنىن بايقادىم. وقۋشىلاردىڭ تابىستى ىستەرى مەن تىڭ يدەيالارى جۇپتىق, توپتىق جۇمىستارىمنىڭ ىرگەتاسى بولا باستادى. سىني تۇرعىدان ويلاۋ قابىلەتىمدى دامىتا وتىرىپ, جاڭاشىل يدەيالارعا كوڭىل كوكجيەگىن اشا ءبىلدىم. كۋرستان العان ءبىلىم مەن ءتالىمىمنىڭ ارقاسىندا ۇجىمداعى ارىپتەستەرىمنىڭ اراسىندا بەدەلگە يە بولدىم, تاجىريبەممەن بولىسۋگە, ساباق كورسەتۋگە, جاڭا يدەيالارمەن بولىسۋگە قۇلشىنىسىم ءوستى. ورال قالالىق ۇزدىك تاربيە ساعاتى بايقاۋىندا – باس جۇلدە, «جەتى مودۋل ىقپالداستىرىلعان ورتا مەرزىمدى جوسپارلار ۇلگىسى» بايقاۋىندا – ءى ورىن, قازاق ءتىلى مەن ادەبيەت ءپانى مۇعالىمدەرىنىڭ وليمپياداسىندا – ءىى ورىن جانە ءى, ءىى, ءىىى دەڭگەي بويىنشا سەرتيفيكاتتالعان قازاق ءتىلى مەن ادەبيەت ءپانى مۇعالىمدەرىنىڭ اراسىندا وتكەن «ەرۋديت مۇعالىم» بايقاۋىندا ءىىى ورىن يەلەنگەنىم ءۇشىن قۇرمەت گراموتاسىمەن ماراپاتتالدىم. رەسپۋبليكالىق «Bilim media group» كومپانياسى ۇيىمداستىرعان «جاڭاشىل مۇعالىم-2017» بايقاۋىنىڭ ەكىنشى كەزەڭىنە جولداما الدىم.
كۋرستى اياقتاپ, قولىمىزعا سەرتيفيكات العانىمىزعا بيىل 6 جىل بولادى ەكەن. دەگەنمەن, باپكەرلەرىمىز ءالى كۇنگە دەيىن بىزبەن بايلانىسىپ, قانداي شارا, بايقاۋ بولماسىن ادىستەمەلىك كومەك بەرىپ, قولداۋ كورسەتۋگە دايىن تۇرادى. ءار كەزدەسكەن سايىن زور ىلتيپاتپەن, قۋانىشپەن قارسى الۋى ءبىزدى ودان ءارى قۇلشىندىرا تۇسەدى. كۋرستان كەيىنگى ادىستەمەلىك قولداۋ سەمينارلارى, ءتۇرلى كونفەرەنتسيا, ونلاين سەمينار مەن ۆەبينارلارعا شاقىرىپ, قاتىستىرۋى ءبىزدى ودان ءارى دامىتا ءتۇستى, ۇمتىلىسىمىزدى كۇشەيتتى.
ناتيجەسىندە, 2014 جىلى «وزگەرىس. تاجىريبە. ويتولعاۋ» اتتى وبلىستىق ونلاين رەجىمىندەگى پەداگوگيكالىق يدەيالار جارمەڭكەسىنە قاتىسىپ, ءوز يدەيالارىممەن ءبولىستىم. 2016 جىلى «جاڭا فورماتسيا مۇعالىمى: تاجىريبە جانە كاسىبي ديالوگ» تاقىرىبىنداعى وبلىستىق عىلىمي-تاجىريبەلىك ونلاين ۆەبينارىنا قاتىسىپ, سەرتيفيكاتپەن, قاتىسۋشى كۋالىگىمەن ماراپاتتالدىم. 2014 جىلى قۇراستىرىلعان «قادىرتانۋ» كۋرستىق جانە «سىندارلى تەوريالىق وقىتۋعا نەگىزدەلگەن ءتاسىلدىڭ ءتۇيىندى يدەيالارىن تاربيە ۇردىسىندە قولدانۋ» اتتى اۆتورلىق باعدارلامالارىم وبلىس كولەمىندە تاراتىلدى.
قول جەتكىزىپ جۇرگەن جەتىستىكتەرىم مەن تابىستارىم وسى «ورلەۋ» قابىرعاسىندا وتكەن بىلىكتىلىك كۋرسى مەن باپكەرلەردىڭ قولداۋىنىڭ ناتيجەسى دەپ بىلەمىن.
جازيرا يشانعاليەۆا,
№30 جالپى ورتا ءبىلىم بەرەتىن مەكتەپ ديرەكتورىنىڭ ادىستەمە ءىسى جونىندەگى ورىنباسارى
ورال
اكەنىڭ بالا تاربيەسىندەگى ءرولى
جاس ۇرپاققا تاربيە بەرۋدە ەڭ الدىمەن اتا-انا, سودان كەيىنگى ورىندا مەكتەپ, ياعني ۇستاز تۇرادى. ادامگەرشىلىك, كىشىپەيىلدىلىك, قايىرىمدىلىق, ادەپتىلىك سياقتى يگى قاسيەتتەردىڭ ءبارى بالانىڭ بويىنا وتباسىنان داريدى. وتباسىلىق قارىم-قاتىناستا ونىڭ ءاربىر مۇشەسىنىڭ ءوز مىندەتى مەن ورنى بار. انا بالانى ومىرگە اكەلىپ, اق ءسۇتىن بەرىپ, الديلەپ, ماپەلەپ وسىرسە, وسكەلەڭ ۇرپاق تاربيەسىندە اكەنىڭ وزىندىك ءرولى زور. اكە – شاڭىراق يەسى, ءۇيدىڭ اسىراۋشىسى جانە تاربيەشىسى. وكىنىشكە قاراي, قازىر كۇيبەڭ تىرشىلىكتىڭ قامىمەن بالا تاربيەسىن نازاردان تىس قالدىرعان اكەلەر دە از ەمەس. اكەلەردىڭ بالا تاربيەسىندەگى ءرولىن ارتتىرۋ ماقساتىندا جاقىندا بارشاتاس اۋىلىنداعى وسپانقۇل مەڭاياق ۇلى اتىنداعى جالپى ءبىلىم بەرەتىن ورتا مەكتەپتە العاش رەت «اكە جولى – ىزگىلىكتىڭ ىزدەرى» اتتى اكەلەر كونفەرەنتسياسى ۇيىمداستىرىلدى. اتالعان شارا بارشا اكەلەردىڭ قۇرمەتىنە ۇلانداردىڭ اكە تۋرالى جىر شۋماقتارىمەن باستالىپ, اكەلى-بالالى اجىبەكوۆتەر وتباسىنىڭ ورىنداۋىنداعى «اكە تۋرالى جىر» انىمەن جالعاسىن تاپتى. ساحنانىڭ بەزەندىرىلۋىنە اتسالىسقان پەداگوگ-ۇيىمداستىرۋشى كەنجەباي بازارباي ۇلىنىڭ ەر ادامعا لايىق بەس قارۋ مەن ۇلتتىق قۇندىلىعىمىز سانالاتىن كيىز ءۇي كەرەگەسىنىڭ قويىلۋى تاقىرىپتىڭ ءمان-ماعىناسىن تولىق اشا تۇسكەندەي بولدى.
مەكتەپ ديرەكتورى گۇلنۇر رعىزبايقىزى ءوزىنىڭ قۇتتىقتاۋ سوزىندە ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا قۇندى مۇرالارىمىزدى قۇرمەتتەۋگە ەرەكشە دەن قويىلعانىنا توقتالىپ, ۇرپاق تاربيەسىندە اكەنىڭ ورنى اركەز بولەك ەكەندىگىن اتاپ ءوتتى. كونفەرەنتسيانى ديرەكتوردىڭ تاربيە ءىسى جونىندەگى ورىنباسارى التىنجان زەينەكارىمقىزى «وتباسى تاربيەسىندەگى اكەنىڭ ءرولى» تاقىرىبىنداعى بايانداماسىمەن جالعاستىرىپ: «اكە كورگەن وق جونار, شەشە كورگەن تون پىشەر» دەگەندەي, بالا, اسىرەسە, ۇل بالا اكەسى مەن اتاسىنا قاراپ بوي تۇزەيدى. ولاردان كورگەن, ەستىگەندەرىن بويىنا ءسىڭىرىپ وسەدى, ەر ازاماتقا ءتان قاسيەتتەردى ۇيرەنەدى. وسى رەتتە مەكتەپتە جوسپارلى تۇردە وتەتىن تاربيە باعىتىنداعى ءىس-شارالارعا, اتا-انالار جينالىستارىنا اكەلەر قاۋىمى ءجيى قاتىسىپ وتىرسا دەگەن تىلەگىمىز بار. ويتكەنى اكەنىڭ وتىرعانىنىڭ ءوزى ءبىر تاربيە», دەدى. كونفەرەنتسيا بارىسىندا شاراعا كەلگەن اكەلەردىڭ نازارىنا كۇندەلىكتى تۇرمىس-تىرشىلىكتە كەزدەسىپ جاتاتىن ءارتۇرلى جاعدايلار, بالالار جايىندا بەينەسيۋجەتتەر ۇسىنىلدى. كورسەتىلگەن ءۇش ءتۇرلى سيۋجەت بويىنشا بەينەروليكتەردى كورگەن سوڭ بىرقاتار اتا-انا ءوز وي-پىكىرلەرىن ورتاعا سالدى. ولاردىڭ پىكىرى تىڭدالعاننان كەيىن مەكتەپ پسيحولوگى جازيرا امانگەلدىقىزى ءار بەينەسيۋجەتكە پسيحولوگيالىق تۇرعىدان تالداۋ جۇرگىزدى.
تاعىلىمدا شارا سوڭىندا قورىتىندى ءسوز سويلەگەن اۋداندىق ءبىرىنشى اكەلەر كونفەرەنتسياسىنىڭ دەلەگاتى, ۇلگىلى اكە, اۋىلدىق اۋرۋحانانىڭ باس دارىگەرى, مەكتەپتىڭ تۇراقتى دەمەۋشىسى, تۇلەكتەر كەڭەسىنىڭ توراعاسى مارات ونەرباەۆ تاربيە ىسىنە ۇنەمى اتسالىسىپ, مەكتەپپەن تىعىز بايلانىستا بولۋعا شاقىردى. ال مەكتەپتەگى اتا-انالار كوميتەتىنىڭ ءتورايىمى سامال قاناپيانوۆا وسىنداي تاربيەلىك ءمانى زور ءىس-شارانىڭ جوعارى دەڭگەيدە وتۋىنە مۇرىندىق بولعان ۇجىمعا العىس ايتىپ, كونفەرەنتسيانىڭ ءداستۇرلى تۇردە جىل سايىن وتكىزىلىپ تۇرۋىنا اتا-انالار كوميتەتى تاراپىنان دا قولداۋ كورسەتەتىندىكتەرىن جەتكىزدى. سونىمەن قاتار بۇل كۇنى ءبىر توپ ۇلگىلى اكەلەر مەكتەپ ديرەكتورىنىڭ العىس حاتى جانە ەستەلىك بەلگىلەرىمەن ماراپاتتالدى.
سامال قاناپيانوۆا,
اتا-انالار كوميتەتىنىڭ ءتورايىمى
شىعىس قازاقستان وبلىسى,
اياگوز اۋدانى,
بارشاتاس اۋىلى
