ول اۋىلدى وتقا وراپ, قارسى كەلگەندى جالماپ كەلە جاتقاندا, ءبىر قىران بۇركىت بالاپانىن قورعاپ, ونىمەن ايقاسقا تۇسەدى. اسپان قوجاسىنىڭ تەگەۋرىنىنە توتەپ بەرە الماعان ءابجىلان اقىرى جەر استىنا قاشىپ, تىعىلۋعا ءماجبۇر بولادى. ال قىران وتقا ورانعان ۇيادان بالاپانىن امان الىپ شىعىپ, قانات تالىپ جەتەتىن قياسىنا سامعاي جونەلەدى. ادام جۇتىپ دانىككەن ءابجىلان كۇن تۇتىلىپ, ءوزىنىڭ ايداھارعا اينالار ءساتىن اسىعا كۇتەدى...
بۇل – ش.ايمانوۆ اتىنداعى «قازاقفيلم» كينوستۋدياسى جاساپ شىعارعان «مۇزبالاق» اتتى تولىقمەتراجدى كوركەم انيماتسيالىق ءفيلمنىڭ قىسقاشا مازمۇنى. كەشە كينوستۋديا وسى ءفيلمنىڭ ترەيلەرىن جاريالادى. بۇركىت پەن ادامنىڭ دوستىعىن باياندايتىن بۇل مۋلتفيلم مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەن. فيلم رەجيسسەر-انيماتور – تۇردىبەك مايدان جانە تىلەك تولەۋعازىنىڭ بىرلەسكەن شىعارماشىلىق ەڭبەگىنىڭ جەمىسى.
ەكى جىلعا سوزىلعان بۇل ءفيلمدى جاساپ شىعارۋعا كينەماتوگرافيانىڭ وسى جانرىندا ەڭبەك ەتىپ جۇرگەن 40-قا جۋىق وتاندىق مامان تارتىلعان. ۇزاقتىعى 65 مينۋتقا سوزىلاتىن مۋلتفيلم 2D جانە 3D فورماتىندا جاسالعان جانە ءار سەكۋندىندا 24-25 كادر سۋرەت سالىنعان. كەيىپكەرلەردى دىبىستاۋعا ەرجان جارىلقاسىن ۇلى, جانات تىنىباەۆ, سامات قورداباي, ەرعالي تولەباەۆ, الما ادىلقىزى ەسىمدى تەاتر جانە كينو اكتەرلەرى قاتىسقان.
– ءبىز وسى «مۇزبالاقتان» بۇرىن «تاستۇلەك» اتتى قىسقامەتراجدى انيماتسيالىق ءفيلمدى اياقتاعان ەدىك. «قازاقفيلمگە» باقىت عافۋ ۇلى باسشى بولىپ كەلدى. ول كىسى انيماتسيا بولىمىنە كەلىپ ءبىزدىڭ «تاستۇلەك» انيماتسيالىق ءفيلمىمىزدى كورىپ, ۇناتقانىن, مۇمكىن بولسا, ءفيلمدى ءارى قاراي تولىقمەتراجدى ەتىپ جاساۋ تۋرالى ۇسىنىسىن ءبىلدىردى. باسشىنىڭ قولداۋىمەن جاڭا تولىقمەتراجدى «مۇزبالاق» ءمۋلتفيلمىنىڭ ستسەناريىن جازۋعا كىرىستىك, جاڭا كەيىپكەرلەردى قوستىق جانە ەكشن جانرىندا تۇسىرەمىز دەپ شەشتىك, – دەيدى تىلەك تولەۋعازى.
اۆتورلار «مۇزبالاق» انيماتسيالىق ءفيلمى ارقىلى تاريح قويناۋىنا ەنىپ, جوعالىپ بارا جاتقان, قازاقتىڭ عاسىرلار بويى قالىپتاسقان ساياتشىلىق مادەنيەتىن كورسەتۋ ارقىلى جاس ۇرپاقتىڭ ساناسىنا ءوزارا سەنىم مەن دوستىق ۇعىمىن ءسىڭىرۋدى كوزدەيدى.
– بەس جاسار بۇركىتتى قازاق مۇزبالاق دەيدى. قازاق بۇل تاكاپپار قۇسقا جاس ەرەكشەلىگىنە قاراي ات قويادى. ءبىز اڭعا شىقپاساق تا, بالا كۇنىمىزدەن اڭشىلاردىڭ اڭگىمەسىن تىڭداپ وستىك. ۇلكەندەرگە ەرىپ, اڭنىڭ قالاي تۇزاققا تۇسەتىنىنىڭ شەت جاعاسىن كوزىمىزبەن كوردىك. قازاق حالقى قىراندى قولعا ۇيرەتۋدىڭ شەبەرى, بابى كەلىسكەن كەزىنەن باستاپ اڭعا قالاي سالاتىنىن ءدال قازاقتاي مەڭگەرگەن حالىق نەكەن-ساياق شىعار,– دەيدى ارىپتەسىنىڭ ويىن تولىقتىرعان تۇردىبەك مايدان.
«قازاقفيلم» كينوستۋدياسى 2017 جىلى ەكى تولىقمەتراجدى انيماتسيالىق فيلم ءوندىردى. سونىڭ ءبىرى «مۇزبالاق» بولسا, ەكىنشىسى رەجيسسەر اداي ءابىلدانىڭ تاريحي تۇلعا, قولباسشى كۇلتەگىن تۋرالى كارتيناسى. اتالعان فيلمدەر تولىققاندى اياقتالعان جانە پروكاتى مەن تۇساۋكەسەرى ۇستىمىزدەگى جىلدىڭ كوكتەمىنە جوسپارلانعان.
ايگۇل احانبايقىزى,
«ەگەمەن قازاقستان»
الماتى
