كەيىننەن ول تىگىنشىلىككە ءبىرجولاتا دەن قويادى. وسى ماقسات ونى ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنەن ديزاينەرلىك ماماندىق الۋعا جەتەلەيدى. بۇگىندە حالىقتىق قولونەرىمىزدى ۇلتتىق قۇندىلىق رەتىندە قاستەرلەي بىلەتىن قارشاداي قىز دەربەس تىگىن اتەلەسىنىڭ يەسى.
ءبىز ونىمەن وي-پىكىر الماسقان كەزدە كيىمدەردى ۇلتتىق ناقىشتار مەن ەتنو ستيلدىك ۇلگىدە تىگۋگە باسىمدىق بەرەتىنىن بىلدىك. روزانىڭ قولىنان شىققان ءساندى دە ساپالى ۇلتتىق كيىمدەر تۇرلەرىندە كەڭ-بايتاق دالامىز بەن كوگىلدىر اسپانمەن ۇشتاسقان تاۋلارىمىز كورىنىس تاۋىپتى. ال ەكىنشى بىرىندە كيىز ۇيلەر بەينەلەنىپ, كەربەز جولدارى بەدەرلەنگەن. – كامزول-قاجەكەيلەر مەن باس كيىمدە ورنالاسقان ويۋ-ورنەكتەردى جۇننەن دايىندايمىن. ءتورت ت ۇلىكتىڭ تاڭبالارى دا وسىنداي ادىسپەن ادىپتەلەدى. كويلەكپەن بىرگە كومكەرىلگەن قازاقتىڭ ۇلتتىق ىدىسى – تورسىق تا بۇل توپتامانى تولىقتىرا تۇسەدى, – دەيدى ول.
ال قوشقار ءمۇيىز ءستيلى قولدانىلعان كەلەسى ءبىر ونىمىنە جاس ديزاينەر «نازەركە» دەگەن اتاۋ بەرىپتى. بويجەتكەندەرگە ارنالعان كوگىلدىر ءتۇستى بۇل كويلەك نازىكتىك پەن اسەمدىكتىڭ بەلگىسىندەي اسەر قالدىرادى. ال التىن ءتۇستى ويۋ-ورنەكتەر مەن مارجان تاستار سالماقتىلىق پەن سىندارلىقتى تانىتىپ تۇرعانداي.
ەڭ باستىسى, جاس ديزاينەردىڭ ۇلتتىق كيىمدەر تىگۋ ىسىنە كاسىبي شەبەرلىككە قوسا ۇلكەن جاۋاپكەرشىلىكپەن قاراي بىلەتىنى بايقالادى. بۇل رەتتە روزا ەجەلگى ۇلتتىق ءستيلدى قازىرگى زاماناۋي ءسان ۇلگىلەرىمەن ۇندەستىرۋگە, ءارى وزگە ديزاينەرلەردىڭ قولتاڭباسىن قايتالاماۋعا ۇمتىلادى. ر.بيسەكەنوۆا اقتوبە قالاسىنداعى «رۋحانييات» مۋزەيىندە قىزمەت جاسايتىن «شەبەر ارت» كلۋبىنىڭ بەلسەندى مۇشەسى. وتكەن جىلى ونىڭ «ويۋ ويىلىم ورنەكتەپ» اتتى جەكە كورمەسىن تاماشالاۋشىلار دا كوپ بولىپ ەدى.
وتكەن جىلدىڭ اياعىندا الماتى قالاسىندا وتكىزىلگەن «قازاقستاننىڭ جىل كويلەگى-2017» ۇلتتىق بايقاۋىندا جۇلدەگەر اتانعان روزا بەيسەكەنوۆا الداعى ناۋرىز ايىندا ءۇندىستاندا وتكىزىلەتىن دۇنيەجۇزىلىك ءسان بايقاۋىنا جولداما الىپتى. ول مۇندا ۇلتتىق ناقىشتاعى كيىم ۇلگىلەرىن الەمدىك ءسان كوريفەيلەرىنىڭ نازارىنا ۇسىنباق.
تەمىر قۇسايىن,
«ەگەمەن قازاقستان»
اقتوبە
