اتالعان اۋىلدىڭ تۇرعىنى ينديرا جانىبەكوۆا 2017 جىلى جەلتوقسان ايىندا كوز جۇمعان 11 جاستاعى قىزى اۋدان دارىگەرلەرىنىڭ سالعىرتتىعىنان اۋرۋىن اسقىندىرىپ الىپ, وسى دەرتتەن قايتىس بولعانىن ايتقان ەدى. ءۇرجار اۋداندىق اۋرۋحاناسىنىڭ باس دارىگەرى جەكسەنباي تىلەۋبەرلين قايعىلى وقيعادان كەيىن اۋىلداعى 139 وقۋشىعا ەكپە جاسالعانىن, 800-گە جۋىق تۇرعىننان ساراپتاما الىنعانىن, بۇل اۋرۋ 49 ادامدا تىركەلىپ, ولاردىڭ 25-ءى اۋرۋحانادا ەم قابىلداعانىن جەتكىزدى. الايدا 16 قاڭتار كۇنى وسى جاعدايعا بايلانىستى ارنايى بريفينگ وتكىزگەن وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى رايفا سافيوللينوۆا ا ۆيرۋستىق گەپاتيتى 49 بالادا انىقتالدى دەگەن دەرەكتى جوققا شىعارىپ, كوز جۇمعان وقۋشى جوعارىدا اتالعان ۆيرۋستى سىرقاتتان ەمەس, باۋىر نەكروزىنان قايتىس بولعانىن مالىمدەدى. «بارلىعى 46 بالا تەكسەرۋدەن وتكەن, ونىڭ 25-ءى دياگنوستيكادان ءوتۋ ءۇشىن ءۇرجار اۋداندىق اۋرۋحاناسىنىڭ جۇقپالى اۋرۋلار بولىمىنە جاتقىزىلعان. سونىڭ تەك 12-سىندە اتالعان دياگنوز دالەلدەنگەن. ونىڭ 11-ءى – وقۋشى, بىرەۋى – ءۇش جاستاعى بالا. ا ۆيرۋستى گەپاتيتى 2017 جىلدىڭ قىركۇيەك ايىنان بەرى ءار ايلاردا ارا-تۇرا تىركەلىپ وتىرعان. اۋىرعان ادامدارمەن بايلانىس جاساعان بالالاردىڭ بارلىعىنا ەكپە جاسالىپ, شولپان اۋىلىندا 140 ادامعا ەكپە سالىندى», دەگەن-ءدى باسقارما باسشىسىنىڭ ورىنباسارى.
شولپان اۋىلىنداعى سانيتارلىق-ەپيدەميولوگيالىق جاعداي دەنساۋلىق ساقتاۋ مينيسترلىگىنىڭ دە قاتاڭ باقىلاۋىندا. بۇل جايىندا استاناداعى ورتالىق كوممۋنيكاتسيالار قىزمەتىندە ءباسپاسوز وكىلدەرىنە ارناپ وتكىزگەن بريفينگتە اتالعان مينيسترلىكتىڭ قوعامدىق دەنساۋلىق ساقتاۋ كوميتەتىنىڭ توراعاسى جانداربەك بەكشين تۇسىنىكتەمە بەردى. «دەنساۋلىق ساقتاۋ مينيسترلىگىنىڭ اۋماقتىق بولىمشەلەرى اۆگ بارلىق وشاقتارىنا ەپيدەميولوگيالىق تەكسەرۋ جانە شولپان اۋىلىنىڭ دارىگەرلىك امبۋلاتورياسىنا, جۇزاعاش ورتا مەكتەبىنە جوسپاردان تىس تەكسەرۋ جۇرگىزدى. ماماندارعا تاجىريبەلىك كومەك كورسەتۋ جانە وتكىزىلەتىن ءىس-شارالاردىڭ ساپاسىن باقىلاۋ ماقساتىندا شقو بويىنشا قوعامدىق دەنساۋلىق ساقتاۋ دەپارتامەنتى ماماندارىنىڭ ءۇرجار اۋداندىق باسقارماسىنا شىعۋى ۇيىمداستىرىلدى. مەكتەپ جانە ءۇي وشاقتارىنان 62 اۋىز سۋ سىنامالارى الىندى. وقۋ ورنىندا, ءۇي وشاقتارىندا قورىتىندى زالالسىزداندىرۋ جۇمىستارى, مەكتەپتىڭ سۋمەن جابدىقتاۋ جۇيەسىن, وشاقتاردا بارلىق سۋ ساقتايتىن سىيىمدىلىقتاردى جۋ جانە زالالسىزداندىرۋ جۇرگىزىلدى. اۋىز سۋ سىنامالارىن قايتا الۋ جانە كەيىننەن قايتا الۋ كەزىندەگى ناتيجەسى تەرىس بولدى», دەگەن كوميتەت توراعاسى قازىرگى ۋاقىتتا مەكتەپتە اۋىز سۋدى پايدالانۋعا تىيىم سالىنعانىن, مەكتەپ وقۋشىلارى شولمەكتەگى اۋىز سۋدى پايدالانىپ جاتقانىن, بارلىق بۇقارالىق مادەني-سپورتتىق ءىس-شارالار توقتاتىلىپ, وقىتۋدىڭ كابينەتتىك جۇيەسى الىنىپ تاستالعانىن جەتكىزدى. «تۋىنداعان جاعدايدى انىقتاۋ ءۇشىن شىعىس قازاقستانعا كوميسسيا شىقتى, ونىڭ قۇرامىنا دەنساۋلىق ساقتاۋ مينيسترلىگىنىڭ وكىلدەرى, س.اسفەندياروۆ اتىنداعى قازۇمۋ جانە سانيتارلىق-ەپيدەميولوگيالىق ساراپتاما عىلىمي-پراكتيكالىق ورتالىعىنىڭ ساراپشىلارى كىردى. بۇل جاعداي مينيسترلىكتىڭ باقىلاۋىندا», دەدى ج.بەكشين.
ءۇرجار اۋدانىنىڭ اكىمى سەرىك زاينۋلدينمەن تەلەفون ارقىلى سويلەسكەنىمىزدە, ول جاعدايدىڭ تولىق باقىلاۋعا الىنعانىن, مەكتەپتە ساباق توقتاتىلماعانىن, 2017 جىلدىڭ جەلتوقسان ايىندا كوز جۇمعان بالانىڭ ولىمىنە قاتىستى اۋداندىق پروكۋراتۋرا قىلمىستىق ءىس قوزعاعانىن ايتتى. ال وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆقا حابارلاسقانىمىزدا قازىر شولپان اۋىلىندا رەسپۋبليكالىق كوميسسيا جۇمىس ىستەپ جاتقانىن, قالىپتاسقان جاعدايعا وراي وبلىستا ارنايى جۇمىس توبى قۇرىلعانىن جەتكىزدى. «وكىنىشكە قاراي, قازىر شولپانداعى جاعدايعا بايلانىستى تەكسەرىلمەگەن دەرەكتەر دە تاراپ جاتىر. جەلتوقساندا كوز جۇمعان وقۋشىنىڭ «وسترىي گەپاتيت» دەگەن دياگنوزبەن قايتىس بولعاندىعى ايتىلۋدا. بالانىڭ قايتىس بولعانىن دالەلدەيتىن انىقتامانىڭ كوشىرمەسى دە تاراپ كەتىپتى. ونى ءبىز جوققا شىعارمايمىز. وسىنداي دياگنوزبەن قايتىس بولعانى راس. بىراق بۇل اۋرۋ مەن ا ۆيرۋستى گەپاتيتى ەكەۋى ەكى بولەك نارسە ەكەنىن ۇعىنۋعا ءتيىسپىز. ا ۆيرۋستىق گەپاتيتىمەن اۋىرعان ادامدا مۇنشالىقتى اسقىنۋ بولمايدى», دەيدى باسقارما باسشىسى.
ال قايتىس بولعان بالانىڭ اناسى ينديرا جانىبەكوۆا نە دەيدى؟ ءبىز ول كىسىمەن دە تەلەفون ارقىلى سويلەسكەن ەدىك. ايدىڭ, كۇننىڭ امانىندا بالاسىنان ايىرىلعان قارالى انا بىلتىر شولپان اۋىلىندا ەڭ العاش سارى اۋرۋ ەكى بالادا انىقتالعاندا كارانتين جاريالانىپ, قاۋىپسىزدىك كۇشەيتىلگەندە مۇنداي قايعىلى جاعداي ورىن الماس ەدى دەپ سانايدى. اۋىلداعى دارىگەرلەردىڭ ءوز جۇمىسىنا سالعىرت قاراعانىن دا جوققا شىعارمايدى. «باۋىردىڭ جەتىسپەۋشىلىگى دەيدى. بالام ەمحانادا ەسەپتە تۇرماعان. اۋىلداعى دارىگەرلەردىڭ الدىندا تۋعان كەزىنەن بەرگى كارتوچكاسى جاتىر. ەكپەلەردى ۋاقىتىندا الىپ جۇرگەن. بالام اۋرۋ بولسا بۇرىن نەگە بايقاماعان, نەگە ايتپاعان؟ شەشەم اۋىلداعى دارىگەرلەرگە قىزىمنىڭ اۋىرىپ, مازاسىزدانىپ تۇرعانىن ايتقاندا دارىگەرلەردىڭ ەشقايسىسى ۇيگە كەلمەگەن. سودان سوڭ امالسىزدان وزدەرى بارعان. سول كەزدەگى دارىگەرلەردىڭ ارەكەتىن تۇسىنەر ەمەسپىن. شەشەمنىڭ ايتۋىنشا, قىزىم سيستەما قابىلداپ جاتقاندا كىشى دارەتى قىسقان ەكەن. سول كەزدە اۋىل دارىگەرلەرى سيستەماسىن ج ۇلىپ تاستاپ, دالاداعى دارەتحاناعا جىبەرگەنى, ونىمەن قويماي ساراپتاماعا ءزارىن الا كەلۋدى تاپسىرعانى قاي ساسقانى؟ سوندا اۋىلداعى ەمحانادا قاراپايىم گورشوكتىڭ ءوزىنىڭ جوق بولعانى ما؟ سوندىقتان دارىگەرلەر ءوز باستارىن اراشالاۋ ءۇشىن جالعان اقپارات تاراتىپ وتىر دەپ ويلايمىن. مەنىڭ بالام سارى اۋرۋدان قايتىس بولدى», دەگەن ي.جانىبەكوۆا بولاشاقتا مۇنداي جاعداي قايتالانباۋى ءۇشىن الدىن الۋ جۇمىستارىن جۇرگىزىپ, اۋىلدى جەرلەردەگى دارىگەرلەردىڭ بىلىكتىلىگىن ارتتىرىپ, جاۋاپكەرشىلىگىن كۇشەيتۋ قاجەتتىگىن ايتادى.
ازامات قاسىم,
«ەگەمەن قازاقستان»
شىعىس قازاقستان وبلىسى
