وتكەن جىلدىڭ سوڭىندا پرەزيدەنتىمىز بۇكىل حالىققا تاعى ءبىر ەرەكشە سىي – ءتول تاريحىمىزعا زور ۇلەس بولىپ قوسىلاتىن «تاۋەلسىزدىك ءداۋىرى» اتتى كىتابىن تارتۋ ەتتى. ونىڭ جارىق كورۋى – تاۋەلسىزدىگىمىزدىڭ 26 جىلدىعىنا تاماشا سىيلىق قانا ەمەس, وتانىمىز ءۇشىن ايتۋلى وقيعا بولدى.
كىتاپتىڭ قۇندىلىعى – تاۋەلسىزدىك العاننان بەرگى قيىن دا كۇردەلى ساتتەرىمىزدىڭ, جەڭىستى دە جەمىستى كۇندەرىمىزدىڭ, ايقىن ۇدەرىستەگى قالىپتاسۋ, وركەندەۋ ساتىلارىنىڭ, قازاقستاندىق مەملەكەتتىك قۇرىلىس پەن دامۋ, تاتۋلىق پەن بىرلىك مودەلىنىڭ جان-جاقتى تارازىلانعان, ەگجەي-تەگجەيلى ساراپتالعان شەجىرەسى ەكەندىگىندە.
زەردەلەپ وقىعان جان «تاۋەلسىزدىك ءداۋىرى» تاپ قازىر ءزارۋ كىتاپ ەكەنىن ۇعارى انىق. ويتكەنى ول ءبىزدىڭ ەڭ ءبىر شيرىققان جانە بەتبۇرىستى ساتتەردە ء«بىر اتانىڭ بالاسىنداي, ءبىر قولدىڭ سالاسىنداي» جۇمىلىپ, قانشاما قيىندىقتى ەڭسەرگەنىمىزدى ەسكە ءتۇسىرىپ, حالىقتىڭ جادىن جاڭعىرتادى, جۇرەگىنە سەنىم ۇيالاتادى.
قوزعالىس – دامۋدىڭ نەگىزگى بەلگىسى. اعىنسىز سۋدىڭ – ومىرگە ءنار بەرەتىن قۇناردان ايىرىلاتىنى, قيمىلسىز قالۋدىڭ – تىرشىلىك يەسى ءوسىپ-ءونۋىنىڭ توقتاعانىن بىلدىرەتىنى سياقتى, مەملەكەت ومىرىندە دە جەتىستىكتەرگە قاناعاتتانىپ, بوساڭسىپ, توقمەيىلسۋگە بولمايدى. ەلباسىنىڭ حالىق الدىنا جىل سايىن جاڭا مىندەت قويىپ, ءبىر بيىكتەن سوڭ كەلەسى بيىكتى باعىندىرۋعا جەتەلەۋىنىڭ استارى – ماڭگىلىك قوزعالىس فيلوسوفياسىنا بارىپ تىرەلەدى. سوندىقتان دا ەلىمىز ۇلت كوشباسشىسىنىڭ جەتەكشىلىگىمەن مەملەكەتتى, قوعامدى, ەكونوميكانى ەڭ اۋقىمدى مودەرنيزاتسيالاۋعا – ءۇشىنشى جاڭعىرتۋعا كىرىستى. بۇل جولدا بەلگىلەنگەن مەجە – قازاقستاندى الەمنىڭ ەڭ وزىق دامىعان وتىز ەلى قاتارىنا ەنگىزۋ.
ەكونوميكاداعى, كونستيتۋتسيالىق قۇرىلىستاعى رەفورمالىق وزگەرىستەر مەن قوعامدىق ساناعا قوزعاۋ سالىپ, رۋحاني جاڭعىرتۋ قاتار جۇزەگە اسىرۋعا تاۋەكەل دەپ كىرىستىك. بۇل تۋرالى مەملەكەت باسشىسى: «مەملەكەتتىك اعزانى قالىپتاستىراتىن «بازالىق ماتريتسا» «ونىڭ ءار ەلەمەنتىنىڭ ناقتى بەرىلگەن پارامەترلەرگە سايكەس تولىققاندى دامۋىن قامتاماسىز ەتەدى جانە ونىڭ ۇزدىكسىز جۇمىس ىستەۋىنە كەپىلدىك بەرەدى» دەپ اتاپ كورسەتتى.
اتالعان كىتاپتىڭ جانە ءبىر قۇندىلىعى – مۇندا تەك ءوز ەلىمىز ءۇشىن عانا ومىرشەڭ ماسەلەلەر قوزعالماي, الەمدىك قاۋىمداستىقتى قامتيتىن وزەكتى جايلاردىڭ تالدانۋىندا دەر ەدىك. قازىرگى جاپا-تارماعاي اسكەري كۇش-قۋاتىن كورسەتۋگە ۇمتىلۋشىلار قايتا پايدا بولىپ, گەوساياسي تەكەتىرەس ۋشىعا تۇسكەن, ەتنوسارالىق جانە كونفەسسياارالىق شيەلەنىستەر, بوسقىندار لەگى ارتقان الەمدە قازاقستاننىڭ «بەيبىت ءومىردىڭ بەسىگى» بولۋعا ۇمتىلىسى قاي جاعىنان دا قۇرمەتكە لايىق. ۇلت كوشباسشىسىنىڭ ءتۇرلى ەتنوس پەن ءدىن وكىلدەرى مەكەندەگەن ەلىمىزدە قوعامدىق كەلىسىمدى ساقتاۋ جونىندەگى ونەگە باستامالارى عانا ەمەس, ءاربىر پىكىرى الەمدىك قاۋىمداستىق تاراپىنان جوعارى باعا العانىن ماقتانىشپەن ايتامىز. حالىقتىڭ مىڭ جىلدىق «ىنتىماق – وق وتپەس ساۋىت, تاتۋلىق – تاماشا ساۋلىق» دانالىعى – بۇگىنگى قازاقستان اقيقاتى.
تاۋەلسىزدىك تاڭىن وڭ-سولىن تانىعان ازامات شاعىندا قارسى الىپ, مەملەكەتشىلدىك پەن وتانشىلدىقتى نىعايتۋعا اتسالىسىپ, ءوز سالاسىندا ەلباسى باستامالارىن جۇزەگە اسىرۋعا قۇزىرەت-قابىلەتىنە قاراي ۇلەس قوسىپ جۇرگەن جاندار ءۇشىن بۇل كىتاپتىڭ ۇيرەتەر ونەگەسى دە, بەرەر ءبىلىمى دە, قالىپتاستىرار تالعامى دا ايرىقشا. ەڭبەكتەگى ءبولىم, تاراۋ اتتارى دا وقىرمانعا وي سالادى. «ەۆوليۋتسيا – رەۆوليۋتسيا ەمەس», «اۋەلى – ەكونوميكا, سونان سوڭ – ساياسات», «ادام كاپيتالىنا ءۇمىت ارتۋ», «ستراتەگيالىق مەملەكەتتىك جوسپارلاۋ», «ۇلتارالىق تاتۋلىق پەن كەلىسىم», «قازاقستاندىق بىرەگەيلىك پەن قازاقستاندىق پاتريوتيزم» – ءبىز ءۇشىن جاي سوزدەر ەمەس, ءاربىر ازاماتتىڭ جۇرەگىنە ەتەنە جاقىن, دامۋدىڭ قازاقستاندىق مودەلىن سيپاتتايتىن تۇعىرلى تىركەستەر, بەكەم دىڭگەكتەر, التىن ۇستىندار.
كىتاپتىڭ «مەملەكەتىمىزدىڭ دۇنيەگە كەلۋى. قازاقستاننىڭ ءبىرىنشى جاڭعىرۋى» دەپ اتالاتىن العاشقى ءبولىمى 1991-1995 جىلدار ارالىعىنداعى تاريحي وقيعالاردى قامتيدى. ول – تاۋەلسىزدىك ءداۋىرىنىڭ باستاپقى, ەڭ قيىن جىلدارى ەدى. جانە بۇل قيىندىق ءبىزدىڭ ەلدە عانا ەمەس, تاۋەلسىزدىگىن ەندى جاريالاعان كورشىلەس ەلدەرگە – سوۆەتتەن كىندىك ءۇزىپ شىققان جۇرتتارعا دا ءتان بولاتىن. سولاردىڭ ىشىنەن العا سۋىرىلا شىققان قازاقستاننىڭ ورتالىق ازيا ءوڭىرى كوشباسشى ەلىنە اينالۋى – ەلباسىمىزدىڭ وڭىرلىك قاۋىپسىزدىك پەن تاتۋلىقتى ويلاعان كورەگەن, سىندارلى ساياساتىنىڭ ارقاسى ەكەندىگى شيرەك عاسىر ىشىندە حالىقارالىق دەڭگەيدە تالاي مويىندالدى.
قازاقستان حالقى اسسامبلەياسى وسى ءبىرىنشى جاڭعىرتۋ كەزەڭىندە-اق تۇراقتاندىرۋشى ءرول اتقارعانى – تاريحي شىندىق. تاتۋ ەلگە تىنىشتىق پەن توقشىلىق ءناسىپ بولاتىنىنا ءوزىمىزدى دە, وزگەنى دە كامىل سەندىرە بىلگەن ن.ءا.نازارباەۆتىڭ قايراتكەرلىك فەنومەنى – جاڭا الەمدىگى جاڭا قازاقستاننىڭ ىرگەتاسى. اسسامبلەيا ەل بىرلىگىن ساقتاۋ باعىتىندا جاڭا كونستيتۋتسيانى قابىلداۋ جانە پرەزيدەنتتىڭ وكىلەتتىگىن 2000 جىلدىڭ 1 جەلتوقسانىنا دەيىن ۇزارتۋ بويىنشا رەفەرەندۋمدارعا باستاماشىلىق جاساعانى بەلگىلى. سولاردىڭ نەگىزىندە بۇل جىلداردا ءتىل, ازاماتتىق بىرەگەيلىك, مادەنيەت سالاسىندا قوعامدىق كەلىسىم مەن جالپىۇلتتىق بىرلىكتىڭ قازاقستاندىق ۇلگىسى قالانعان بولاتىن.
مەملەكەت باسشىسىنىڭ قازاق حالقىنا, ونىڭ تىلىنە, مادەنيەتى مەن داستۇرىنە قاتىستى تاريحي ادىلەتتىلىكتى قالپىنا كەلتىرۋ بويىنشا تاۋەلسىزدىكتىڭ العاشقى جىلدارىنان-اق جۇرگىزگەن وراسان زور جۇمىسى ەرەكشە نازار اۋدارۋعا لايىق. سونىڭ ارقاسىندا قازاق حالقى مەملەكەتتىڭ, سونداي-اق ەلىمىزدە تۇراتىن بارشا ەتنوستاردىڭ تاعدىرى ءۇشىن تاريحي جاۋاپكەرشىلىكتى ءوز موينىنا الىپ وتىر. الەمدى رۋحاني كەلىسىمگە شاقىرعان كونە كىتاپتاردا «كىمنىڭ نەسىبەسى كوپ بولسا, سودان سۇراۋ دا كوپ بولماق» – دەپ جازىلعانى دا بەكەر ەمەس. «قازاق ۇلتىنىڭ تۇتاستىعىنىڭ نەگىزگى باستاۋى», «مەملەكەتكە ءوزىنىڭ اتىن بەرگەن حالىقتىڭ ەجەلگى, باي ءتىلى», «بىرىكتىرۋشى فاكتور» دەپ سيپاتتالعان انا ءتىلىمىز قازاقستان حالقىنىڭ بىرىگۋىنە ۇيىتقى بولىپ, تاريحي جاڭا تۇعىرعا كوتەرىلىپ, مەملەكەتتىك ءتىل مارتەبەسىن الدى.
ەكىنشى جاڭعىرتۋ باياندالاتىن « ۇلى بەتبۇرىس», «قازاقستاننىڭ ەكىنشى جاڭعىرۋى» تاراۋلارىندا پرەزيدەنتتىڭ تىكەلەي باسشىلىعىمەن ەكسكليۋزيۆتىك قازاقستاندىق بىرلىك پەن كەلىسىمنىڭ ۇلگىسى, ونىڭ قاعيداتتارى مەن بىرەگەيلىكتىڭ ىرگە قالار نەگىزدەرى قالايشا قالىپتاسقانى بايىپتالعان. بۇل جەردەن ەتنوسارالىق قاتىناستاردىڭ شيەلەنىسۋىنە بايلانىستى قاۋىپتەردى جويۋداعى مەملەكەتشىل ىزدەنىستەر تۋرالى بىلە الامىز.
بۇگىندە بۇكىل ەل بولىپ اتاپ وتەتىن «قازاقستان حالقىنىڭ بىرلىگى كۇنى», «ساياسي قۋعىن-سۇرگىن جانە اشتىق قۇرباندارىن ەسكە الۋ كۇنى» سياقتى قاستەرلى كۇندەر مەن قاسيەتتى داستۇرلەردىڭ نەگىزى دە وسى كەزەڭدە قالانعان. بىرلىك پەن جالپىۇلتتىق كەلىسىم, بىرلىك پەن ۇلتتىق تاريح, بىرلىك پەن ۇرپاقتار ساباقتاستىعى جىلدارىنىڭ وتكىزىلۋى, الماتىدا العاشقى دوستىق ءۇيى پايدا بولۋى, باسقا دا ايتۋلى ءىس-شارالار – قازاقستاننىڭ بىرلىك جولىنداعى ەلدىك ءجون-جوبالارى.
مەملەكەت باسشىسى «تاۋەلسىزدىك داۋىرىندە» تاتۋلىق پەن كەلىسىم ساياساتى اياسىندا اسسامبلەيانىڭ شوعىرلاندىرۋشى فاكتورعا, قازىرگى قازاقستاندىقتاردىڭ بىرەگەيلىگىن قالىپتاستىرۋ ينستيتۋتىنا اينالعانىن, جاڭعىرتۋدىڭ ءۇش كەزەڭىندەگى تۇراقتىلىق تۇعىرناماسىنا كەڭىنەن توقتالىپ وتەدى.
سونداي-اق اسسامبلەيا اتاۋىنداعى «حالىقتار» (حالىقتارى) ۇعىمى مەن ءسوزى ناقتىلانىپ, 2007 جىلى ەتنوستار مۇددەسىنىڭ بىرتۇتاستىعىن ايقىندايتىن «حالىق» (حالقى) بولىپ وزگەرگەنى, ونىڭ كونستيتۋتسيالىق مارتەبەگە جانە كەپىلدى پارلامەنتتىك وكىلدىككە يە بولعانى, اسسامبلەيا تۋرالى زاڭ قابىلدانعانى اتاپ كورسەتىلەدى.
تاپ وسى كەزەڭدە مەملەكەت باسشىسى ۇلتتىق ساياساتتىڭ نەگىز-قاعيداتتارىن تۇجىرىمداپ, ىسكە اسىردى. اتاپ ايتساق:
ا) ەتنوستىق, كونفەسسيالىق, مادەني, تىلدىك ارالۋاندىق;
ءا) ەتنوستاردىڭ مادەنيەتى مەن ءتىلىن دامىتۋعا باعىتتالعان مەملەكەت قامقورلىعى;
ب) تولەرانتتىلىق پەن جاۋاپكەرشىلىك قۇندىلىعى;
ۆ) قازاق ۇلتىنىڭ جۇمىلدىرۋشى ءرولى;
گ) قازاقستان حالقىنىڭ بىرلىگى.
حالىقتىڭ توپتاسۋىنىڭ وسى كەزەڭىن پرەزيدەنت «ماقساتتار مەن ءىس-قيمىلداردىڭ, اقىل-وي مەن جۇرەكتىڭ بىرلىگى» دەپ سيپاتتايدى.
ەلباسىنىڭ جالپىحالىقتىق بىرلىك پەن قوعامدىق كەلىسىمدى ساقتاۋعا جۇمساعان كۇش-جىگەرى قازاقستاندىق مودەلدىڭ بۇۇ, ەقىۇ, اوسشك, شىۇ سياقتى حالىقارالىق ينستيتۋتتار دەڭگەيىندە تانىلىپ, مويىندالۋىنا يگى ىقپال ەتتى. ارينە, كىتاپتا تالدانعان ەلدىڭ دامۋ بارىسى, ەكونوميكادا قول جەتكەن تابىستار مەن ساياساتتاعى تانىمالدىق, حالىقارالىق ارەناداعى بەدەل – باسقا دا قازاقستان جولىنىڭ باسىندا ۇلت كوشباسشىسىنىڭ تاۋەكەلشىلدىگى, باتىلدىعى, پاراساتى, تاجىريبەسى, ماڭداي تەرى تۇرعانىن وتاندىق وقىرمان دا شەتەلدىك وقىرمان دا قاپىسىز تانيدى.
پرەزيدەنتتىڭ استانانى تاريحي-مادەني توعىز جولدىڭ تورابىنداعى ارقا توسىنە كوشىرۋدەگى كوپكە ءمالىم ساياسي-ەكونوميكالىق سەبەپتەردىڭ ىشىندە, بىزدىڭشە, نۇرسۇلتان ءابىش ۇلىنىڭ الىستان ويلايتىن, ۇلت تانىمىنداعى «جاڭا قونىس – جاڭا ءىس», «بايسالدى كوش – ەلدىڭ قۇتى» دەگەن سەنىمى مەن ءۇمىتى تۇردى. ياعني حالىقتى جاڭا ساپاعا, سىرەسكەن ەسكىلىكتى سىلكىپ تاستاپ, جاڭاشا ويلاۋعا, جاڭاشا ارەكەت جاساۋعا – رۋحاني جاڭعىرۋعا باستاۋ نيەتى جاتىر.
ەلدىڭ ەكونوميكالىق قۋاتى ارتىپ, مەملەكەتىمىز بىرنەشە ءىرى حالىقارالىق ۇيىمنىڭ مۇشەسى بولۋمەن بىرگە, ونىڭ توراعالىق تىزگىنىن ۇستاعانى – وتانىمىزدىڭ ولجاسى. الەمدى الاڭداتقان حالىقارالىق شيەلەنىستەردى شەشىلۋدە, سونىڭ ىشىندە سوڭعى رەسەي-تۇركيا قارىم-قاتىناسىنداعى تەكەتىرەستى رەتتەۋدە, سيريا ءتۇيىنىن تارقاتۋدا بىتىمگەرلىك تانىتۋدا قازاقستان ۇستانىمى, مامىلەگەرلىگى كىتاپتىڭ «قالىپتاسقان مەملەكەت» بولىمىندە دايەكتى باياندالادى.
سىرتقى ساياسات پەن حالىقارالىق قاتىناستار سالاسىندا شيرەك عاسىر ىشىندەگى ورە مەن ءورىس, تىعىرىقتان جول ىزدەۋ, ءوڭىر جانە الەم قاۋىپسىزدىگىنىڭ امالى ءھام ناتيجەسى مەملەكەت باسشىسى كىتابىندا: «قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس وكىلى بولىپ سايلانۋى ءبىزدىڭ تاريحي جەڭىسىمىز. بۇل – قازاقستان حالقىنىڭ ەسەيۋىنىڭ ايعاعى, ەڭبەك سىڭىرگەن ۇلتتىڭ تابىسى», – دەپ باعالانادى.
ەكونوميكالىق, ساياسي رەفورمالاردان كەيىن رۋحاني جاڭعىرۋعا جول اشىلعاندا, ەل الدىندا مىندەت-ماقساتتار مەجەسى بيىكتەي ءتۇستى. سونىڭ ءبىرى – قازاقستاننىڭ مارتەبەسىن ارتتىرىپ, مەرەيىن وسىرگەن ەكسپو-2017 حالىقارالىق كورمەسى. مامانداندىرىلعان كورمە وتكىزىلگەن كەزەڭدە شەتەلدەن كەلگەن قوناقتارعا وتانىمىزدىڭ دەڭگەيىن, بولمىس-ءبىتىمىن, ارمان-مۇددەسىن تانىتاتىن ءىس-شارالارعا مەملەكەتتىك ورگاندار مەن قوعامدىق ۇيىمدار بىرلەسە ءھام بەلسەنە اتسالىستى. قازاقستان حالقى اسسامبلەياسى ەل ومىرىندەگى ەلەۋلى وقيعاعا ارناپ «بەيبىتشىلىك جانە كەلىسىم ەنەرگياسى» ءىس-شارالار جوسپارىن قابىلداپ, ورايلى جۇزەگە اسىردى.
اسسامبلەيا مەن وڭىرلەردەگى سايكەس قۇرىلىمدار ىنتىماقتاستىقتا ۇيىمداستىرعان ەلىمىزدەگى ەتنوسارالىق تاتۋلىق پەن كەلىسىمدى كەڭىنەن تانىستىرعان كەشەندى شاراعا الىس جانە تاياۋ شەتەل قوناقتارى, سونىڭ ىشىندە ساياسي رەپرەسسيا جىلدارى قازاق جەرىنەن پانا تاپقانداردىڭ ۇرپاقتارى, وسىندا تۋىپ-ءوسىپ, كەيىن تاريحي وتانىنا ورالعان ەتنوس وكىلدەرى كوپتەپ قاتىستى. ەكسپو ساياباعىندا, «تاۋەلسىزدىكتىڭ 25 جىلدىعى» مونۋمەنتى الاڭىندا قازاقستان حالقى اسسامبلەياسىنىڭ بەيبىتشىلىك جانە كەلىسىم ساياجولى پايدا بولدى. جاڭا مادەني نىساننىڭ سالتاناتتى اشىلۋىنا قاتىسقان شەتەلدىك قوناقتار, ديپلوماتيالىق كورپۋس وكىلدەرى مۇنى «قازاقستانداعى قوعامدىق كەلىسىم مەن ەتنوسارالىق تاتۋلىقتىڭ ءرامىزى» دەپ قابىلدايتىندارىن جەتكىزىپ جاتتى.
كىتاپتىڭ ءۇشىنشى جاڭعىرتۋ كەزەڭى تۋرالى بولىمىندە جاڭا قازاقستاندىق وتانشىلدىقتىڭ ءمان-ماعىناسى, ەرەكشىلىگى اشىلادى. بۇل – تاۋەكەل مەن مۇمكىندىك تەڭدىگى جانە ەل تاعدىرىنا دەگەن ورتاق جاۋاپكەرشىلىكتىڭ بەلگىسى. بۇل – «قازاقستان-2050» ستراتەگياسىنىڭ باسىمدىقتارى, ال ەلباسى ۇسىنعان ىنتىماق پەن تاتۋلىقتىڭ ء«بىر حالىق – ءبىر ەل – ءبىر تاعدىر» دەگەن زاماناۋي فورمۋلاسى «ماڭگىلىك ەل» جالپىۇلتتىق پاتريوتتىق يدەياسىندا كورىنىس تاپتى. قازاقستان حالقى اسسامبلەياسى جىلى – بەس ينستيتۋتتىق رەفورمانى جانە ونىڭ «بىرەگەيلىك پەن بىرلىك» اتتى ءتورتىنشى باعىتىن ىسكە اسىرۋدىڭ العاشقى جىلى بولدى.
قوعامدىق سانانىڭ جاڭعىرۋى الەۋمەت ساناسىنىڭ جاڭعىرۋىنان, ادامداردىڭ بويىندا قايىرىمدىلىق, ادىلدىك, ىزگىلىك, مەيىرىمدىلىك سياقتى قاسيەتتەردىڭ نىق ورنىعۋىنان باستالادى. مەملەكەت باسشىسىنىڭ باستاماسىمەن ءبىزدىڭ ەلدە «قايىرىمدىلىق كەرۋەنى» قوزعالىسى باستاۋ الىپ, دىلىنە, دىنىنە, تىلىنە قاراماي بارشا وتانداستارىمىزدىڭ ءبىر-بىرىنە دەگەن ادالدىعىنىڭ, دوستىعىنىڭ, باۋىرماشىلدىعىنىڭ, سۇيىسپەنشىلىگىنىڭ مەرەكەسى – العىس ايتۋ كۇنىمەن ناقتىلاندى. ۋاقىت وتكەن سايىن ءبىزدىڭ بىرەگەيلىگىمىز بەن بىرلىگىمىزدىڭ باسقا دا تىڭ نىشاندارى جاڭا قىرىنان كورىنە بەرەرى ءسوسىز.
قاي زاماندا دا ەل تاريحىنداعى شەشۋشى ءداۋىردى كەڭ قامتىپ, تەرەڭ تالداعان ەڭبەك جوعارى باعالانعان. «تاۋەلسىزدىك ءداۋىرى» – وسى دەڭگەيدەگى كىتاپ. ول – تۇتاس ءبىر كەزەڭنىڭ قۇندى ءداۋىرناماسى. ساراپشىلار تاريحي پۋبليتسيستيكا جانرىندا جازىلعان ەڭبەكتى جاي عانا كىتاپ ەمەس, ن.ءا.نازارباەۆتىڭ مەملەكەت تاريحى مەن بولاشاعىنا دەگەن اۆتورلىق كوزقاراسىن كورسەتەتىن تۋىندى دەپ باعالاۋدا. جانە ونىڭ باسقا ەڭبەكتەن ەرەكشەلىگى – كىتاپتى تاريحي مەملەكەتتىك رەفورمالاردىڭ باسىندا تۇرعان, ءاربىر شەشۋشى ءساتتى اقىلىنان, پاراساتىنان, جۇرەگىنەن, تاجىريبەسىنەن وتكىزگەن تۇلعانىڭ ءوزى جازعانىندا.
«تاۋەلسىزدىك ءداۋىرىن» وقىعان, زەردەلەگەن جان ونىڭ جاڭا تاريح بويىنشا ءارى وقۋ قۇرالى, ءارى حرەستوماتيا بولا الاتىنىنا كوز جەتكىزەدى. ەڭبەكتىڭ ىرگەلىلىگى, دەرەكتەردىڭ ناقتىلىعى, دايەكتەردىڭ مولدىعى, قۇرىلىمىنىڭ جۇيەلىلىگى, ءتىلىنىڭ تۇسىنىكتىلىگى – ەلتانۋ باعىتىنداعى, «رۋحاني جاڭعىرۋ» باعدارلاماسى اياسىنداعى جۇمىستاردىڭ نۇسقاۋلىعى, وقۋلىعى دەرلىك قاسيەتى.
باياندى بىرلىك پەن بايسالدى تىرلىكتىڭ ءمان-ماڭىزىن جەتە تۇسىنەتىن ءبىرتۇتاس قازاقستان حالقى مەملەكەت باسشىسىنىڭ جاڭا ەڭبەگىنەن تاعىلىم دا, تانىم دا الا بەرەتىنىنە سەنىمدىمىز.
دارحان مىڭباي,
قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى
