– بۇل شەبەرلىك كاسىپتى وقۋشىلارعا ۇيرەتەتىن ۇيىرمەنىڭ اشىلعانىنا ءۇش جىلدىڭ ءجۇزى بولدى. 16 شاكىرتىم بار. مالدىڭ تۇياعىنان جانە سۇيەكتەرىنەن مۋزىكالىق اسپاپتار, سونداي-اق ءتۇرلى كادەسىي دا جاسايمىز. تۇياق وڭدەۋ ءۇشىن ءبىر جەتىدەي ۋاقىت سۋعا سالىپ, ءجىبىتىپ الىپ, سونان سوڭ ىستىق سۋعا قايناتىپ نەمەسە ىستىق قولامتاعا سالىپ بالقىتىپ السا, كەسىپ, جونۋعا جەڭىل بولادى. جۇمساپ, بالبىراعان تۇياقتى يۋگە, قالىپقا قىسىپ, كەز كەلگەن پىشىنگە كەلتىرۋ وڭاي. تۇياقتى ىستىق قولامتاعا سالاردا سۋعا مالىنعان كيىزبەن وراپ قويسا, تۇياق كۇيمەي جاقسى بالقيدى. وسىنداي بابىنا كەلىپ تۇرعان تۇياق, سۇيەكتەردى پىشاقپەن ەركىن جونىپ, ءتۇرلى بۇيىمدار جاساۋعا بولادى, – دەيدى.
اعاشتان ءتۇيىن تۇيگەن سايران مادياروۆ تا اڭگىمەگە ارالاستى. مەنىڭ ۇيىرمەمدە 8 شاكىرتىم بار. وسى كاسىپپەن اينالىسقانىما 10 جىلداي ۋاقىت بولدى. ەندى وسى بىلگەنىمدى شاكىرتتەرگە ۇيرەتىپ جاتىرمىن. قايىڭ, ەمەن, ۇيەڭكى اعاشتارىن پايدالانامىز. دومبىرانىڭ 5 ءتۇرىن, قوبىز جانە ساداق قارۋىن جاساساق, الداعى ۋاقىتتا توپتامالى قارۋ-جاراق تۇرلەرىن دە جاساۋ جوسپاردا تۇر, دەدى ول.
قىزىق كورىپ مال تۇياعىن قولىما الدىم. جىلتىراپ, ءازىر تۇرعان ماتەريالدان كۇنى ەرتەڭ وقۋشىلاردىڭ التىن قولىنان ءتۇرلى بۇيىمدار شىعاتىنىن كوز الدىما ەلەستەتتىم.
بۇگىنگى كۇندە بىرەۋ شەتەلگە شىعىپ, سول جاقتان ەسكەرتكىش سىيلىق الىپ كەلسە, ءماز بولىپ كورنەكتى جەرگە قويامىز. ال جالپاقتالدىق جاس شەبەرلەر جاساعان ونەر تۋىندىلارى شەتەلدىك كادەسىيلاردان ساپاسى الدەقايدا جوعارى.
اسەم بولات
باتىس قازاقستان وبلىسى,
قازتالوۆ اۋدانى
