ەندىگى جەردە وڭىرلەردە ءوندىرىس كولەمىن ارتتىرۋ, ونەركاسىپ كەشەندەرىن جانداندىرۋ, سونىمەن قاتار ونىمدەردى ەكسپورتقا شىعارۋ ماسەلەلەرى كۇن تارتىبىندە تۇر. الەمنىڭ دامىعان مەملەكەتتەرىمەن تاجىريبە الماسىپ, ۇيرەنۋ ارقىلى ەڭبەك ونىمدىلىگىن ۇلعايتۋ ەلىمىز ءۇشىن دە ءتيىمدى بولماق. ماسەلەن, توقىراۋ جىلدارىندا جۇمىسىن توقتاتىپ, تاۋەلسىزدىك جىلدارىندا قايتادان ىسكە قوسىلعان جۇزدەگەن كاسىپورىننىڭ بۇل كۇندە ەلىمىزدىڭ دامۋىنا قوسىپ وتىرعان ۇلەسى مول.
وتكەن عاسىردىڭ توقسانىنشى جىلدارى قيىن كەزەڭدە جابىلىپ قالعان «تارازكوجوبۋۆ» جاۋاپكەرشىلىگى شەكتەۋلى سەرىكتەستىگى بۇل كۇندە تىرلىگىن قايتا تىكتەگەن كاسىپورىندار قاتارىندا. بىلعارى اياق كيىم شىعاراتىن قازاقستانداعى جالعىز عانا سەرىكتەستىكتە بۇگىندە شيكىزاتتان باستاپ دايىن ءونىم شىعارۋعا دەيىنگى ۇردىستەر قولعا الىنعان. وتكەن جىلى 157 مىڭ جۇپ باتەڭكە شىعارعان كاسىپورىن بۇگىندە ەلىمىزدىڭ بىرقاتار ءىرى مەكەمەلەرىنىڭ مەملەكەتتىك تاپسىرىسى ارقىلى اياق كيىم تىگەدى. ەندىگى جەردە اتالعان كاسىپورىن جىل سايىن جۇمىس قارقىنىن ارتتىرىپ, ەل ەكونوميكاسىنا ايتارلىقتاي ۇلەس قوسۋدى كوزدەپ وتىر ەكەن.
– ءبىز ءوز مەجەمىزدى جىلدان جىلعا كوتەرىپ كەلەمىز. بيىلعى جىلى 200 مىڭ جۇپ اياق كيىم شىعارۋدى جوسپارلاپ وتىرمىز, – دەيدى «تارازكوجوبۋۆ» جشس ديرەكتورىنىڭ ورىنباسارى شامۋحتار شايۋنۋسوۆ.
بۇگىنگى تاڭدا ەلىمىز ءۇشىن باسەكەلەستىك ماڭىزدى. قازاقستان ەندى وزگە ەلدەردىڭ وندىرىستەگى تاجىريبەسىن ۇيرەنىپ قانا قويماي, ۇيرەتۋى دە كەرەك. ەلباسى ءوز جولداۋىندا دا باسەكەگە قابىلەتتىلىكتى ءجيى ايتىپ كەلەدى. ماسەلەن, وسىدان ءبىراز بۇرىن اۋليەاتا جەرىنە تۇركيا اياق كيىم اسسوتسياتسياسىنىڭ پرەزيدەنتى بەكير ايدين باستاعان اياق كيىم ونەركاسىبىنىڭ ءبىر توپ وكىلدەرى كەلىپ, تاجىريبە الماسىپ قايتقان بولاتىن. سونىمەن قاتار تۇرىك اعايىندار اتالعان سەرىكتەستىكتىڭ جۇمىسىنا قىزىعۋشىلىق تانىتىپ, ءونىم ساپاسىنا ەرەكشە ءمان بەرىپ, بولاشاقتا بىرگە جۇمىس ىستەيتىن نيەتتەرىنىڭ بار ەكەنىن اڭعارتقان ەدى. ەگەر ەكى تاراپ كەلەشەكتە بىرلەسىپ جۇمىس جاسايتىن بولسا, وڭىردەگى ءوندىرىس قارقىنىنىڭ ارتا تۇسەتىنى ءسوزسىز.
وتاندىق ءونىمنىڭ وڭدى ناتيجەسى ەكونوميكالىق الەۋەتتى ارتتىرا تۇسەدى. ماسەلەن, بۇگىندە يمپورتپەن كەلەتىن تاۋار كوپشىلىكتىڭ تالعامىنا ءدوپ كەلىپ تۇر. بازارعا بارساق تا, دۇكەن ارالاساق تا يتاليانىڭ, تۇركيانىڭ اياق كيىمدەرىن كورۋگە بولادى. بىراق وتاندىق ونىمدەرگە تاپسىرىس بەرۋشى قاراپايىم تۇرعىنداردى تابۋ قيىن. بولاشاقتا وتاندىق اياق كيىم وندىرىسىندە بۇدان دا ىلگەرىلەۋشىلىك بايقالىپ جاتسا, ەلىمىز ءۇشىن باسەكەلەستىك ءباسىنىڭ ارتا تۇسەتىنى دە بەلگىلى.
حاميت ەسامان,
«ەگەمەن قازاقستان»
جامبىل وبلىسى
