قازىرگى تاڭدا زەينەتاقى جۇيەسى تولىقتاي ەڭبەك وتىلىنە بايلانىستىرىلعان. كىم كوپ جۇمىس ىستەسە, سول كوپ زەينەتاقى الاتىن بولادى. وسىعان وراي, بارشا قازاقستاندىقتار وزدەرىنىڭ اتقاراتىن جۇمىستارىن زاڭداستىرۋعا زور ءمان بەرۋى كەرەكتىگى دە جولداۋدا باسا ايتىلدى.
«2018 جىلدىڭ 1 قاڭتارىنان باستاپ ىنتىماقتى زەينەتاقى 8 پايىزعا ارتتى. مۇگەدەكتەرگە, اسىراۋشىسىنان ايىرىلعان جانە مۇگەدەك بالالار تاربيەلەپ وتىرعان وتباسىلارىنا ارنالعان جاردەماقىلار 16 پايىزعا دەيىن ءوستى. 2018 جىلدىڭ 1 شىلدەسىنەن باستاپ بازالىق زەينەتاقى ەڭبەك وتىلىنە بايلانىستى ورتاشا العاندا 1,8 ەسە كوبەيەتىن بولادى. بۇدان بولەك, 2018 جىلدىڭ 1 شىلدەسىنەن باستاپ كامەلەتكە تولعان, بالا كەزىنەن ءبىرىنشى توپتاعى مۇگەدەكتەردى باعىپ وتىرعان اتا-انالار ءۇشىن قوسىمشا مەملەكەتتىك جاردەماقىنى ەنگىزۋدى تاپسىرامىن. ءبىر ەڭ تومەنگى كۇنكورىس دەڭگەيىنەن كەم ەمەس مۇنداي جاردەماقىنى شامامەن 14 مىڭ وتباسى اي سايىن الادى. 2018 جىلى وسى ماقساتقا 3 ميلليارد تەڭگەگە دەيىن قارجى قاجەت بولادى», دەدى پرەزيدەنت ن.نازارباەۆ بيىلعى جىلدىڭ ماڭىزدى قۇجاتىندا.
مەملەكەت باسشىسىنىڭ ءار جىل سايىنعى جولداۋى حالىقتىڭ يگىلىگىن ارتتىرۋعا باعىتتالىپ كەلەدى. ونىڭ دالەلى رەتىندە وبلىسىمىزدا وتكەن جىلى اتقارىلعان جۇمىستاردى ايتار ەدىم. 2017 جىلى وڭتۇستىك قازاقستاندا تابيعي گازبەن قامتاماسىز ەتۋ باعىتىنداعى قۇرىلىس جۇمىستارىنىڭ كولەمى 2016 جىلمەن سالىستىرعاندا بىردەن 3 ەسەگە ارتتى. بۇل ماقساتقا بيۋدجەتتەن 13 ميلليارد 400 ميلليون تەڭگە قارجى ءبولىنىپ, جىل بويىنا 89 نىساندا جۇمىس ىستەلگەن. ناتيجەسىندە جىل سوڭىندا 59 نىسان ەل يگىلىگىنە تاپسىرىلدى. ونىڭ ىشىندە 44 ەلدى مەكەن مەن 2 شاعىن اۋداننىڭ تۇرعىندارى «كوگىلدىر وتىننىڭ» قىزىعىن كورە باستادى. سونداي-اق ءبىر جىلدا وبلىستا 14 ەلدى مەكەنگە تازا اۋىزسۋ, 92 اۋىلعا ساپالى ەلەكتر قۋاتى جەتكىزىلگەن.
«جۇمىلا كوتەرگەن جۇك جەڭىل» دەمەكشى, ءار ازامات ەلباسى تاپسىرمالارىن ورىنداۋدا وزىندىك ۇلەستەرىن قوسىپ, ماڭىزدى شارالاردى بىرلەسە جۇزەگە اسىرۋىمىز كەرەك.
جەڭىسبەك ماۋلەنقۇلوۆ,
وبلىستىق ارداگەرلەر كەڭەسىنىڭ توراعاسى
وڭتۇستىك قازاقستان وبلىسى
